2
1 Pwʉ lɨno galya ʉgwʉ twapʉliike,
tʉgendelelage siitso ʉkʉgatsingahɨtsa,
pakʉta tʉleke ʉkʉsaamwa nʉ kʉkonga ikulongwi itsinge.
2 Ikulongwi itsyatsovilwe na vasuungʼwa kʉ vakʉkʉjiitu,
tsyale tsa kʉvabanyilitsa avaanu vatsikongage.
Avaanu vooni ʉwʉ navatsyɨdɨke,
nʉ wʉ navatsikonge vaavʉngilwe ʉkʉkongana nʉ vʉgalo wa veene.
3 Lɨno ʉwe jʉtuponela ndapi tʉleke ʉkʉvʉngwa tʉngave natuvɨɨkɨla ʉntɨma ʉvʉpoki ʉvʉlʉti ʉvʉlɨ ndʉʉvʉ?
ɄNtwa ʉYɨɨsʉ jyʉmwene vɨ mwene aatengwe ʉkʉpʉlɨsa ʉvʉpoki ʉwa,
na vaanu valya avaampʉliike wʉ vatʉvʉʉlile ʉkʉta waale wa jɨlweli.
4 ɄNgʉlʉve namwene oolye ʉvʉpoki ʉwa kʉ nzɨla jya kʉvonia isimanyilo,
ʉkʉvomba isidego isilɨ pongosu,
nʉ kʉvapa isikʉngɨlwa sya Mepo ʉMbalatse ndʉwʉ aanogilwe.
Ʉkwɨjisa kwa Yɨɨsʉ
5 Tʉlʉmanyile ʉkʉta ʉNgʉlʉve navɨɨkili ɨkɨlʉnga ɨkɨpya ɨkɨliitsa kɨve paasi pa vʉtavala wa vasuungʼwa.
Ɨkɨlʉnga ɨkyo kyʉ twitsova ikulongwi tsa kyene.
6 Lola,
apoonu apange ʉVʉvɨge ʉVʉvalatse vukwolela wiita,
“Ʉmuunu ʉjwa kyʉ kɨɨnu kɨki,
ʉkʉsikila pa kɨgelelo,
ʉve vɨ Ngʉlʉve,
vukʉnsaagɨlɨla?
Ʉjwa muunua vʉvʉle,
kɨki ʉve vukʉmbɨɨkɨla ʉntɨma?
7 Waampelile ʉmuunu ave paasi padebe pa vasuungʼwa
kʉ nsɨkɨ nsupi.
Nʉʉve ʉkampa ʉwɨɨmɨkiwa nʉ vʉdwadwa,
8 ikange ʉkasivɨɨka isiinu syoni paasi pa vʉtavʉlɨlwa wa mwene.”
b
Lola,
ʉkʉta ʉkasivɨɨka isiinu syoni paasi pa vʉtavʉlɨlwa wa mwene,
kwʉ kʉta nakɨkʉli ɨkɨveetsaga ɨkyʉ nakitavalɨwa nʉ mwene. Paninie nɨɨlyo kʉ nsɨkɨ ʉgʉ natukʉmbona ʉmuunu itavala isiinu isyo.
9 Lɨno pa kʉleka ɨlyo,
tukʉmbona ʉYɨɨsʉ ʉvɨ kʉ nsɨkɨ nsupi aavɨɨkilwe paasi ʉkʉlʉtɨɨlɨla avasuungʼwa,
lɨno apeevilwe ʉwɨɨmɨkiwa nʉ vʉdwadwa ʉvʉlʉti ʉlwakʉva aakʉviilwe nʉ kʉswa.
Aalamwe ʉkʉvomba ewo pakʉta kʉ lʉhʉngʉ lwa Ngʉlʉve,
avapoke avaanu vooni.
10 ɄNgʉlʉve ʉMpeli nʉ ndoleeli va siinu syoni,
aaweene lʉnonu ʉkʉmbɨɨka ʉYɨɨsʉ ave vʉkwɨlanilo kʉ nzɨla jya vʉkʉvɨlwa wa mwene.
Aavombile ɨlyo pa kʉvapoka avaanu vongosu,
pakʉta naveene vʉʉpɨlɨle ʉwɨɨmɨkiwa wa mwene.
11 ɄYɨɨsʉ ʉvivalatsa avaanu,
paninie naavo avivalatsiwa,
vooni ʉDadajyavo alɨ mpamato.
Ɨkɨ kyʉ mene ʉYɨɨsʉ nivona soni ʉkʉvɨɨlanga avaanu avo valʉkololwe.
12 Pa limenyu ɨlyo ʉYɨɨsʉ aatsovile akata,
“Daada Ngʉlʉve,
ndikʉvavʉʉlaga avalʉkololwango ʉwɨɨmɨkiwa waako,
pa lʉlʉndamano lwa vaanu vaako,
ndikʉkʉginiaga ʉve ʉkʉta ʉlɨ ndʉti.”c
13 Ikange iita,
“Ndikʉmmʉʉvɨlaga ʉNgʉlʉve.”
d Ikange iita,
“Ʉne ndɨlɨ apa paninie na vaana ʉwʉ ndɨpeevilwe nʉ Ngʉlʉve.”e
14 Lɨno ʉlwakʉva avaana va Ngʉlʉve avo vaanu,
namwene ʉYɨɨsʉ iitsile mu mmana nda veene.
Aavombile ewo pakʉta kʉ nzɨla jya vʉswe wa mwene avejange amaka ga Setano ʉvɨ alɨ na maka ga kʉvapelela avaanu ʉvʉswe.
15 Ikange pa kʉvomba ewo,
ʉYɨɨsʉ aavavopwe avaanu vooni ʉwʉ vaale mu vʉvanda ʉwaahʉmiine nʉ vʉdwatsi wa kʉswa.
16 Ɨlyo livonia pavʉvalasu ʉkʉta ʉYɨɨsʉ niitse kukʉvatanga avasuungʼwa,
apeene iitsile kukʉvatanga avaanu va kɨvʉmbʉkʉ kya Abulahamu.
17 Pwʉ aalondiiwe ahwanane na valʉkololwe mu kɨveetsaga pakʉta ave vɨ nteeketsi ʉmbaha ʉnya kɨsa ikange mmʉʉgʉ pa kʉmbombela ʉNgʉlʉve.
Kʉ nzɨla ɨjyo aaweesiitse ʉkʉhʉmya isyavʉpe sya kʉvavalatsa avaanu kʉ mbiivi tsa veene.
18 Apo iweesa ʉkʉvatanga avigelwa nʉ Setano ʉlwakʉva ʉmwene jyʉmwene aagelilwe ikange aakʉviilwe.