Ɨkalata jya vɨɨlɨ jya Paulo
kʉ Vatesalonike
Ʉlʉpembetso
1
1 Ʉne ndɨ Paulo paninie nʉ Silwania nʉ Timoti,
tukʉvavɨgɨla ʉnyie nyɨ vampelela gwa Ngʉlʉve ʉDadajiitu nʉ Ntwa ʉYɨɨsʉ Kɨlɨsiti,
nyɨ mutaama mu vʉtsenge ʉwa Tesalonike.
2 Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDadajiitu na kʉ Ntwa ʉYɨɨsʉ Kɨlɨsiti,
siveetsage nʉʉnyie.
Ʉvʉhɨgi wa Ngʉlʉve pa kɨgono kya kʉ vʉsililo
3 Mwe vɨɨdɨkivajiitu,
patʉnogye ʉkʉnsaana ʉNgʉlʉve isigono syoni pa kulongwi tsyanyie.
Tuvomba ewo ʉlwakʉva ʉlwɨdɨko lwinyo kwa Yɨɨsʉ nʉ kʉganana kwinyo kugendelela ʉkwongelela siitso.
4 Ɨkɨ kyʉ mene wʉ tʉlɨ mu mipelela gya Ngʉlʉve ɨgɨnge,
tukɨginihitsa ʉnyie.
Tukɨginihitsa ʉlwɨjʉmɨɨlɨtso nʉ lwɨdɨko lwinyo ʉlwʉ mulɨ nalwo ʉnsɨkɨ gwa vʉkʉvɨlwa nʉ vʉpala wooni ʉvukʉviitsila.
5 Ago gooni givonia ʉkʉta ʉvʉhɨgi wa Ngʉlʉve wa jɨlweli.
Mu vʉhɨgi ʉwa alavonia ʉkʉta ʉnyie munogelanie ʉkwingila mu Lʉdeeva lwa mwene,
ʉlwʉ lɨno mukʉvɨlwa pa kulongwi jya lwene.
6 ɄNgʉlʉve inʼgolosu,
ʉmwene vɨ alalʉmbɨla,
alavapa ʉvʉkʉvɨlwa avaanu avo avikʉvapelela ʉnyie ʉvʉkʉvɨlwa.
7 Ʉmwene alavagatalʉsa paninie nʉʉwe ʉnyie nyɨ mukʉvɨlwa lɨno.
Ago galahʉmɨla ʉnsɨkɨ ʉgwʉ ʉNtwa ʉYɨɨsʉ aliitsa mu lʉlimbo lwa mwoto ʉkʉhʉma kʉkyanya kwa Ngʉlʉve paninie na vasuungʼwa va mwene avanya maka.
8 Alavapa ʉlʉvʉngʉ avaanu valya avikʉmʼbeela ʉmwene,
ikange navikʉlɨkonga ɨLivangɨli lya Ntwa viitu ʉYɨɨsʉ Kɨlɨsiti.
9 Avo valapeewa ʉlʉvʉngʉ lwa lwongometso lwa sikutsooni.
Valataagwa kʉvʉtale nʉ Ntwa,
ikange valaava kʉvʉtale nʉ wɨɨmɨkiwa wa maka ga mwene.
10 Aga galahʉmɨla pa kɨgono kɨlya,
ʉpwʉ ʉNtwa ʉYɨɨsʉ aliitsa ʉkʉhʉma kʉkyanya kwa Ngʉlʉve.
Palya ʉpwʉ avaanu va mwene valanʼginia,
ikange vooni avamwɨdiike valadega siitso pa tsilya itsʉ avombile.
Lola,
ʉnyie najyʉnyie mulaava paninie navo ʉlwakʉva mutsyɨdiike ikulongwi tsilya itsʉ twavavʉʉlile.
ɄPaulo ikʉvadoovela aVatesalonike
11 Pa kulongwi itso,
tukʉvadoovela ʉnyie kwa Ngʉlʉve viitu isigono syoni.
Tukʉvadoovela ʉkʉta avatange mutaamage munogelanie mu nyɨlango jya mwene.
Kange tukʉvadoovela ʉkʉta avape amaka ga kʉvomba imbombo tsyoni inonu itsʉ munogwa ʉkʉvomba.
Avatange ʉkʉvomba galya ʉgwʉ ʉlwɨdɨko lwinyo kwa Yɨɨsʉ lukʉvapelela munogwagwe ʉkʉvomba.
12 Tukʉvadoovela ewo pakʉta avaanu valɨginiage ɨlitaawa lya Ntwa viitu ʉYɨɨsʉ wʉ vikʉgavona galya ʉgwʉ avombile kwanyie,
ikange najyʉnyie muginiwaagwe pa kulongwi jya mwene.
Aga givombekaga ʉkʉkongana nʉ lʉhʉngʉ lwa Ngʉlʉve viitu nʉ lwa Ntwa ʉYɨɨsʉ Kɨlɨsiti.