Itsilahʉmɨla pa nsɨkɨ ʉgwʉ alakilivuka ʉYɨɨsʉ
2
1 Lɨno,
mwe vɨɨdɨkivajiitu,
tukʉvavɨgɨla ikulongwi tsa kwitsa kwa Ntwa viitu ʉYɨɨsʉ Kɨlɨsiti nʉ mwʉ jɨlaveela ʉpwʉ tʉlalʉndamana paninie pa kwaganila nave.
Tukʉvavʉʉla ʉnyie,
2 mulakenyemukaga mu numbula tsiinyo,
pange muladwadaga pa kulongwi jya malago maninie,
evo ɨlimenyu lininie,
pange kalata ɨjyʉ viita jɨhʉmile kwawe,
isitsova ʉkʉta ɨkɨgono kya kwitsa kwa Ntwa kɨsiike.
3 Muleke ʉkwɨdɨka ʉkʉta ʉmuunu avasyove ʉnyie pa kɨveetsaga,
ʉlwakʉva ɨkɨgono ɨkyo nakɨlatale ʉkwitsa kɨtsila kʉhʉmɨla taasi avaanu avalamʼbeelaga nʉ kʉnʼdʉka ʉNgʉlʉve,
nʉ kʉvoneka kwa muunu ʉntavangwa ʉvɨ kʉ vʉmalɨlo aloongometswa.
4 Ʉmuunu ʉntavangwa ʉjwa alamʼbedaga ʉNgʉlʉve ikange aladumulila isiveetsaga isyʉ avaanu vikɨsaja.
Ʉmwene alɨvɨɨka ʉkʉva vɨ mbaha kʉ syoni isyo.
Kange alavɨɨka ʉvʉtaamo wa mwene pa Vʉtaamo ʉVʉvalatse wa Ngʉlʉveab nʉ kʉvavʉʉla avaanu ʉkʉta ʉmwene vɨ Ngʉlʉve.
5 Ndeeti,
namukʉmbʉka ʉkʉta palya ʉpwʉ ndyale paninie nʉʉnyie ndyavavʉʉlaga ikulongwi itsi?
6 Mu nsɨkɨ ʉgʉ pwʉkɨle ɨkɨɨnu ɨkikʉnsiga ʉjwa aleke ʉkʉvoneka.
Ʉnyie mukɨmanyile ɨkɨɨnu ɨkyo.
ɄNgʉlʉve vɨ alambonia ʉmuunu ʉntavangwa ʉjwa pa nsɨkɨ gwa mwene ʉgʉnogelanie.
7 Paninie nɨɨlyo,
mu nsɨkɨ ʉgʉ ʉmuunu ʉntavangwa ʉjwa atengwe ivomba imbombo tsa mwene kʉnʉ ikwʉvɨɨlɨla,
ikange jiigendelela ʉkʉleka ʉkʉvoneka ʉkʉsikila pa nsɨkɨ ʉgwʉ alahetsiwa ʉvikʉnsiga.
8 Wʉ ahetsiiwe ʉvikʉnsiga,
pwʉ peene alavoneka ʉntavangwa ʉjwa.
Napeene,
ʉNtwa ʉYɨɨsʉ alaava ikwitsa alamʼbuda nʉ lʉkooto,
nʉ kʉmbejanga nɨ lilangamuli lya mwene ɨlɨlavoneka ʉpwʉ aliitsa.
9 Pa nsɨkɨ ʉgwʉ alavoneka ʉntavangwa ʉjwa,
alaava na maka ga Setano nʉ kʉvomba isimanyilo ni sidego syongosu sya vʉnuasi.
10 Alavombaga ʉvʉviivi ʉvʉlɨ pongosu pa kʉvasyova avaanu avalɨ mu vʉjagi,
manya navaawʉʉpɨlɨle nʉ kʉvʉgana ʉwajɨlweli pakʉta vapokwe.
11 Ɨkɨ kyʉ mene ʉNgʉlʉve avalekile avaanu avo vavɨɨkwe mu maka ga vʉjagi,
pakʉta vɨɨdɨkage itsa vʉnuasi.
12 Avo vooni valahɨgwa,
manya navikwɨdɨka ʉwajɨlweli,
aveene vikʉvʉhovokela ʉvʉviivi.
Ʉkʉdʉlʉka nʉ kwibata imanyiiso
13 Lɨno ʉwe patʉnogye ʉkʉnsaana ʉNgʉlʉve isigono syoni pa kulongwi tsyanyie nyɨ vɨɨdɨkivajiitu nyɨ ʉNtwa avaganile.
Tukʉnsaana ʉlwakʉva aavahalile ʉkʉhʉma pa vʉtengʉlɨlo ʉkʉta mwʉpɨlɨle ʉvʉpoki kʉ nzɨla jya kʉvalatsiwa nʉ Mepo ʉMbalatse nʉ kwɨdɨka ʉwajɨlweli.
14 Pa vʉsumbe wa kʉta ɨlyo lɨve ewo,
ʉNgʉlʉve aavɨɨlangile ʉnyie kʉ nzɨla jya Livangɨli ɨlyʉ twalʉmbɨlye kwanyie.
Aanogilwe ʉkʉta najyʉnyie mwitse muhange ʉwɨɨmɨkiwa wa Ntwa viitu ʉYɨɨsʉ Kɨlɨsiti.
15 Lɨno,
mwe vɨɨdɨkivajiitu,
munywililage nʉ kwibata imanyiiso itsʉ mwʉʉpɨlye ʉkʉhʉma kwawe kʉ nzɨla jya mamenyu ʉgwʉ twatsovaga evo ʉgwʉ twavavɨgye mu kalata.