Ʉvʉsumbe wa nyɨsajo
3
1 Lɨno,
apa pa vʉmalɨlo mwe vɨɨdɨkivajiitu,
mutʉdoovelage pakʉta ikulongwi tsa Ntwa itsʉ tulʉmbɨlɨla tsigendelelage nʉ kʉvaala ngʼaningʼaani nʉ kwʉpɨlɨlwa mu lwɨmɨko kʉ vaanu avange ndʉwʉ jɨlɨwo kwanyie.
2 Kange mutʉdoovelage kwa Ngʉlʉve ʉkʉta atʉpoke kʉ vaanu avalʉgʉ.
Twitsova ewo ʉlwakʉva avaanu avo paninie na vange navikʉjyɨdɨka ɨkulongwi jya Yɨɨsʉ Kɨlɨsiti.
3 Paninie nɨɨlyo ʉNtwa ʉYɨɨsʉ igendelela isigono syoni ʉkʉvomba tsilya itsʉ aatsovile.
Ʉmwene vɨ jiikʉvanywilitsa ʉnyie nʉ kʉvaloleela kʉ ntavangwa ʉSetano.
4 Tʉlʉmanyile ʉkʉta ʉNtwa ikʉvapa ʉnyie amaka ga kʉvomba itsʉ tʉvalagye,
nʉ kʉta mu nsɨkɨ ʉgukwitsa jʉmugendelelaga ʉkʉvomba itso.
5 Ʉmwene atsilongotsaage inumbula tsiinyo tsilʉmanye vʉnonu ʉkʉta ʉNgʉlʉve avaganile.
Avatange muve nʉ lwɨjʉmɨɨlɨtso ʉlwʉ aale nalwo ʉKɨlɨsiti.
Ɨlivʉngʉ kʉ vaanu avitaama kɨtsila kʉvomba imbombo
6 Mwe vɨɨdɨkivajiitu,
tukʉvalagɨla mu litaawa lya Ntwa ʉYɨɨsʉ Kɨlɨsiti ʉkʉta,
mulekengʼane na vɨɨdɨki vooni avoolo ʉwʉ navikonga imanyiiso itsʉ twavapye.
7 Ʉnyie mulʉmanyile ʉkʉta pavanogye mukongage ɨkɨhwananitso kyawe,
manya wʉ tutaama kwanyie natwale voolo.
8 Ʉwe natwalitsage ɨkyakʉlya kya muunu kɨtsila kʉhomba.
Apeene twavombaga imbombo kʉ maka nʉ vʉpala siitso pakɨlo na pamuunyi pakʉta tʉleke ʉkʉva ntsigo kʉ muunu ʉvaveetsaga ʉva kwanyie.
9 Apo ʉpwʉ twavombaga ewo,
nakwʉ kʉta natwale nʉ vʉtavʉlɨlwa wa kʉtangwa nʉʉnyie.
Apeene twavombaga ewo pakʉta tʉve kɨmanyilo kwanyie,
10 manya wʉ tʉlɨ paninie nʉʉnyie,
twavavʉʉlaga ʉkʉta,
“Ʉmuunu ʉvaveetsaga ʉvɨ ninogwa ʉkʉvomba imbombo,
kwʉ baako ʉkʉlya.”
11 Twitsova amamenyu aga ʉlwakʉva tʉpʉliike ʉkʉta,
kwʉvale avaanu vaninie kwanyie avoolo.
Navivomba kɨɨnu kɨninie,
apeene vikwingilila imbombo tsa vaanu avange nʉ kʉvapelela valemwagwe ʉkʉvomba vʉnonu.
12 Tukʉvalagɨla avaanu avo mu litaawa lya Ntwa ʉYɨɨsʉ Kɨlɨsiti twita vanywilile,
vavombage imbombo tsa veene,
pakʉta vaveetsage nɨ kyakʉlya kya veene.
13 Lɨno,
ʉnyie nyɨ vɨɨdɨkivajiitu nyɨ vange,
twita mulagatalaga ʉkʉvomba inonu.
14 Jɨngave kwale ʉmuunu ʉvaveetsaga ʉvɨ nivɨɨkɨla ʉntɨma amamenyu aga ʉgwʉ tʉvavɨgye mu kalata ɨjɨ,
ʉmuunu ʉjwa mwɨlolelage nave.
Muleke ʉkwɨhanza nave pakʉta avonage soni.
15 Paninie nɨɨlyo,
muleke ʉkʉmbona ʉta indʉgʉ,
apeene mumbʉngage ndʉ mwɨdɨkinʼjiinyo.
Amamenyu ga kwɨlaga
16 Lɨno,
ʉNtwa ʉYɨɨsʉ jyʉmwene ʉvikʉtʉpa ʉlʉnotsehetso vɨ avapeetsage ʉnyie ʉlʉnotsehetso isigono syoni,
kʉ tsyoni itsihʉmilaga.
ɄNtwa ave paninie nʉʉnyie nyɨ vooni.
17 Ʉne ndɨ Paulo neene ndivɨga ʉlʉpembetso ʉlʉ nɨ kɨvoko kyango jyʉne.
Ɨkɨ kyʉ kɨmanyilo mu kalata tsyango tsyoni,
wʉ ndivɨga ewo.
18 Ʉlʉhʉngʉ lwa Ntwa viitu ʉYɨɨsʉ Kɨlɨsiti,
lʉveetsage paninie nʉʉnyie nyɨ vooni.