Ɨkalata jya vɨɨlɨ jya Paulo
kwa Timoti
Ʉlʉpembetso lwa Paulo kwa Timoti
1
1 Ɨkalata ɨjɨ jɨhʉmile kwane ndɨ Paulo.
Ʉne neene ndɨ ndyɨlangilwe ʉkʉva mpositili va Mesiya ʉYɨɨsʉ kʉ vʉnogwe wa Ngʉlʉve,
ʉkʉta ndɨvavʉʉlage avaanu ɨkulongwi jya lwɨdɨngʼano lwa wʉʉmi ʉwʉ vʉlɨ mwa Mesiya ʉYɨɨsʉ.
2 Ndikʉkʉvɨgɨla ʉve Timoti,
vɨ mwana vango ʉnʼgane.
Ʉlʉhʉngʉ nɨ kɨsa nʉ lʉnotsehetso ʉkʉhʉma kwa Ngʉlʉve ʉDadajiitu na kwa Mesiya ʉYɨɨsʉ,
ʉNtwa viitu,
siveetsage nʉʉve.
ɄPaulo ikʉnsaana ʉNgʉlʉve nʉ kʉmpa amaka ʉTimoti
3 Ndikʉnsaana ʉNgʉlʉve ʉvɨ ndikʉmbombela nɨ numbula ɨmbalasu,
ndʉwʉ vaambombye avanyakatale,
wʉ ndikʉkʉkʉmbʉka mu nyɨsajo tsyango,
pakɨlo na pamuunyi.
4 Wʉ ndikʉmbʉhɨtsa ʉlwihotsi lwako ʉnsɨkɨ ʉpwʉ twalekengʼanaga,
pwʉ ndiiva nʉ vʉsʉʉkwa siitso wa kwaganila nʉʉve,
ʉkʉta ndɨve nʉ lʉhekelo ʉlʉlʉti.
5 Ikange,
ndikʉmbʉhɨtsa ʉlwɨdɨko lwako ʉlʉtsila nʉ vʉsyovi.
Ʉlwɨdɨko ʉlwa,
aale nalwo ʉpapaajo ʉLoisi nʉ jyʉva vaako ʉEunike,
ndɨlʉmanyile ʉkʉta najyʉve ʉlɨ nalwo.
6 Ɨkɨ kyʉ kɨɨnu ndikʉkʉkʉmbʉhɨtsa ʉkʉta,
wɨkupilage ʉkʉkɨvombela ɨkɨkʉngɨlwa ɨkyʉ aakʉpye ʉNgʉlʉve ɨkyʉ wʉʉpɨlye ʉpwʉ ndyakʉvɨɨkye isivoko.a
7 Lola,
ʉMepo ʉvɨ ʉNgʉlʉve atʉpye nava kʉtʉvɨɨka tʉve vadwatsi,
apeene ʉjwa va kʉtʉpa amaka,
ʉlʉgano nɨ numbula jya kwɨtʉga.
8 Lɨno,
ʉleke ʉkʉva ni soni ʉkʉtsova ʉwajɨlweli wa kulongwi tsa Ntwa viitu ʉYɨɨsʉ Kɨlɨsiti,
evo ʉkʉmbonela ʉne isoni pakʉva ndɨlɨ mu kɨkʉngwa kʉ nongwa jya mwene.
Peene wɨjʉmɨɨlɨtsaage mu vʉkʉvɨlwa paninie nʉʉne kʉ vʉsumbe wa Livangɨli ndʉwʉ vukwʉpɨlɨla amaka ʉkʉhʉma kwa Ngʉlʉve.
9 Ʉmwene aatʉpokile ikange aatwɨlangile tʉve vavalatse.
Naavombe ɨlyo ndʉ lwokelo lwa mbombo tsiitu itsikelanie kʉ mwene,
baako.
Apeene aavombile kʉ nongwa jya vʉnogwe wa mwene nʉ lʉhʉngʉ lwa mwene ʉlwʉ aatʉpye mwa Mesiya ʉYɨɨsʉ ʉkʉhʉma katale,
wʉ nakɨpelilwi ɨkɨveetsaga.
10 Lɨno,
ʉNgʉlʉve avoniitse ʉlʉhʉngʉ lwa mwene kwawe,
pa kwitsa kwa Mesiya ʉYɨɨsʉ,
ʉMpoki viitu.
Ʉmwene ʉjʉ vɨ alesiitse amaka ga vʉswe,
ikange kʉ nzɨla jya Livangɨli avoniitse ʉwʉʉmi wa sikutsooni.
11 Kʉ nongwa jya Livangɨli ɨlyo,
ʉne ndɨhalilwe ndɨve ndʉmbɨlɨli,
mpositili,
ikange mmanyisi.
12 Pa kulongwi ɨjyo vʉmbwene ʉvʉkʉvɨlwa ʉvʉ.
Napeene,
nandivona soni pakʉva ndɨmmanyile ʉvɨ ndikʉmwɨdɨka,
ikange ndɨlʉmanyile ʉkʉta,
ɨLivangɨli ɨlyʉ amye,
b iloleela vʉnonu ʉkʉsika ɨkɨgono kɨlya ɨkyʉ alakilivuka.
13 Wiibatage vʉnonu imanyiiso tsa lweli itsʉ ndyakʉmanyiise.
Itso najyʉve ʉvamanyiise avaanu nʉ kʉtsiga mu lwɨdɨko nʉ lʉgano lwa mwa Mesiya ʉYɨɨsʉ.
14 ƗLivangɨli ɨlyʉ waapeevilwe,
ʉlɨloleele kʉ maka ga Mepo ʉMbalatse ʉvɨ mwale mu nʼgati mwawe.
15 Timoti,
ʉve ʉlʉmanyile,
avaanu vooni va mu mpandʉlʉc ʉgwa Asiya vaandekile.
Mu nʼgati mu veene mwale ʉFigelo nʉ Helumogene.
16 Ndidoova ʉNtwa ʉYɨɨsʉ avakolele ɨkɨsa ʉwʉ valɨ mu nyumba ɨjya Onesifolo,
pakʉva kakongosu aahovosaaga ɨnumbula jyango.
Ikange,
nalɨkʉvona soni ʉkwitsa kukʉndola wʉ ndɨlɨ mu kɨkʉngwa.
17 Ʉnsɨkɨ ʉpwʉ iitsile mu vʉtsenge ʉwa Looma,
aagahile ʉlwʉtsi ʉkʉndonda ʉkʉsika wʉ ikʉmbona.
18 ɄNtwa ʉYɨɨsʉ anʼdoovele ʉOnesifolo ɨkɨsa kʉ Ntwa ʉNgʉlʉve pa kɨgono kya vʉhɨgi.
Nʉʉve ʉlʉmanyile vʉnonu mongosu ʉgwʉ aambombye mu vʉtsenge wa Efeso.