Ʉkʉva nʉ lwɨjʉmɨɨlɨtso mu mbombo jya Ngʉlʉve
2
1 Lɨno ʉve mwana vango,
ʉveetsage na maka mu nzɨla jya lʉhʉngʉ lwa Mesiya ʉYɨɨsʉ.
2 Ʉpʉliike ʉgwʉ ndɨkamanyiisaaga pamiiho ga vaanu avaloli vongosu,
lɨno ago ʉvapeetsage avaanu avihʉʉvɨlwa ʉwʉ vakɨmanyile ʉkʉvamanyiisa avange.
3 Wɨjʉmɨɨlɨtse mu vʉkʉvɨlwa paninie nʉʉne,
ʉkwa kwʉ kʉva nsikali nnonu va Mesiya ʉYɨɨsʉ.
4 Ʉnsikali ikɨsiga ʉkʉvomba imbombo itsʉ tsitava tsa kɨsikali,
pakʉta ammovose ʉmbaha va mwene.
5 Namwene ʉlya ʉvalɨ pa kʉgelana mu nkino,
angatelʉtse,
navakampe ʉlwokelo,
ɨngave natelwitsi ʉkʉkongana ni ndagɨlo tsa nkino ʉgwa.
6 Ʉndɨmi ʉvɨ ikɨkupila pa mbombo,
ʉjwa anogye ʉkʉlongola wʉ gʉsiike ʉnsɨkɨ ʉgwa kwʉpɨlɨla ɨligavo lya vʉbeni.
7 Timoti,
ʉgavɨɨke mu numbula ʉgwʉ ndikʉkʉvʉʉla,
ʉlwakʉva ʉNtwa ikʉkʉpa ʉlʉhala lwa kʉtsimanya tsyoni.
8 Ɨkɨgono ɨkɨveetsaga ʉnkʉmbʉkage ʉYɨɨsʉ Kɨlɨsiti ʉva kɨkolo kya nkʉlʉdeeva ʉDavʉdi,
a ʉvɨ ʉNgʉlʉve aantsʉʉsiitse ʉkʉhʉma kʉ vaswe,
ndʉwʉ litsova ɨLivangɨli ɨlyʉ ndilʉmbɨlɨla.
9 Kʉ nongwa ɨjyo,
ʉne ndikʉvɨlwa kʉtye ʉkʉkʉngwa nɨ minyololo ʉta ndɨlɨ nnangi.
Apeene ɨlimenyu lya Ngʉlʉve nalikʉngwa.
10 Lɨno,
ʉne ndikɨjʉmɨɨlɨtsa mu tsyoni kʉ nongwa jya vahalwa va Ngʉlʉve,
ʉkʉta naveene vʉʉpɨlɨle ʉvʉpoki,
ʉwʉ vʉlɨ mwa Mesiya ʉYɨɨsʉ,
nʉ kʉva nʉ mwene mu wɨɨmɨkiwa wa mwene ʉwʉ nawisila.
11 Ɨlɨ lyʉ limenyu lya lweli ʉkʉta,
“Ɨngave tʉsue paninie nʉ Kɨlɨsiti,
ikange tʉlaava vʉʉmi paninie nʉ mwene.
12 Ɨngave tukɨjʉmɨɨlɨtsa,
tʉlalongotsaaga ʉvʉtwa paninie nʉ mwene.
Ɨngave tukʉmʼbeela ʉmwene,
namwene alatʉbeela ʉwe.
13 Jɨngave ʉwe natʉlɨ vahʉʉgʉ kʉ mwene,
ʉmwene isigala mmʉʉgʉ sikutsooni,
ʉlwakʉva ʉmwene vɨ va lweli sikutsooni.”
Ʉmbombambombo ʉnnonu
14 Avaanu avo ʉvakʉmbʉhɨtsaage ago nʉ kʉvapavɨla pamiiho ga Ngʉlʉve,
vɨlekelwe ʉkʉkaningʼana kʉ nongwa jya tʉmenyu ʉtʉdebe.
Ingʼaani itso natsivʉmbʉla kɨɨnu,
apeene tsikʉvavejanga ʉwʉ vipʉlɨka.
15 Wɨkupilage ʉkʉmanyiisa ɨlimenyu lya jɨlweli,
ndʉwʉ lɨlɨwo.
Apo wiiva mbombi vɨntsila ni soni kʉ nongwa jya mbombo jyako.
Ʉkʉvomba ndavʉle kwʉ kwene ʉNgʉlʉve inogwa.
16 Ʉtsileke imanyiiso tsa vaanu inzila lʉvʉmbʉlɨlo,
itsa kɨpanzi,
ʉlwakʉva itsi tsikʉvapelela avaanu vagimbe ʉkʉmʼbeela ʉNgʉlʉve.
17 Imanyiiso itso tsivaala ʉta ngʼongʼo ɨjitana.
Mu nʼgati mu vaanu avo mwale ʉHimenayo nʉ Fileto,
18 avo vajagile siitso,
vajɨlekile ɨlweli.
Vinanga ʉlwɨdɨko lwa vaanu avange ʉpwʉ viita,
ʉkʉtsʉʉka kwa vaswe kʉlʉtɨngʼiinie.
19 Ʉweene ʉwaalo ʉvʉvɨɨkilwe nʉ Ngʉlʉve wʉ vʉkangasu,
vʉlɨ na mamenyu aga,
“ɄNtwa ʉNgʉlʉve avamanyile avaanu va mwene,”
b ikange,
“Ʉmuunu ʉvaveetsaga ʉvɨ ikɨtsova ʉkʉta ʉmwene vɨ va Ntwa ʉNgʉlʉve,
avʉleke ʉvʉtulanongwa.”
20 Mu nyumba jya muunu ʉmmosu mwʉsile isikongʼolo isinotsiiwe ʉkʉhʉma mu kyʉma,
ikange mwʉsile isinotsiiwe ʉkʉhʉma mu mmanga na mu mabɨkɨ.
Isinge sya kʉvombela ɨmbombo jya lwɨmɨko,
isinge sya kʉvombela ɨmbombo jya makakala.
21 Lɨno,
ʉmuunu angɨvalatse kʉ nzɨla jya kʉvʉleka ʉvʉtulanongwa ʉwa wooni,
iiva kɨkongʼolo ɨkɨhalwa ɨkyʉ kɨvalatsiiwe,
ikange iveetsaga anogye kʉ Ntwa,
avɨɨkilwe kɨvombelo kya mbombo tsyoni inonu.
22 Ʉvʉlekage ʉvʉnogwe wa mu vʉdebe,
ʉtaamage mu vʉgolosu,
mu lwɨdɨko,
mu lʉgano na mu lʉnotsehetso.
Ʉvombage ago paninie na vaanu avikʉlɨhʉʉvɨla ɨlitaawa lya Ntwa ʉYɨɨsʉ nɨ numbula ɨmbalasu.
23 Wɨlekelwe ʉkʉkonga ingʼaani itsa vʉtsimu ʉvʉtsila nʉ lʉvʉmbʉlɨlo,
pakʉva ʉlʉmanyile ʉkʉta itso tsipela imbatsa.
24 Ikange,
napanogiili ʉmbombic va Ntwa ʉYɨɨsʉ ʉkʉva muunu va mbatsa,
apeene,
ave inʼdeke kʉ vaanu vooni,
ʉnya lwɨjʉmɨɨlɨtso,
ʉvɨ akɨmanyile ʉkʉmanyiisa.
25 Ikange,
ave ikʉvalʉngɨka mu vʉdeke ʉwʉ vikaningʼana nʉ mwene,
ʉkʉta ɨngave jikwɨdɨngʼana,
ʉNgʉlʉve avape ʉkʉpela imbiivi nʉ kʉjɨmanya ɨlweli.
26 Pwʉ ʉlʉhala lwa veene lʉvakilivukile,
vapone mu ntego gwa Setano,
ʉvɨ aviibiite ʉkʉta vavombage itsa vʉnogwe wa mwene.