Ʉgwʉ galahʉmɨla isigono isya kʉ vʉsililo
3
1 Lɨno,
ʉtsimanyage itsi,
isigono isya kʉ vʉsililo kʉlaava nɨ misɨkɨ ɨgya vʉkʉvɨlwa ʉvʉlʉti,
2 ʉlwakʉva avaanu valɨganaga vaveene,
valatsigana indalama,
valɨginiaga,
valaveetsaga vanya matingo,
valaava vanya madʉsi,
navalavɨɨmɨkage avahotsi va veene,
navalasaanage,
na navalaveetsage vavalatse.
3 Ikange,
navalavaganage ava kʉ myavaavo,
navalanogwagwe ʉkwɨdɨngʼana,
valaava vanuasi,
navalɨtʉgage,
valaava vakali,
navalanogwagwe inonu,
4 valaava vahendami,
valaava vanya matingo,
vanya lwɨtotso,
valaava vanya vʉnogwe wa kɨlʉnga,
valakʉleka ʉkʉnʼgana ʉNgʉlʉve.
5 Avaanu avo kʉnzi vivoneka vikʉnkonga ʉNgʉlʉve,
hʉmbe mu numbula tsa veene vibeela amaka ga Ngʉlʉve.
Avo kwʉ baako ʉkʉveetsania paninie na veene.
6 Mu vaanu avo mwʉvale ʉwʉ vikwingila mu nyumba tsa vaanu kʉnʉ wʉ valɨ nʉ vʉsumbe ʉvʉviivi,
nʉ kʉvatekeletsa avadala avapelwa ʉwʉ vagagiilwe ni mbiivi.
Ikange,
avadala avo vitʉngʉtsiima ni siinu isilɨ pongosu.
7 Ɨkɨgono nɨ kɨgono avo vimanyila ʉkʉhʉma kʉ vamanyisi avo va vʉnuasi,
vilemwa lwoni ʉkʉvʉmanya ʉwajɨlweli.
8 Avamanyisi avo vibeetsa ɨlweli ndʉwʉ ʉYane nʉ Yambulea vaabeetsaaga kwa Moose.
Avaanu avo valɨ nʉ lʉhala lʉdebe,
valʉlekile ʉlwɨdɨko.
9 Avaanu avo navakaweese ʉkʉsika apaveetsaga,
ʉlwakʉva ʉvʉtsimu wa veene wiiva pavʉvalasu kʉ vaanu vooni,
ndʉwʉ jyale kwa Yane nʉ Yambule.
Indagɨlo tsa Paulo kwa Timoti
10 Lɨno ʉve,
ʉtsimanyile imanyiiso tsyango nʉ kʉkonga ʉlʉgendo lwango,
nʉ vʉsumbe wango,
nʉ lwɨdɨko,
nʉ kʉsipa kwango,
nʉ lʉgano,
na mu kwɨpa amaka.
11 Ikange,
ʉlʉmanyile ʉmwʉ avaanu vaangatiitse nʉ kʉmmelela ʉvʉkʉvɨlwa wʉ ndɨlɨ mu vʉtsenge ʉwa Antiokiya,
ʉwa Ikoniyo nʉ wa Lisitila.
Ʉlʉmanyile ʉkʉta ndyasipile mu vʉpala wooni,
ʉkʉsika ʉNtwa akammoka piitso.
12 Eena,
vooni ʉwʉ vinogwa ʉkʉnkonga ʉNgʉlʉve mwa Mesiya ʉYɨɨsʉ,
wʉ vikʉvɨlwagwa.
13 Aveene aviteka na vivomba imbiivi vapitsiga vavombambiivi siitso,
vapitsiga vateki nʉ kʉtekeletswa.
14 Lɨno ʉve,
wiibatɨlɨlage imanyiiso itsʉ waamanyiisiiwe nʉ kʉtsyɨdɨka,
ʉlwakʉva ʉvamanyile ʉwʉ vakʉmanyiise.
15 Ʉkʉhʉma mu vʉdebe waako ʉvʉmanyile ʉVʉvɨge ʉVʉvalatse ʉwʉ vukʉkʉpa ʉlʉhala ʉlukʉkwingitsa mu vʉpoki kʉ nzɨla jya kʉmwɨdɨka ʉMesiya ʉYɨɨsʉ.
16 ɄVʉvɨge ʉVʉvalatse wooni vʉvɨgilwe mu vʉlongotsi wa Ngʉlʉve.
Ʉwa vʉnogye ʉkʉmanyiisa avaanu ɨlweli,
ʉkʉvapavɨla avaanu pa vʉtulanongwa wa veene,
ʉkʉvalongotsa ʉpwʉ vihena,
nʉ kʉvalongotsa vave vagolosu.
17 Mwɨlyo,
ʉmuunu va Ngʉlʉve iveetsaga anogelanie ikange anotsiiwe ʉkʉvomba imbombo tsyoni inonu.