Imanyiiso tsa nyɨsajo
2
1 Ɨlya mbʉlongolo mu gooni,
ndidoova mudoovelanilage kwa Ngʉlʉve.
Munʼdoovage ʉNgʉlʉve ʉkʉta,
avatangage nʉ kʉvasaja avaanu vooni.
Ikange,
munsaanage ʉNgʉlʉve pa vʉsumbe wa vaanu vooni.
2 Kʉnogye ʉkʉvadoovela avakʉlʉdeeva na vange vooni avanya vʉtavʉlɨlwa,
ʉkʉta tʉtaame mu lʉnotsehetso,
mu kʉnkonga ʉNgʉlʉve nʉ kʉva nʉ lʉgendo ʉlʉnonu.
3 Ago gwʉ manonu ʉgwʉ ʉNgʉlʉve ʉMpoki viitu gikʉmmovosa.
4 Ʉmwene inogwa avaanu vooni vapokwe nʉ kʉvʉmanya ʉwajɨlweli.
5 Tʉlʉmanyile ʉkʉta ago ga lweli,
pakʉva ʉNgʉlʉve alɨ mpamato,
ikange ʉva kʉvasajania avaanu nʉ Ngʉlʉve alɨ mpamato,
ʉjwa vɨ muunu ʉMesiya ʉYɨɨsʉ,
6 ʉvɨ ɨɨhʉmiitse ʉwʉʉmi wa mwene ʉkʉta avapoke avaanu vooni.
Ʉlʉ lwʉ lʉsimiilitso ʉlwʉ ʉNgʉlʉve aatʉpye mu nsɨkɨ ʉgwʉ aavɨɨkile.
7 Lola,
pa vʉsumbe wa kʉtsitsova itso,
ʉne ndyavɨɨkilwe ʉkʉva ndʉmbɨlɨli nʉ kʉva mpositili.
Nandinwangʼa,
nditsova itsa jɨlweli.
Ikange,
ndyavɨɨkilwe ʉkʉva mmanyisi va vaanu ʉwʉ vatava Vayahudi,
ʉkʉta ndɨpʉlɨsaage kʉ veene ɨkulongwi jya lwɨdɨko nʉ wajɨlweli.
8 Lɨno wʉ mulʉndamiine mukɨsaja,
ndinogwa ʉkʉta avagoosi wʉ vahʉʉsaage kʉkyanya amavoko,
vave vavalatse,
vɨsajage ikange valeke ʉkʉva nʉ lʉviipo evo ʉkʉkaningʼana.
9 Avadala naveene vaswalage vʉnonu ɨmisabwa,
vave vaanu va lʉgendo ʉlʉnonu.
Valeke ʉkʉnogwa ʉlwɨtotso ʉlwa kʉtiva inzwɨlɨ,
evo ʉlwa kʉswala isiinu isya kyʉma ni syʉ singʼalagadɨka,
evo ɨmisabwa ɨgya ntengo ʉmbaha.a
10 Apeene vave nʉ lʉgendo ʉlʉnonu,
ndʉwʉ kʉvanogye avadala ʉwʉ vikɨtsova ʉkʉta vikʉmwɨdɨka ʉNgʉlʉve.
11 Avadala vave vaanu avipʉlɨka viita ʉkwɨjisa ikange valɨ nyango ʉkʉmanyila imbombo inonu.
12 Nandikʉmpa ʉnʼdala ʉvʉtavʉlɨlwa wa kʉmanyiisa nʉ wa kʉlongotsa ʉnʼgoosi.
Apeene ave ipʉlɨka,
13 ʉlwakʉva ʉNgʉlʉve aatalile ʉkʉmpela ʉAdamu,
kʉmbele pwʉ akampela ʉEva.
14 Ikange ʉAdamu naasongwe,
apeene ʉnʼdala vɨ mwene ʉvɨ aasongilwe,
akadeenya ʉlʉlagɨlo lwa Ngʉlʉve.b
15 Napeene,
ʉnʼdala ʉjwa na vadala avange valʉʉpɨlɨla ʉvʉpoki kʉ nzɨla jya kʉholwa ʉmwanac vangave vitaama mu lwɨdɨko,
mu lʉgano,
mu vʉvalatse nʉ kʉva nʉ lʉgendo ʉlʉnonu.