Mbombo tsa Vapositili
1
1 Lʉkololwango Tiofilo,
mu kɨtabu kyango kɨlya ɨkɨtatsi,
a ndyakʉvɨgye ikulongwi tsyoni itsʉ ʉYɨɨsʉ aavombaga nʉ kʉmanyiisa,
ʉkʉhʉma pa vʉtengʉlɨlo wa mbombo jya mwene,
2 ʉkʉsika pa kɨgono ɨkyʉ aatoolilwe ʉkʉbɨha kʉkyanya.
Wʉ akaanale ʉkʉhega aavavʉʉlile,
kʉ nzɨla jya Mepo ʉMbalatse,
avapositilib va mwene ʉwʉ aavahalile,
ʉmwʉ jʉvivombelaga imbombo.
3 Kʉ nsɨkɨ gwa sigono isitsigo sinni (40),
ʉkʉhʉma atsʉʉkage mu vʉswe,
aavavonekelaga avapositili valya kakongosu,
alɨkwɨvonia pavʉvalasu kʉ veene ʉkʉta ʉmwene mwʉmi.
Ikange alɨkʉvamanyiisa ikulongwi tsa Lʉdeeva lwa Ngʉlʉve.
4 Ɨkɨgono kɨpamato,
wʉ ʉYɨɨsʉ iilya paninie na vapositili va mwene,
akavalagɨla akata,
“Mulahegaga mu Yelusalemu,
apeene mupʉlɨkɨlage muumu,
ʉkʉsika ʉnsɨkɨ ʉgwʉ jʉmukwʉpɨlɨla ʉMepo ʉMbalatse ndʉwʉ ʉDaada vango aavahʉʉviitse ʉnyie ʉkʉta alavapa.
Ɨnyʉʉve ɨjyo jyʉ jyene najyʉne ndɨkajɨtsovaga.
5 ɄYohana aavootsaaga avaanu na magasi,
lɨno kʉ nsɨkɨ nsupi vʉvʉle ʉgukwitsa,
ʉnyie jʉmukwotsiwa nʉ Mepo ʉMbalatse.”c
ɄYɨɨsʉ itoga kʉkyanya kwa Ngʉlʉve
6 Wʉ avapositili valʉndamiine paninie nave,
vakambʉʉtsa vakata,
“Ndeeti,
Ntwa viitu,
ʉnsɨkɨ ʉgʉ gwʉ gwene jʉvukʉvakilivulila aVaisilahɨli ʉlʉdeeva lwa veene?”
7 Akavaanda akata,
“Nambombo jiinyo ʉkʉlʉmanya isigono nɨ misɨkɨ ɨgyavɨɨkile ʉNgʉlʉve mu vʉtavʉlɨlwa wa mwene.
8 Lɨno jʉmukwʉpɨlɨla amaka wʉ ʉMepo ʉMbalatse itsile kwanyie.
Pwʉ jʉmwiva vooleletsi va kʉvavʉʉla avaanu avange ikulongwi tsyango mu Yelusalemu,
mu mpandʉlʉd gwoni gwa Yuuda,
nʉ gwa Samaliya,
nʉ kʉtsisika kʉ vʉsililo wa kɨlʉnga.”
9 Wʉ ʉYɨɨsʉ amalile ʉkʉvavʉʉla itsi avapositili va mwene,
baaho akatoolwa pamiiho pa veene ʉkʉbɨha kʉkyanya.
Ɨlivɨngo lɨkanʼgubikila,
navaambone ikange.
10 Wʉ vatsiige vilola kʉkyanya wʉ itoga,
lola,
ʉnsɨkɨ gʉʉgwa vakɨɨma baaho pawiipi na veene avagoosie vavɨlɨ ʉwʉ vaaswalile ɨmisabwa ɨmivalasu.
11 Vakata,
“Nyɨ vagoosi va mu Galilaya ʉnyie,
kɨki mwɨmile apa mwilola kʉkyanya?
ɄYɨɨsʉ ʉjʉ ʉvɨ atoolilwe kwanyie ʉkʉbɨha kʉkyanya,
ndʉwʉ mumbwene wʉ itoga,
vʉvʉle vʉle wʉ jɨlaava wʉ ikilivuka.”
Amataawa kɨtsigo nɨ lipamato ga vapositili
12 Pwʉ avapositili vakahega pa kɨdugala ɨkyatambʉlwagwa Mizeituni,
vakakilivuka mu vʉtsenge wa Yelusalemu,
ʉwaale wa lʉgendo lʉsupif ʉkʉhʉma pa kɨdugala ɨkyo.
13 Wʉ vingye mu vʉtsenge,
vakalʉta kʉ nyumba,
vakatsikwingila kʉ kɨjumba kya kʉkyanya ʉmwʉ vaataamaga kʉ nsɨkɨ.
Avapositili avo vaale wʉ ava:
ʉPetulo,
ʉYohana,
ʉYakobo,
ʉAndeleya,
ʉFilipo,
ʉTomasi,
ʉBatulumayo,
ʉMataayo,
ʉYakobo ʉmwana va Alufayo,
ʉSimoni Nʼzelote,
g nʉ Yuuda ʉmwana va Yakobo.
14 Vooni avo vaalʉndamanaga pa kʉnʼdoova ʉNgʉlʉve.
Paninie navo vaalemwo ʉMaliyamu ʉvanyina va Yɨɨsʉ,
avadala avange,
na vanunaave va Yɨɨsʉ.
ɄMatiya ihalwa apyanile pa Yuuda
15 Ɨkɨgono kɨpamato,
avɨɨdɨki va Yɨɨsʉ vakalʉndamana paninie.
Ɨmbalɨlo jya veene jyale ʉta avaanu ʉndeevʉlʉ mpamato ni sitsigo sivɨlɨ (120).
Pwʉ ʉPetulo akɨɨma pagati pa veene,
16 akavavʉʉla akata,
“Mwe vɨɨdɨkivajyango,
ikulongwi itsyavɨgilwe mu Vʉvɨge ʉVʉvalatse pa kulongwi jya Yuuda,
tsyale tsa kʉvombeka.
Itso tsyatsovilwe nʉ Mepo ʉMbalatse kʉ nzɨla jya ndomo gwa kʉkʉjiitu ʉDavʉdi.
ɄYuuda vɨ mwene ʉvɨ aavalongwitse avaanu valya ʉwʉ vaamwibiite ʉYɨɨsʉ,
17 nʉpwʉ jɨngave aale nʉʉwe twɨ vapositili,
ikange twavombaga ɨmbombo paninie nave.”
18 Wʉ ʉpɨlye indalama tsa vʉhendami,
akagʉlɨla ɨkɨlɨmɨla.
Mu kɨlɨmɨla ɨkyo mwʉ aague kɨvʉgudamo,
ɨlitumbu lɨkapwejʉka,
ʉvʉtumbu wooni vʉkahamba paasi.
19 Ɨkulongwi ɨjyo jɨkamanyikika kʉ vaanu vooni ʉwʉ vaataamaga mu Yelusalemu.
Ɨkɨlɨmɨla kɨlya valɨkʉkɨtambʉla ɨlitaawa lya Akeludama mu nzovele jya veeneh kwʉ kʉta,
ɨKɨlɨmɨla kya Nkisa.
20 ɄPetulo akagendelela ʉkʉtsova akata,
“Mu kɨtabu kya Zabuli jɨvɨgilwe ʉkʉta,
‘Ɨnyumba jya mwene jɨlaava nzila muunu,
nalasigale ʉmuunu ʉvaveetsaga mu nʼgati mu jyene.’
i
“Kange jɨvɨgilwe ʉkʉta,
‘Ɨmbombo jya mwene jya vʉlongotsi apyanile ʉmuunu ʉjyʉnge.’j
21-22 “Pa kulongwi ɨjyo,
panogye avepwo ʉnʼgoosi ʉjyʉnge mpamato ʉvɨ jiigendaga paninie nʉʉwe mu mbombo.
Ʉmuunu ʉjwa ave va kwolela ʉkʉta ʉNtwa viitu ʉYɨɨsʉ atsʉʉkile mu vaswe.
Kange ʉmuunu ʉjwa,
anogye ave mpamato mu vaanu ava avakaale paninie nʉʉwe ʉnsɨkɨ gwoni ʉgwʉ tʉkankongaga ʉNtwa ʉYɨɨsʉ.
Ave aalepwo ʉkʉhʉma ʉnsɨkɨ ʉgwʉ ʉYɨɨsʉ ootsiiwe nʉ Yohana,
ʉkʉsika pa kɨgono kɨlya ɨkyʉ akatoolilwe kwawe ʉkʉtoga kʉkyanya kwa Ngʉlʉve.”
23 Pwʉ avaanu avo vakɨɨmya amataawa ga vagoosi vavɨlɨ.
Mpamato aale vɨ Yusufu ʉvɨ amataawa agange gavɨlɨ aatambʉlwagwa Balusaba,
ɨlɨnge aale vɨ Yusito.
Ʉmuunu va vɨɨlɨ aatambʉlwagwa Matiya.
24 Pwʉ vakanʼdoova ʉNgʉlʉve vakata,
“Ʉve vɨ Ntwa,
ʉgamanyile agalɨ nʼgati mu numbula tsa vaanu vooni.
Lɨno,
ʉtʉvonie ʉlya ʉvɨ ʉmmalile mwava vavɨlɨ,
25 pakʉta apyanile pa mbombo jya vʉpositili ɨjyʉ ʉYuuda ajɨlekile,
asue,
alʉtile apoonu apahwaniine nitsakavombile.”
26 Pwʉ vakalagʉlɨla mu sigelelo sya veenek pa vaanu vavɨlɨ avo.
Akahalwa ʉMatiya,
vɨ akava paninie na vapositili avange valya kɨtsigo nʉ mpamato (11).