Indagɨlo kʉ valoleeli va kɨpʉga kya vɨɨdɨki
3
1 Ɨlɨ lyʉ limenyu lya lweli,
“Ʉmuunu ʉvɨ inogwa ɨmbombo ɨjya kʉva ndoleeli va kɨpʉga kya vɨɨdɨki,
vɨ ahalile ɨmbombo ɨnonu.”
2 Pwʉ lɨno,
wɨgane wa Ngʉlʉve ʉkʉta ʉndoleeli va kɨpʉga kya vɨɨdɨki,
ave muunu ʉvɨ nitsowa ʉvʉviivi,
ʉvɨ atava ndigu,
a ʉvikɨtʉga ikange ʉnya lʉhala lwa vʉmuunu,
ʉmuunu va lʉgendo ʉlʉnonu,
ʉmwipa,
nʉ vɨ akɨmanyile ʉkʉmanyiisa.
3 Akʉleke ʉkʉva nʼgaatsi,
akʉleke ʉkʉva nkali nakʉ kʉva nɨ mbatsa,
ave inʼdeke.
Ikange aleke ʉkʉva nʉ vʉnogwe ʉvʉviivi wa ndalama.
4 Ave muunu ʉvɨ ikwɨmɨɨlɨla vʉnonu ɨnyumba jya mwene,
ʉvɨ akɨmanyile ʉkʉmanyiisa avaana va mwene ʉlʉgendo ʉlʉnonu,
ikange naveene vikʉmpʉlɨka.
5 Kwʉ kʉta,
ʉmuunu ʉvɨ ilemwa ʉkwɨmɨɨlɨla ɨnyumba jya mwene jyʉmwene,
ikʉlʉmanya ndeeti ʉkwɨmɨɨlɨla ʉmpelela gwa Ngʉlʉve?
6 Ikange,
aleke ʉkʉva muunu ʉvɨ ingye mu Vʉkɨlɨsiti lɨlɨno,
pakʉva jiigela ikɨtotsa.
Ʉkwɨtotsa ʉkwa kukʉmpelela ʉkwingila mu vʉhɨgi ndʉwʉ aahɨgilwe ʉSetano.
7 Ʉpiita,
ave muunu ʉvɨ itsowa inonu nakʉ kʉ vanyapanzi,
pakʉta aleke ʉkʉtsowa sivi nʉ kʉgwɨla mu ntego gwa Setano.
Indagɨlo kʉ vatangɨli na valoleeli
8 Naveene avatangɨli vaveetsage vɨɨmɨkiwa,
ikange vagolosu,
valeke ʉkʉva vagaatsi,
valeke ʉkʉva nʉ vʉnogwe ʉvʉviivi ʉwa kyʉma.
9 Ʉpiita,
vave vaanu ʉwʉ vikwibatɨlɨla nɨ numbula ɨmbalasu ɨlweli jya Ngʉlʉve,
ɨjyʉ ʉwe twɨ vooni tukʉjyɨdɨka.
10 Naveene ava vatale vagelwe taasi,
kʉmbele vangavoneke ʉkʉta vagolosu,
pwʉ vavombage ɨmbombo ɨjyo.
11 Avadala va veene vave vaanu avikwɨmɨkiwa,
avatava vanuasi,
avikɨtʉga,
ikange vahʉʉgʉ kʉ tsyoni.
12 Avatangɨli vɨlekelwe ʉkʉva valigu,
b ʉpiita vave vaanu ʉwʉ vikwɨmɨɨlɨla vʉnonu avaana va veene natsi nyumba tsa veene.
13 Avivomba vʉnonu ɨmbombo jya vʉtangɨli vɨɨmɨkiwaagwe.
Apo viiva na maka ʉkʉvavʉʉla avaanu ɨkulongwi jya lwɨdɨko lwitu mwa Mesiya ʉYɨɨsʉ.
Ʉwajɨlweli wa lwɨdɨko
14 Ndɨkʉvɨgye amamenyu ago,
kʉnʉ ndihʉʉvɨla ʉkwitsa ʉne kwave mu nsɨkɨ ʉnsupi ʉgukwitsa.
15 Ndɨngave ndisuvalɨla ʉkwitsa,
ʉvʉsumbe wa kʉkʉvɨgɨla wʉ ʉvʉ,
ʉtsimanye itsʉ tsilondwa ʉkʉvombwa mu mpelela gwa Ngʉlʉve,
ʉgwʉ ʉgwene kyʉ kɨpʉga kya vɨɨdɨki va Ngʉlʉve ʉvɨ mwʉmi,
ngʼotsi ikange waalo wa lweli.c
16 Tsa jɨlweli,
ʉNgʉlʉve avoniitse imbaha siitso,
natsyene tsʉ itsi:
ɄNgʉlʉve akɨvonia mu mmana,
akatsowa nʉ Mepo ʉkʉta inʼgolosu,
akɨvonia kʉ vasuungʼwa,
akalʉmbɨlɨlwa mu sivʉmbʉkʉ syoni,
avaanu va mu kɨlʉnga vakamwɨdɨka,
akatoolwa ʉkʉbɨha kʉkyanya mu wɨɨmɨkiwa.