Ʉlʉgatalʉko lwa vaanu va Ngʉlʉve
4
1 Lola,
ʉlwakʉva ʉlʉhʉʉvɨtso lwa Ngʉlʉve lwa vaanu ʉkwingila apoonu pa kʉgatalʉka ʉpwʉ aavanotsehiitse lʉpitsiige pwʉlʉle,
pwʉ tʉve nʉ lʉdwado,
aleke ʉkʉvepwo ʉmuunu mwanyie ʉnya kʉlemwa ʉkwingila apoonu apo.
2 Ʉwe najyʉwe tʉpʉliike ikulongwi inonu tsa poonu apo pa kʉgatalʉka ndʉwʉ vaapʉliike avakʉkʉjiitu.
Lɨno ikulongwi itso natsyavavʉmbʉlɨle kɨɨnu aveene ʉlwakʉva navɨɨdɨke galya ʉgwatsovile ʉNgʉlʉve.
3 Apeene ʉwe twɨ tukʉmwɨdɨka ʉNgʉlʉve,
weewe tʉliingila apoonu apo pa kʉgatalʉka.
Lɨno kʉ valya ʉwʉ navikʉmwɨdɨka ʉNgʉlʉve,
aatye,
“Ʉnsɨkɨ ʉne ʉpwʉ ndyaviipitsiiwe,
ndyɨɨjyɨgile ndɨkata,
‘Tsa jɨlweli avaanu avo nandɨlavatavʉle ʉkwingila apoonu pa kʉgatalʉka ʉpwʉ ndyanotsiitse.’ ”
a
ɄNgʉlʉve aatsovile ewo nʉpwʉ jɨngave ʉkʉnotsiwa kwa poonu apo kwamalile ʉkʉvombeka ʉnsɨkɨ ʉpwʉ aapelaga kʉkyanya na paasi.
4 Manya pwʉpale apoonu mu Vʉvɨge ʉVʉvalatse apikwolela ikulongwi tsa kɨgono kya lekelakʉpamato (7),
piita,
“Ɨkɨgono kya lekelakʉpamato ʉNgʉlʉve akagatalʉka ʉkʉvomba imbombo tsa mwene tsyoni.”b
5 Ikange ʉNgʉlʉve aatsovile ikulongwi itsi itsa kʉgatalʉka ndʉwʉ tsivɨgilwe apoonu apange mu Vʉvɨge ʉVʉvalatse,
akata,
“Tsa jɨlweli avaanu avo nandɨlavatavʉle ʉkwingila apoonu pa kʉgatalʉka ʉpwʉ ndyanotsiitse.”c
6 Avakʉkʉjiitu valya vaale wʉ vatatsi ʉkʉvʉʉlwa ikulongwi inonu itso.
Napeene naviingile apoonu apo ʉlwakʉva vaabeelile ʉkʉpʉlɨhɨtsa ɨlimenyu lya Ngʉlʉve.
Lɨno ʉlʉhʉʉvɨtso ʉlwa,
lʉpitsiige pwʉlʉle kʉ vaanu avange ʉkwingila apoonu apo.
7 Pwʉ ʉNgʉlʉve aavɨɨkile ɨkɨgono ɨkɨnge,
akakyɨlanga “Ɨleelo.”
Tʉlʉmanyile ewo ʉlwakʉva ɨmyaka myongosu wʉ gɨlʉtɨngʼiinie kʉ vaanu valya ʉwʉ naviingile,
ʉNgʉlʉve aatsovile mu Vʉvɨge ʉVʉvalatse,
kʉ nzɨla jya nkʉlʉdeeva ʉDavʉdi akata,
“Ɨleelo,
mungapʉlɨke ɨlimenyu lya Ngʉlʉve,
muleke ʉkʉva ni numbula itsikiliitye.”d
8 Aale ʉYoshua ave aasikiitse avaanu valya kʉ lʉgatalʉko ʉlwa,
ʉNgʉlʉve naale itsovi ikange ikulongwi tsa nsɨkɨ ʉgʉnge gwa kʉgatalʉka ʉgukwitsa.e
9 Ɨlyo livonia ʉkʉta kʉpitsiige kʉlɨ nsɨkɨ gwa kʉgatalʉka kʉ vaanu va Ngʉlʉve.
10 Ʉmuunu ʉvaveetsaga ʉvikwingila mu lʉgatalʉko ʉlwa,
igatalʉkaga ʉkʉvomba imbombo tsa mwene ndʉwʉ ʉNgʉlʉve aagatalwike wʉ amalile ɨmbombo jya vʉpeli.
11 Apo twɨkupilage pakʉta twingile apoonu apo pa kʉgatalʉka,
aleke ʉkʉvepwo nʉ mpamato pagati paawe ʉnya kʉlemwa ʉkwingila kʉ nongwa jya kʉleka ʉkwɨdɨka ndʉwʉ avakʉkʉjiitu vaavombile.
12 Muveetsage miiho ʉkʉvomba ɨlyo,
ʉlwakʉva ɨlimenyu lya Ngʉlʉve lɨnya wʉʉmi,
ikange lɨlɨ na maka ga kʉvomba ɨkɨveetsaga.
Ɨlimenyu ɨlyo lɨnya wʉʉge ʉkʉlʉtɨɨlɨla kʉ lipanga ɨlyʉge.
Ɨlipanga ndalɨve lyʉge siitso naliweesi ʉkwingila mu nʼgati nʉ kʉkegeta ɨnumbula jya muunu.
Apeene ɨlimenyu lya Ngʉlʉve liweesa ʉkʉvomba itso.
Liweesa ʉkwingila nʉ kʉtsisika mu nʼgati mu sipagɨka sya mmana na matsege.
f Ikange ɨlimenyu lya Ngʉlʉve liweesa ʉkʉgamanya amasaago nʉ vʉsumbe wa numbula tsiitu.
13 Nakɨkʉli ɨkɨpeliwa ɨkɨveetsaga ɨkɨsihamiike ɨkyʉ ʉNgʉlʉve nikʉkɨvona,
apeene ɨkɨveetsaga kɨlɨ pavʉvalasu pavʉlongolo pa mwene.
Najyʉwe tʉlatsivɨɨka pavʉvalasu ikulongwi tsa mbombo tsiitu pavʉlongolo pa mwene.
ɄYɨɨsʉ vɨ nteeketsi ʉmbaha
14 Vɨɨdɨkivajyango mwa Kɨlɨsiti,
mulʉmanye ʉkʉta tʉlɨ nʉ nteeketsi ʉmbaha ʉndʉti ʉvingye apo ʉpwʉ alɨpwo ʉNgʉlʉve jyʉmwene.
Ʉjwa vɨ Yɨɨsʉ,
ʉMwana va Ngʉlʉve.
Pwʉ lɨno twibate vʉnonu nʉ kʉnywalɨla galya ʉgwʉ tukwɨdɨka nʉ kʉgoolela.
15 Lola,
ʉnteeketsi ʉmbaha viitu alʉmanyile ʉvʉdekedeke wiitu,
manya namwene aagelilwe kʉ nzɨla itsilɨ pongosu ndʉwʉ najyʉwe tugelwa,
napeene naavombe imbiivi.
16 Pwʉ tʉhegelelage apo ʉpwʉ kɨlɨpwo ɨkɨnyalwangʉla kya Ngʉlʉve ʉnya lʉhʉngʉ kɨtsila lʉdwado pakʉta atʉsyɨkɨle nʉ kʉtʉlɨlɨla ɨkɨsa ʉnsɨkɨ gwa vʉpala.