Indagɨlo kʉ sipʉga isilɨ mu mpelela
5
1-2 Ʉleke ʉkʉntanila ʉnzagɨla,
pakʉnogye ʉtsove nave ndʉ mmotsi vaako.
Avadebe ʉtsovage navo nda valʉkololwo.
Avahɨnza naveene,
vooni ʉvavombelage vʉnonu nda vahaatsavo.
3 Ʉvavʉʉle avɨɨdɨki ʉkʉta,
vavatangage avadala avaswɨle avatsila lʉtangɨlo.
4 Napeene,
ʉnswɨle ʉvaveetsaga ʉvɨ alɨ na vaana ndajɨve vitsʉkʉlʉ,
avo vɨmanyiise taasi ʉkʉvomba mu nyumba tsa veene itsinogye pamiiho ga Ngʉlʉve.
Vavapeetsage isiinu isyʉ valɨ vʉvʉle avahotsi va veene,
ʉkwa kwʉ kʉkilivula itsʉ naveene avahotsi vaavavombye.
Ʉkʉvomba ndavʉle kwʉ kwene ʉNgʉlʉve inogwa.
5 Ʉnʼdala ʉnswɨle ʉvɨ intsila nʉ muunu ʉva kʉntanga,
ʉjwa ikʉmmʉʉvɨla ʉNgʉlʉve,
ikɨsaja nʉ kʉdoova ʉlʉtangɨlo kwa Ngʉlʉve pakɨlo na pamuunyi.
6 Napeene,
ʉnʼdala ʉnswɨle ʉvɨ inogwa ʉvʉnogwe wa mu kɨlʉnga,
ʉjwa asue ndajɨve ivoneka mwʉmi.
7 Natsyene itso ʉvalagɨle avɨɨdɨki tsʉ vavombage pakʉta valeke ʉkʉtsowa ʉvʉviivi.
8 Pwʉ ʉmuunu ʉvaveetsaga ʉvɨ nikʉvatanga avaanu va mwene,
siitso ava mu nyumba jya mwene,
ʉjwa iveetsaga alʉlekile ʉlwɨdɨko,
ikange iveetsaga imbiivi ʉkʉlʉtɨɨlɨla avanyapanzi.
9 Ʉnswɨle anogye ʉkʉva mu lʉvaatɨko lwa vaswɨle,
angave alɨ nɨ myaka ʉkʉtengʉla isitsigo ntanato (60),
ikange ʉvɨ atava ndigu.a
10 Ʉvɨ itsowa ʉvʉnonu,
ndʉʉvʉ:
Ave alelile avaana va mwene vʉnonu,
avʉʉpɨlye avahenza na vɨɨdɨki,
avatangile ʉwʉ vikʉvɨlwa,
ikange avombile imbombo tsyoni inonu.
11 Naveene avaswɨle avasaala,
ʉleke ʉkʉvʉʉpɨlɨla mu lʉvaatɨko,
ʉlwakʉva ʉvʉnogwe wa mmana vukʉvalema ʉkʉlʉtɨɨlɨla ʉkwɨhʉmya kwa Kɨlɨsiti,
apo vinogwagwa ʉkʉtoolwa.
12 Mwɨlyo viiva vikɨjingitsa mu vʉhɨgi,
ʉlwakʉva valʉlekile ʉlwɨjyɨgo lwa veene kwa Kɨlɨsiti,
ʉlwa kʉsigala kɨtsila kʉtoolwa ikange.
13 Paninie nɨɨlyo,
vimanyila ʉwoolo wʉ vigendagenda mu nyumba tsa vaanu.
Apo navimanyila itsa woolo weene,
vimanyila ni tsa vʉsongelengʼanie nʉ kwɨhanza mu mbombo tsa vange.
Pwʉ vivomba imbombo itsitava tsa veene nʉ kʉtsova itsʉ natsinogiili.
14 Lɨno,
ʉne ndinogwa avaswɨle avasaala,
vatoolwagwe,
vaholage avaana nʉ kʉloleela inyumba tsa veene,
ʉkʉta avalʉgʉ vɨlekelwe ʉkʉtʉtsova isivi.
15 Tutsowa isivi ʉlwakʉva avaswɨle avange vahambwike,
vikʉnkonga ʉSetano.
16 Ʉnʼdala ʉnya lwɨdɨko angave alɨ na vaswɨle mu nyumba jya mwene,
avatange ʉkʉta ʉmpelela gʉleke ʉkʉgagɨlwa.
Ʉve ʉvatangage avaswɨle avange avatsila nʉ lʉtangɨlo.
17 Avandyakoni avivomba imbombo vʉnonu,
vɨɨmɨkiwaagwe nʉ kʉhombwa vʉnonu,
b siitso ʉwʉ vikɨhʉmya ʉkʉlʉmbɨlɨla nʉ kʉmanyiisa,
18 manya jɨvɨgilwe mu Vʉvɨge ʉVʉvalatse ʉkʉta,
“Kwʉ baako ʉkʉjɨkʉnga ɨsenga ʉndomo wʉ jisegeja ɨngano pa kɨkʉvatɨlo.”
c Ikange lɨvɨgilwe,
“Ʉmbombi anogye ʉkʉhombwa ʉlʉhombo lwa mwene.”d
19 Ʉleke ʉkwɨdɨka amamenyu amaviivi ʉgwʉ itsowa ʉndyakoni,
kɨtsila kʉpʉlɨka ʉkʉhʉma kʉ vaanu vavɨlɨ evo vadatu avalolile.
20 Vangave pwʉvale avandyakoni ʉwʉ vigendelela ʉkʉvomba imbiivi,
avo ʉvatanile wʉ valɨ pa vaanu vongosu,
ʉkʉta avange vadwade.
21 Ndikʉkʉlagɨla pamiiho ga Ngʉlʉve,
na pamiiho ga Mesiya ʉYɨɨsʉ na vasuungʼwa avahalwa ʉkʉta,
wiibate itso,
ʉleke ʉkʉhɨga ngʼaningʼaani kɨtsila kʉlʉmanya ɨkɨhoto evo ʉleke ʉkwɨma lʉvasu.
22 Ʉleke ʉkʉmwɨdɨka ngʼaningʼaani ʉkʉmwɨmɨka ʉmuunu mu mbombo jya Ntwa,
ʉlwakʉva ʉngambɨɨke ʉmuunu ʉnnangi mu mbombo,
najyʉve wiiva ʉhangile ʉvʉtulanongwa wa mwene.
Ʉve ʉloleele ʉwʉʉmi waako,
ʉtaamage inʼgolosu.
23 Ʉkʉtengʉla lɨno,
ʉleke ʉkʉnywa amagasi geene,
panogye ʉnywetsage nɨ divaie ndebe kʉ nongwa jya vʉtamu waako wa litumbu nʉ vʉtamu ʉvʉnge ʉwʉ vukʉkʉgatatsa nsɨkɨ na nsɨkɨ.
24 Ʉleke ʉkʉvɨɨdɨkɨla ngʼaningʼaani avaanu mu mbombo jya Ntwa,
ʉlwakʉva avaanu avange,
ʉvʉtulanongwa wa veene vʉlɨ pavʉvalasu,
vukʉvalongolela kʉ vʉhɨgi.
Napeene,
avaanu avange,
ʉvʉtulanongwa wa veene vʉsihiime,
vʉlavoneka kʉmbele.
25 Vʉvʉle vʉle,
imbombo inonu tsivoneka pavʉvalasu,
natsyene itsʉ tsisihiime,
jɨlweli,
tsilaava pavʉvalasu.