Avamanyisi va vʉnuasi
4
1 ɄMepo itsova kɨtsila kʉsiha ʉkʉta,
isigono isya kʉ vʉsililo avange valɨlekelwa ʉkʉkonga ʉwajɨlweli wa lwɨdɨko.
Aveene valakongaga imepo itsa vʉnuasi,
ni manyiiso tsa masetano.
2 Avaanu avimanyiisa itso vasyovi,
ikange vanuasi ʉwʉ inyɨvonelo tsa veene tsisue.
3 Avo vikʉvasiga avaanu vɨlekelwe ʉkʉtoolana,
evo ʉkʉlya isiinu isinge,
isyʉ ʉNgʉlʉve nasyene aasipelelile ʉkʉta,
avɨɨdɨki vasyʉpɨlɨle nʉ kʉsaana ʉlwakʉva vavʉmanyile ʉwajɨlweli.
4 Isipeliwa syoni sya Ngʉlʉve sinonu,
kwʉ baako ʉkʉbeela nɨkɨpamato,
ʉpiita syʉpɨlɨlwe nɨ numbula jya lʉsaano.
5 Ndʉwʉ ʉNgʉlʉve itsova mu limenyu lya mwene,
najyʉwe ʉmwʉ tukʉnsaanila ʉmwene mu nyɨsajo tsiitu,
isi sivonia ʉkʉta isipeliwa syoni sivalatsiiwe pamiiho ga Ngʉlʉve.
Ʉmbombi ʉnnonu ʉva Yɨɨsʉ Kɨlɨsiti
6 Ʉngave vukʉvapa avɨɨdɨki imanyiiso itsi,
apo pwʉ wiiva mbombi ʉnnonu ʉva Mesiya ʉYɨɨsʉ,
ikange wiiva ʉlelilwe vʉnonu mu wajɨlweli wa lwɨdɨko lwitu na mu manyiiso inonu itsʉ ʉve ʉtsikongile.
7 Ʉve waasilekile lwoni isitsaago isya vanyakatale isitsila lʉvʉmbʉlɨlo.
Lɨno mu misɨkɨ gyoni wɨtangage ʉkʉnkonga ʉNgʉlʉve.
8 Avaanu avange viita,
“Ʉkʉgʉtsoveletsa ʉmmana ʉkʉva na maka,
kʉlɨ lʉvʉmbʉlɨlo lʉdebe.
Ʉkwa kwʉ kʉgʉnywilitsa ʉmmana kwene.
Apeene,
ʉkwɨtsoveletsa ʉkʉnkonga ʉNgʉlʉve kʉlɨ nʉ lʉvʉmbʉlɨlo ʉkʉlʉtɨɨlɨla syoni.
Pakʉva ɨlɨ likʉtʉpa ʉlʉhʉʉvɨlo lwa kʉkava ʉwʉʉmi wa lɨno nʉ wʉ vukwitsa.”
9 Ɨlyo lyʉ limenyu lya lweli,
ɨlyʉ avaanu vakanogye valyʉpɨlɨle.
10 Ɨlyo lyʉ tʉsumbilwe,
ikange pa kʉvomba ndʉwʉ litsova,
tukɨkupila nʉ kʉvomba ɨmbombo nɨ nuguutila,
pakʉva tukʉmmʉʉvɨla ʉNgʉlʉve ʉvɨ mwʉmi,
ʉMpoki va vaanu vooni ʉwʉ vikʉmwɨdɨka.a
11 Itso tsʉ tsyene ʉnogye ʉkʉvamanyiisa nʉ kʉvalagɨla avɨɨdɨki ʉkʉta vatsikongage.
12 Ndajɨve avaanu vikʉkʉvona ʉkʉva ʉlɨ nʼdebe,
ʉleke ʉkwɨlekeletsa avaanu vakʉbede.
Ʉve ʉvombe na maka,
ʉveetsage kɨhwananitso kʉ vɨɨdɨki mu nzovele,
mu lʉgendo,
mu lʉgano,
mu lwɨdɨko na mu vʉgolosu.
13 Ʉgimbage ʉkʉvɨmbɨla avaanu ʉVʉvɨge ʉVʉvalatse,
ikange ʉvalʉmbɨlɨlage nʉ kʉvamanyiisa ʉkʉsika ʉpwʉ ndɨpya ndikwitsa.
14 Ʉlalekaga ʉkʉkɨvombela ɨkɨkʉngɨlwa ɨkyʉ ʉNgʉlʉve aakʉpye ʉkʉgendela mu mamenyu ga vanyamalago na kʉ nzɨla jya kʉvɨɨkɨlwa isivokob na vandyakoni.
15 Wɨkupilage ʉkʉvomba itso nɨ numbula jyako jyoni,
ʉkʉta mu wʉʉmi waako avaanu vooni vajɨvone ɨmbombo jyave.
16 Wɨloleele mu lʉgendo na mu manyiiso tsyako.
Ʉvombage ewo ʉnsɨkɨ gwoni,
pakʉva wʉ vuvomba itso vuponia ʉwʉʉmi waako nʉ wa vaanu avikʉkʉpʉlɨhɨtsa.