6
1 Avavanda vooni avɨɨdɨki,
vɨjisaage kʉ vatwa va veene,
pwʉ ɨlitaawa lya Ngʉlʉve ni manyiiso tsiitu tsileke ʉkʉbedwa.
2 Avavanda ʉwʉ avatwa va veene vɨɨdɨki,
vɨlekelwe ʉkʉvabeda ʉlwakʉva valɨ kɨpʉga kɨpamato.
Peene vanogye ʉkʉvavombela vʉnonu nʉ kʉlʉtɨɨlɨla.
Kʉ nzɨla ɨjyo viiva vikʉvatanga avajyavo mu lwɨdɨko,
ikange avo vagane va veene.
Itso ʉvamanyiise nʉ kʉsimiilitsa.
Imanyiiso itsa vʉnuasi nʉ vʉmosu wa lweli
3 Pwʉvale avaanu ʉwʉ vimanyiisa imanyiiso itsa vʉnuasi.
Ʉgwʉ vimanyiisa nagikwɨdɨngʼana na mamenyu aganya wʉʉmi ga Ntwa viitu ʉYɨɨsʉ Kɨlɨsiti,
ikange nagikwɨdɨngʼana nʉ kʉnkonga ʉNgʉlʉve.
4 Avo vadɨgile ʉlwɨginio,
ikange navakɨmanyili kɨɨnu.
Avaanu avo vinogwa ʉkwʉmɨɨlɨla mu lʉkaani lwa tʉmenyu ʉtʉdebe ʉtʉtsila nʉ lʉvʉmbʉlɨlo.
Mwɨlyo kihʉmɨla ɨkɨvini,
imbatsa,
amadʉsi,
ʉlʉdwado,
5 ikange isigono syoni ginanga ʉkʉpʉlɨngʼana.
Avaanu avo vavejangiike ʉlʉhala,
vadumukiilwe ɨlweli.
Visaaga viita ʉkʉnkonga ʉNgʉlʉve jyʉ nzɨla jya kʉkavɨla ɨkyʉma.
6 Ʉkʉva nɨ kyʉma lʉvʉmbʉlɨlo,
apeene ʉmuunu iveetsaga nʉ lʉvʉmbʉlɨlo ʉlʉlʉti,
ʉpwʉ ikʉnkonga ʉNgʉlʉve ikange ikwɨlanila ni siinu isyʉ alɨ nasyo.
7 Ʉlwakʉva mu kɨlʉnga ɨkɨ natwitse nɨ kɨɨnu,
ikange natʉkahege nɨ kɨɨnu.
8 Apeene tʉngave nɨ kyakʉlya ni sya kʉswala tʉkwɨlanile niisyo.
9 Aveene ʉwʉ valɨ nʉ vʉnogwe wa kʉva vamosu viigwa mu lʉgelo,
ikange vigwɨla mu mitego na mu vʉnogwe wa vʉtsimu ʉwʉ vukʉvoongometsa.
Ʉwa vukʉvapelela ʉkʉgatatsiwa siitso,
10 ʉlwakʉva ʉkʉtsigana siitso indalama wʉ vʉtengʉlɨlo wa vʉviivi wongosu.
Avange vanogilwe itso,
vasyovilwe,
valʉlekile ʉlwɨdɨko,
valɨ mu vʉkʉvɨlwa ʉvʉlʉti ndʉ muunu ʉvɨ ikɨhoma nʉ mmaage.
Ʉlʉpavɨlo lwa vʉmalɨlo kwa Timoti
11 Apeene ʉve vɨ muunu va Ngʉlʉve,
ʉtsikɨmbɨlage itso.
Ʉkonge ʉvʉgolosu,
ʉnkonge ʉNgʉlʉve,
ikange ʉkonge ʉlwɨdɨko,
ʉlʉgano,
ʉlwɨjʉmɨɨlɨtso nʉ vʉdeke.
12 Ʉgimbage ʉkʉnkonga ʉNgʉlʉve ndakʉve kʉtalamu ndeeti,
pa vʉsumbe wa kwibatɨlɨla ʉwʉʉmi ʉvʉtsila kʉsila.
Ʉwa wʉ weene wɨɨlangɨliilwe palya ʉpwʉ wɨɨdiike pamiiho ga vaanu vongosu avaalolile.
13 Ndikʉkʉlagɨla pamiiho ga Ngʉlʉve ʉvɨ ikʉsivɨɨka syʉmi isiinu syoni,
na pamiiho ga Mesiya ʉYɨɨsʉ,
ʉvɨ aatsovile ʉwooleletsi wa lweli pamiiho ga Pontiyo Pilato,a
14 ndiita,
wiibatɨlɨle indagɨlo itso vʉnonu,
ʉveetsage nʼgolosu ʉkʉsika ʉpwʉ alaava ikwitsa ʉNtwa viitu ʉYɨɨsʉ Kɨlɨsiti.
15 Ʉkwitsa kwa mwene kʉlaava ʉnsɨkɨ ʉgwʉ agʉvaatiike ʉNgʉlʉve ʉvɨ ikwɨmɨkiwa,
ʉNyamaka mpamato jyʉjwa mwene,
ʉNkʉlʉdeeva va vakʉlʉdeeva,
ikange ʉNtwa va vatwa.
16 Ʉjwa vɨ mwene ʉvɨ ʉvʉswe navʉlambone,
ataamile mu lʉmuli ʉlwʉ ʉmuunu ilemwa ʉkʉhegelela.
Ikange nakʉli ʉmuunu ʉvɨ ambwene,
pange ʉvɨ anogye ʉkʉmbona.
Ʉlwɨmɨko na maka alɨ nasyo sikutsooni!
Ameni.
17 Ʉvavʉʉle avamosu vɨlekelwe ʉkwɨginia,
pange ʉkʉhʉʉvɨla ʉvʉmosu wa veene ʉwa mu kɨlʉnga ɨkɨ,
ʉwʉ navalʉmanyili wisila ndali.
Apeene vammʉʉvɨlage ʉNgʉlʉve ʉvɨ ikʉtʉpa isiinu syoni mu wiipa wa mwene,
ʉkʉta sitʉpelelage ʉlʉhekelo.
18 Ikange ʉvavʉʉle vavombage inonu,
pwʉ vave vamosu mu mbombo inonu ndʉwʉ valɨvo avange avamosu va siinu.
Vaveetsage viipa nʉ kʉhanga na vange ɨkyʉma kya veene.
19 Ʉkʉvomba imbombo inonu itso,
kʉlɨ ndʉ kʉvɨɨka mu kɨbaana isiinu isya kʉvatanga kʉ nsɨkɨ ʉgʉpya gukwitsa.
Ʉkwa kwʉ kwɨtsengela ʉwaalo ʉvʉkangasu kʉ sigono isyʉ sikwitsa.
Apo pwʉ valʉʉpɨlɨla ʉwʉʉmi wa jɨlweli.
20 Timoti,
loleela vʉnonu ʉwajɨlweli ʉwʉ ʉpeevilwe.
Ʉleke ʉkwɨjingitsa mu mamenyu ʉgwʉ gatava ga Ntwa amatsila nʉ lʉvʉmbʉlɨlo ni ngʼaani itsa vʉtsimu,
itsʉ avange vatye wʉ vʉmanyi.
21 Avaanu avitsova ʉkʉta valɨ nʉ vʉmanyi ʉwa,
avo valʉlekile ʉlwɨdɨko lwa veene.
Ʉlʉhʉngʉ lwa Ntwa lʉveetsage paninie nʉʉnyie.