Vaebulaniya 1

Ɨkalata

kʉ Vaebulaniya

ɄNgʉlʉve itsova na vɨɨdɨki kʉ nzɨla jya Mwana va mwene

1 Kʉnsana ʉkwa, ʉNgʉlʉve aatsovile na vakʉkʉjiitu kʉ nzɨla jya vanyamalago. Aavombile ewo kakongosu na kʉ nzɨla nyongosu. 2 Lɨno wʉ tʉlɨ mu kavalɨlo ka lɨno, ʉNgʉlʉve atsovile nʉʉwe kʉ nzɨla jya Mwana va mwene. Aamwomwe ʉMwana va mwene ʉjwa vɨ ahaale isiinu syoni, nʉ kʉgendela ʉmwene, ʉNgʉlʉve aapelile kʉkyanya nɨ kɨlʉnga ɨkɨ ni syoni isilɨ ʉmwa. 3 ɄMwana ʉjwa ivonia ʉmwʉ vʉveelye wa kʉdega ʉwɨɨmɨkiwa wa Ngʉlʉve, ikange ivonia ʉlʉgendo lwoni lwa Ngʉlʉve ʉmwʉ lʉveelye. Ivɨɨka isiinu syoni sya mu kɨlʉnga ni sya kʉkyanya sigendelelage ʉkʉva ndʉwʉ silɨwo kʉ nzɨla jya limenyu lya mwene ɨlɨnya maka. Wʉ ɨɨhʉmiitse ave neekelo jya kʉvavalatsa avaanu mu mbiivi, akalʉta kutaama kʉ kɨvoko kya kʉndyo kya Ngʉlʉve ʉNdʉti, apoonu pa wɨɨmɨkiwa ʉvʉlʉti ʉkʉ kʉkyanya.

ɄYɨɨsʉ vɨ ndʉti ʉkʉlʉtɨɨlɨla avasuungʼwa vooni

4 ɄNgʉlʉve aampelye ʉMwana va mwene ave ndʉti ʉkʉlʉtɨɨlɨla avasuungʼwa ndʉwʉ ɨlitaawa ɨlyampye lilʉti ʉkʉlʉtɨɨlɨla ɨlitaawa lya veene. 5 Lola nakʉli ʉnsuungʼwa ʉvagelile ʉkʉvʉʉlwa nʉ Ngʉlʉve amamenyu aga ʉgwʉ ʉNgʉlʉve aambʉʉlile ʉYɨɨsʉ akata, “Ʉve veeve Mwana vango, ɨleelo ndyɨpelile Dadaajo.” Ikange nakʉli ʉnsuungʼwa ʉvagelile ʉkʉvʉʉlwa, “Jʉndiiva Dadaajo, nʉʉve jʉwiiva Mwana vango.” 6 Ikange wʉ ikʉnsuungʼa ʉMwana va mwene ʉlʉdɨɨga, ʉNgʉlʉve aatye, “Avasuungʼwa vooni va Ngʉlʉve vɨsajage kʉ mwene.” 7 Ikange pa kulongwi tsa vasuungʼwa, ʉVʉvɨge ʉVʉvalatse wiita, “Avasuungʼwa vango, ndikʉvaandʉla vave mepo, naveene avavombi vango, ndikʉvaandʉla vave ndimbo tsa mwoto.” 8 Napeene kʉ Mwana va mwene iita,

“Ʉve Ngʉlʉve ʉlatavala sikutsooni,

ikange ʉvʉlongotsi waako vʉlaava wa vʉgolosu.

9 Ʉve ʉtsiganile itsa vʉgolosu,

nʉ kʉtsisʉʉla imbiivi tsyoni.

Ɨkɨ kyʉ mene ʉne ndɨ Ngʉlʉve vaako, ndɨkʉhalile,

ndɨkʉbakile amafuta ga kʉkwɨmɨka,

pakʉta ʉve ndʉti,

ʉkʉlʉtɨɨlɨla avanino vooni.”

10 Ikange ʉNgʉlʉve iita,

“Ʉve Ntwa veeve waapelile ɨkɨlʉnga palya pa vʉtengʉlɨlo,

ikange veeve waapelile kʉkyanya.

11 Lɨno paninie nɨɨlyo isyo silasila,

silanyakasʉka ʉta nsabwa, peene ʉve ʉlaavekwo sikutsooni.

12 Ʉve ʉlasivɨvɨlɨngʼania ʉta kanzo ɨjɨnyakaswike,

silaandʉlwa ʉta nsabwa ʉndaala.

Lɨno ʉve ʉlaava ndʉwʉ ʉlɨwo, ikange ɨmyaka gyako nagɨlasile.”

13 ɄNgʉlʉve nagelili ʉkʉmbʉʉla ʉnsuungʼwa ʉvaveetsaga ate,

“Ʉtaame kʉ kɨvoko kyango kya kʉndyo,

ʉkʉsikila ʉnsɨkɨ ʉpwʉ ndikʉvalesa avalʉgʉ vaako,

nʉ kʉvalongotsa lwoni.”

14 Pwʉ lɨno avasuungʼwa kyʉ kɨɨnu kɨki? Avasuungʼwa avo mepo itsikʉmbombela ʉNgʉlʉve, ʉmwene ikʉtsisuungʼa tsikavavombelage avaanu ʉwʉ alavapoka.