Ɨkalata ɨnatsi jya Paulo
kwa Timoti
Ikulongwi itsilongola
Ɨkalata ɨnatsi kwa Timoti jyavɨgilwe nʉ mpositili ʉPaulo (1:1). Aambɨgye ʉmuunu ʉvɨ aatambʉlwagwa Timoti, ʉvɨ aahʉmaga mu vʉtsenge ʉwa Lisitila. ɄTimoti aale mwana va nʼdala ʉNʼyahudi, nʉ dadaaje aale Nʼyunaani (Mbombo tsa Vapositili 16:1). ɄTimoti iingye ʉVʉkɨlɨsiti kʉ nzɨla jya mbombo jya Paulo, kyʉ kɨɨnu ʉPaulo ikʉmwɨlanga ʉTimoti ʉkʉta mwana va mwene va lweli mu vʉhange wa lwɨdɨko (1:2). ɄTimoti aagendaga nʉ Paulo mu mbombo jya kʉlʉmbɨlɨla ɨLivangɨli lya Yɨɨsʉ Kɨlɨsiti (Mbombo tsa Vapositili 17:14-15; 18:5). Jivoneka ʉkʉta ʉPaulo aavɨgile ɨkalata ɨjɨ mu mwaka ʉgwa sitsigo ntanato na gɨhaano (65) Waholilwe ʉYɨɨsʉ Kɨlɨsiti. ɄPaulo wʉ akaanale ʉkʉvɨga ɨkalata ɨjɨ, aatalile ʉkʉmpa ʉTimoti ɨmbombo jya kwɨmɨɨlɨla isipʉga sya vɨɨdɨki mu vʉtsenge ʉwa Efeso (1:3).
Ʉvʉsumbe wa Paulo wa kʉvɨga ɨkalata ɨjɨ waale wa kʉmbʉnga ʉTimoti ʉmwʉ jinogela ʉkʉhala nʉ kʉmanyiisa avandyakoni na vatangɨli va sipʉga sya vɨɨdɨki mu vʉtsenge ʉwa Efeso. ɄPaulo aanogilwe ʉkʉta ʉTimoti na vavombi va mpelela avo vave vagolosu, vavamanyiisaage avɨɨdɨki ɨlweli nʉ lʉgendo ʉlwa vʉvalatse. Ikange, aanogilwe ʉkʉmbʉʉla ʉTimoti ʉkʉta, ave kɨmanyilo kɨnonu kʉ vaanu vooni (4:11). Ʉvʉsumbe ʉvʉnge waale wa kʉndʉngɨkɨla ʉTimoti ʉmwa kʉvatangɨla avɨɨdɨki mu vʉpala ʉwʉ waalemwo mu mpelela. Ikange, aanogilwe ʉkʉnnywilitsa ʉTimoti ʉkʉta ave na maka ʉkʉbeela imanyiiso tsyoni itsa vʉnuasi (1:3-7; 4:1-5; 6:3-5).