Ɨkalata jya vɨɨlɨ jya Paulo
kwa Timoti
Ikulongwi itsilongola
Ɨkalata ɨjɨ ɨjya vɨɨlɨ kwa Timoti jyavɨgilwe nʉ mpositili ʉPaulo (1:1-2). Aambɨgye ʉTimoti ʉvɨ aale intangɨli va mwene va pa ntɨma ndʉ mwana va mwene (1:2-5; 2:1). ɄPaulo aavɨgile ɨkalata ɨjɨ ʉnsɨkɨ ʉpwʉ aale mu kɨkʉngwa ʉkʉ kʉ Looma (1:16-17). Aakʉngilwe ʉnsɨkɨ ʉgwʉ ʉnkʉlʉdeeva ʉNelo aalongotsaaga ʉvʉtwa wa kʉ Looma. Ɨmisɨkɨ ɨgyo aVakɨlɨsiti vaakʉvɨlwagwa siitso kʉ nongwa jya lwɨdɨko lwa veene. Ikange, ʉPaulo aasaagaga ʉkʉta ɨmisɨkɨ ɨgyo aale ibudwa (4:6-8). Ʉnsɨkɨ ʉgwa ʉTimoti aale mu vʉtsenge ʉwa Efeso ʉwʉ waale mu mpandʉlʉ ʉgwa Asiya (1:18; 4:12-13, 19). Jivoneka ʉta ɨkalata ɨjɨ jyavɨgilwe mu mwaka inninie mu myaka ɨgya sitsigo ntanato na gɨnni (64) ʉkʉsika kʉ sitsigo ntanato na lekelakʉpamato (67) Waholilwe ʉYɨɨsʉ Kɨlɨsiti.
Ʉvʉsumbe wa kʉvɨga ɨkalata ɨjɨ, waale wa kʉmpa amaka ʉTimoti ʉkʉta ave ɨnotsiitse pa kʉvavʉʉla avaanu ɨLivangɨli lya Yɨɨsʉ Kɨlɨsiti. Ikange ɨtangage nʉ kwɨjʉmɨɨlɨtsa mu vʉpala wooni (1:6-8; 2:3-10, 24; 4:2-5). ɄPaulo aandagye ʉTimoti ʉkʉta, avavʉʉle aVakɨlɨsiti avʉʉkʉ kʉ Efeso vaveetsage nɨ migendele ɨminonu. Vakonge vʉnonu imanyiiso itsʉ vaamanyie (2:14). Ɨlɨnge, ikʉmbʉʉla ʉTimoti ʉkʉta, abeele kʉ maka gooni imanyiiso itsa vʉnuasi, amanyiisaage itsa lweli (1:13; 4:2-5). Ikange, ʉPaulo aale nʉ vʉsʉʉkwa siitso ʉkʉmbona ʉTimoti (1:3-4; 4:9, 21), pwʉ mu kalata ɨjɨ ikʉnʼdoova ʉTimoti abɨhe ngʼaningʼaani, ammɨlɨkɨle ɨlikoti ni sitabu sya mwene (4:13).