Ɨkalata ɨnatsi jya Paulo
kwa Timoti
Ʉlʉpembetso lwa Paulo kwa Timoti
1
1 Ɨkalata ɨjɨ jɨhʉmile kwane ʉne ndɨ Paulo.
Ʉne neene ndɨsuungʼilwe ʉkʉva mpositili va Mesiya ʉYɨɨsʉ mu lʉlagɨlo lwa Ngʉlʉve ʉMpoki viitu,
nʉ Mesiya ʉYɨɨsʉ ʉvɨ lʉhʉʉvɨlo lwitu.
2 Ndikʉkʉvɨgɨla ʉve Timoti,
mwana vango va lweli mu vʉhange wa lwɨdɨko.
Ʉlʉhʉngʉ nɨ kɨsa nʉ lʉnotsehetso ʉkʉhʉma kwa Ngʉlʉve ʉDaada na kwa Mesiya ʉYɨɨsʉa ʉNtwa viitu,
siveetsage nʉʉve.
Ʉlʉpavɨlo kʉ valya avimanyiisa itsa vʉnuasi
3 Ʉtaame mu vʉtsenge ʉwa Efeso,
ndʉwʉ ndyakʉdoovile ʉnsɨkɨ gʉlya wʉ ndihega ʉkʉbɨha ʉkʉ kʉ mpandʉlʉb ʉgwa Makedoniya.
Ʉkwa kʉ Efeso kwʉvale avaanu ʉwʉ vimanyiisa ikulongwi tsa vʉnuasi,
ʉvabeetse avaanu avo.
4 Vɨlekelwe ʉkʉjatsa ʉnsɨkɨ mu sitsaago isitsila lʉvʉmbʉlɨlo,
na mataawa ga sivʉmbʉkʉ sya vanyakatale amatsila kʉduga.
Itso tsʉ tsyene tsipela ʉkʉkaningʼana,
natsikʉvatanga avaanu ʉkʉmwɨdɨka ʉNgʉlʉve,
ndʉwʉ vʉlɨwo ʉvʉnogwe wa mwene ʉwa kʉvapoka avaanu.
5 Ʉvʉsumbe wa ndagɨlo tsiitu,
wʉ ʉvʉ,
avɨɨdɨki vaganane nɨ numbula ɨmbalasu,
ni nyɨvonelo inonu,
nʉ lwɨdɨko ʉlwa jɨlweli.
6 Napeene,
avange vatsilekile itso,
vakiliwiike,
vingye vitsova amamenyu amatsila lʉvʉmbʉlɨlo.
7 Vilonda ʉkʉva vamanyisi va ndagɨlo tsa Moose,
ndajɨve ʉgwʉ vitsova nʉ kʉsimiilitsa navagamanyili.
8 Tʉlʉmanyile ʉkʉta indagɨlo tsa Moose nonu,
ɨngave ʉmuunu ikʉtsikonga mu vʉnogwe wa Ngʉlʉve.
9 Ikange,
kʉtʉnogye ʉkʉtsimanya ʉkʉta indagɨlo natsivɨɨkilwi tsa vagolosu,
apeene tsa vaanu avahambwike nʉ wʉ vatava vagolosu,
avaanu avanangi nʉ wʉ navikɨsaja kwa Ngʉlʉve,
avaanu avalamile nʉ wʉ vatava vavalatse,
avaanu avibuda avadadajyavo nava vanyinaavo,
na vaanu avibuda avaanu avange.
10 Ikange,
tsivɨɨkilwe tsa vaanu avaligu nʉ wʉ viligupa na vagoosivajyavo,
ʉwʉ vigonela avaanu nʉ kʉvagʉtsa vakave vavanda,
avanuasi,
nʉ wʉ vikɨjyɨga itsa vʉnuasi,
paninie ni tsinge tsyoni itsʉ natsikwɨdɨngʼana ni manyiiso itsa lweli.
11 Imanyiiso itsa lweli itso tsilɨ mu Livangɨli,
ɨlyʉ livonia ʉvʉvaha wa Ngʉlʉve,
ʉvɨ ikwɨmɨkiwa.
Ɨlyo lyʉ lyene ɨlyʉ ndɨpeevilwe nʉ Ngʉlʉve ndɨlɨlʉmbɨlɨlage.
Ɨkɨsa kya Yɨɨsʉ Kɨlɨsiti kwa Paulo
12 Ndikʉnsaana ʉMesiya ʉYɨɨsʉ,
ʉNtwa viitu ʉvɨ amye amaka,
ʉlwakʉva aambwene ndɨlɨ mbombi immʉʉgʉ,
akambɨɨka mu mbombo jya mwene.
13 Aavombile ewo nʉpwʉ ɨngave pa vʉtengʉlɨlo ndyanʼdʉkile ndɨkata nʉ kʉnkotsa isoni nʉ kʉvavipitsa avaanu va mwene.
Akangʼolela ɨkɨsa ʉlwakʉva ndyavombaga itso mu vʉtsimu nʉ kʉleka ʉkʉva nʉ lwɨdɨko.
14 Ikange,
ʉMesiya ʉYɨɨsʉ,
ʉNtwa viitu,
aambonie ʉlʉhʉngʉ siitso,
akaama nʉ lwɨdɨko nʉ lʉgano ʉlwihʉma kʉ mwene.
15 Ɨlɨ lyʉ limenyu lya lweli,
ɨlyʉ avaanu vakanogye valyʉpɨlɨle,
ʉkʉta,
“ɄMesiya ʉYɨɨsʉ iitsile mu kɨlʉnga avapoke avanangi.”
Mu vanangi avo,
ʉne ndɨlɨ mbombambiivi ʉkʉlʉtɨɨlɨla vooni.
16 Mwɨlyo,
ʉMesiya ʉYɨɨsʉ aangʼolye ɨkɨsa ʉne ndɨndɨvye nnangi ʉkʉlʉtɨɨlɨla vooni pakʉta kʉ nzɨla jyane avonie ʉkʉsipa kwa mwene kwoni.
Pwʉ ndɨve kɨmanyilo kʉ valya avapya vikʉmwɨdɨka nʉ kwʉpɨlɨla ʉwʉʉmi ʉwʉ nawisila.
17 Lɨno ʉwɨɨmɨkiwa nʉ vʉvaha vʉlɨ nʉ mwene sikutsooni,
ʉNkʉlʉdeeva ʉntsila vʉsililo,
ʉvɨ ʉvʉswe navukʉmbona,
ikange nivoneka,
ʉNgʉlʉve ʉvɨ alɨ jyʉjwa mwene.
Ameni.
ɄPaulo ikʉndagɨla ʉTimoti ʉkwibata indagɨlo
18 Mwana vango Timoti,
ʉlʉlagɨlo ʉlwa ʉlwʉ ndikʉkʉpa,
lulɨngʼaana na mamenyu ga vʉtengʉlɨlo ga malago ʉgwʉ gaatsovilwe kʉ nongwa jyave.
Amamenyu ago gakʉtange ʉkʉvomba ɨmbombo jya Ngʉlʉve nda vʉkʉvonage ʉvʉtalamu ʉvʉveetsaga.
Ʉveetsage ʉta ntengaligoha ʉnnonu ʉvɨ itenga ɨligoha ndalɨve litalamu ndeeti.
19 Wiibatɨlɨle ʉlwɨdɨko nʉ kʉva nʉ lwɨvonelo ʉlʉnonu.
Avaanu avange navivɨɨkɨla ntɨma ʉkʉvomba galya ʉgwʉ vagamanyile ʉkʉta ga jɨlweli.
Ɨkulongwi ɨjyo jɨvapelye vakʉleke ʉkʉmwɨdɨka ʉNgʉlʉve.
20 Mu nʼgati mu vaanu avo mwale ʉHimenayo,
c nʉ Alekisanda.
Avo ndɨndekye ʉSetano ʉkʉta vamanyiisiwe,
vɨlekelwe ʉkʉmʼbeda ʉNgʉlʉve.