Inyiiho tsa Kɨkɨlɨsiti
3
1 Ʉvakʉmbʉhɨtse avaanu ʉkʉva vapʉlɨki kʉ valongotsi na kʉ vanya vʉtavʉlɨlwa,
nʉ kʉva vaanu avikɨjisa.
Ikange,
vave avivomba imbombo tsyoni inonu.
2 Ʉvavʉʉle valeke ʉkʉntsova ʉmuunu ʉvaveetsaga ʉvʉviivi ʉwʉ navombili,
valeke ʉkʉva nɨ mbatsa,
vave vadeke.
Vave avikɨjisa kʉ vaanu vooni.
3 Najyʉwe nda vaanu avange,
twale vapelwa,
vagalo,
ikange twasyovilwe.
Twale vavanda va vʉnogwe ʉvʉviivi wa mihana giitu ʉvʉlɨ pongosu.
Ʉwʉʉmi wiitu waale wa mbiivi nɨ giila,
avaanu vaatʉsʉʉlaga,
najyʉwe twavasʉʉlaga.
4 Pwʉ ʉNgʉlʉve ʉMpoki viitu aatʉvoniitse ʉwiipa nʉ lʉgano lwa mwene,
5 pa kʉtʉpoka.
Kwʉ kʉta naavombe ewo ʉkʉkongana ni mbombo tsiitu ingolosu itsʉ twavombile,
apeene aavombile ʉkʉkongana nɨ kɨsa kya mwene.
Akatʉvalatsa ʉvʉviivi wiitu.
Ʉkwa kwʉ kʉholwa vʉpya.
Kange aatʉpye ʉwʉʉmi ʉvʉpya mu nzɨla jya Mepo ʉMbalatse.
6 Akatʉduudilila ʉMepo ʉMbalatse kɨvʉla kɨgelelo mwa Yɨɨsʉ Kɨlɨsiti ʉMpoki viitu,
7 na mu lʉhʉngʉ lwa mwene,
akatʉpelela tʉnogele pamiiho ga mwene,
akatʉvɨɨka tʉve venevʉhaale wa wʉʉmi ʉvʉtsila vʉmalɨlo ʉwʉ tuhʉʉvɨla.
8 Ɨlyo lyʉ limenyu lya lweli.
Ndinogwa ʉsimiilitse amamenyu aga,
ʉkʉta ʉwʉ vikʉmwɨdɨka ʉNgʉlʉve,
ɨkɨgono ɨkɨveetsaga vasaagage nʉ kwɨjʉmɨɨlɨtsa ʉkʉvomba imbombo inonu.
Ago gwʉ mamenyu amanonu kʉ vaanu vooni,
ikange ganya lʉvʉmbʉlɨlo kʉ vaanu vooni.
9 Paninie niitso,
wɨlekelwe ʉkwɨhanza mu ngʼaani tsa vʉtsimu,
ni sitsaago sya mataawa ga sivʉmbʉkʉ isya katale,
imbatsa ni ngʼaani tsa ndagɨlo tsa Moose.
Itso tsyoni natsivʉmbʉla kɨɨnu.
10 Ʉmuunu ʉnsongelengʼanie,
ʉmbʉngage ʉlʉtatsi nʉ lwa vɨɨlɨ,
angave nipʉlɨka,
immʉmye mu mpelela.
11 Ʉlʉmanyile ʉkʉta ʉmuunu ndʉʉjwa avʉlekile ʉwajɨlweli,
ikange innangi,
ʉjwa ɨhɨgile mwene.
Amamenyu ga vʉmalɨlo
12 Ndinogwa ʉkʉbɨha kʉ Nikopoli ʉlwakʉva ndɨlamwe ʉkʉtaama ʉkʉ ʉnsɨkɨ gwa ngʼaala.
Lɨno jʉndikʉnsuungʼa ʉAlitema evo ʉTikiko kwave.
Angasike ʉkwa,
ʉvombe ngʼaningʼaani ʉkʉbɨha kʉ Nikopoli tʉkaaganile.
13 ɄSena,
ʉmmanyi va ndagɨlo,
nʉ Apoolo ʉvapeetsage syoni isya kʉvatanga mu nzɨla,
kɨlavakeepaga kɨɨnu.
14 Avaanu viitu vɨmanyiise ʉkʉvomba inonu isigono syoni,
ʉkʉta vavatangage avanya vʉpala lweli,
pwʉ mu wʉʉmi wa veene vahʉʉpage iseke.
15 Avaanu vooni ʉwʉ tʉlɨ paninie,
vikʉkʉsaamusa.
Lɨno najyʉve ʉvasaamuse vooni ʉwʉ vatʉganile mu vʉhange wa lwɨdɨko.
Ʉlʉhʉngʉ lwa Ntwa lʉveetsage paninie nʉʉnyie nyɨ vooni.