4
1 Ndikʉkʉlagɨla aga,
pamiiho ga Ngʉlʉve na pamiiho ga Mesiya ʉYɨɨsʉ,
ʉvɨ alavahɨga avʉʉmi na vaswe,
ikange aliitsa kulongotsa,
ʉlwakʉva vɨ Nkʉlʉdeeva.
2 Ʉlʉmbɨlɨlage ɨlimenyu lya Ngʉlʉve,
ʉvombage ɨlyo kʉ nsɨkɨ ʉgwʉ gʉnogelanie nʉ gwʉ nagʉnogelaniili.
Ʉvʉngage,
ʉtanage,
ʉvadʉlʉsaage avaanu nʉ kʉmanyiisa kʉ lwɨjʉmɨɨlɨtso lwoni.
3 Ʉvombage itsi pakʉva gukwitsa ʉnsɨkɨ,
ʉgwʉ avaanu navakapʉlɨhɨtsaage imanyiiso tsa lweli.
Apeene vapiiva vinogwa ʉkʉpʉlɨka ʉgwʉ vikeela aveene,
nʉ kʉlonda avamanyisi sipʉga sipʉga ava kʉvamanyiisa itsa vʉnogwe wa veene.
4 Vapikʉkʉleka ʉkʉpʉlɨhɨtsa ʉwajɨlweli,
vapikongaga isitsaago isya vʉnuasi.
5 Lɨno ʉve,
ʉve miiho mu gooni,
wɨjʉmɨɨlɨtsaage mu vʉpala,
vombaga ɨmbombo jya kʉlʉmbɨlɨla ɨLivangɨli,
ʉvombage vʉnonu mu vʉvombeli waako wooni.
6 Ndikʉkʉvʉʉla itsi,
ʉlwakʉva vinogwa ʉkʉnnyʉmya ʉne ndɨ neekelo ɨjya divai,
ɨjyʉ viduuda pa kɨteekelelo,
a kwʉ kʉta,
akavalɨlo kango ka kʉswa kahegelye.
7 Ndɨlue ɨligoha ɨlinonu,
ʉlʉgendo ndɨmalile,
ikange ndyʉmɨɨlye mu lwɨdɨko.
8 Lɨno kʉsigye ʉkwʉpɨlɨla ʉlʉdingʼulilo lwango ʉlwa vʉgolosu,
ʉlwʉ ʉNtwa ʉYɨɨsʉ Kɨlɨsiti,
ʉmmɨgi ʉnʼgolosu alaama pa kɨgono ɨkyo.
Kwʉ kʉta nalaame ʉne ndɨ mwene,
baako,
alavapa na vange vooni ʉwʉ vihʉʉvɨla ʉkwitsa kwa mwene.
Ʉlʉdoovo lwa Paulo
9 Timoti,
ndikʉkʉdoova ʉvombe ngʼaningʼaani ʉkwitsa kwane.
10 ɄDema andekile,
ʉlwakʉva anogilwe ʉvʉnogwe wa kɨlʉnga,
alamwe ʉkʉbɨha mu vʉtsenge ʉwa Tesalonike.
ɄKilesike alʉtile ʉkʉ kʉ Galatiya,
nʉ Tito alʉtile kʉ Dalumatiya.
11 Jyʉ Luuka mwene vɨ pwale apa paninie nʉʉne.
Lɨno,
wʉ vukwitsa mwitsaniage nʉ Maliko,
pakʉva ʉjʉ anogye ʉkʉva intangɨli vango mu mbombo jya Ngʉlʉve.
12 Ndyansuungʼile ʉTikiko ʉkʉ kʉ Efeso.
13 Ʉnsɨkɨ ʉgwʉpya vukwitsa,
wiitsage nɨ likoti lyango ɨlyʉ ndyalɨlekile kwa Kalipo ʉkʉ kʉ Tuloa,
ikange wiitsage ni sitabu,
ndilonda siitso silya isya ngwembe.
14 ɄAlekisanda ʉmponzi va syʉma,
ambombye imbiivi nyongosu.
ɄNtwa alammɨga kʉ nongwa jya mbiivi tsa mwene.
15 Pwʉ najyʉve wɨlolelage nʉ muunu ʉjwa,
ʉlwakʉva aabeetsiitse siitso ʉgwʉ tulʉmbɨlɨla.
16 Ʉlʉtatsi,
ʉnsɨkɨ ʉgwʉ ndyahɨgwagwa pa kɨhɨgɨlo,
naalepwo nʉ mpamato ʉva kʉnnanga,
vooni vaandekile.
Ndidoova ʉNgʉlʉve aleke ʉkʉvavona vatulanongwa mwɨlyo.
17 Mwene ʉNtwa aale paninie nʉʉne,
akaama amaka ʉkʉlʉmbɨlɨla ɨlimenyu lya mwene mu lweli jyoni,
ʉkʉta avaanu vooni ʉwʉ vatava Vayahudi vapʉlɨke.
ɄNtwa akammoka mu vʉswe,
ʉlwakʉva ndyale ʉta ndɨlɨ mu ndomo gwa ngalamu.
18 ɄNtwa ikʉmmokaga kʉ mbiivi tsyoni nʉ kʉndoleela,
ʉkʉsika wʉ ikʉnsikitsa kʉ Lʉdeeva lwa mwene lwa kʉkyanya.
Ʉwɨɨmɨkiwa vʉlɨ nʉ mwene sikutsooni!
Ameni.
Amamenyu ga vʉsililo
19 Ʉnsaamusihitsaage ʉPulisila nʉ Akila na va mu nyumba jya Onesifolo.
20 ɄElasito aasigye mu vʉtsenge wa Kolinto.
ɄTilofimo ndyandekile ʉkʉ kʉ Mileto,
aale ntamu.
21 Lɨno,
ʉgahe ngʼaningʼaani ʉkwitsa wʉ gʉkaanale ʉkʉsika ʉnsɨkɨ ʉgwa ngʼaala.
ɄEbulo nʉ Pude,
nʉ Linusi,
nʉ Kilaudiya,
paninie na vɨɨdɨki vooni,
vikʉkʉsaamusa.
22 ɄNtwa ave paninie nʉʉve.
Ʉlʉhʉngʉ lwa mwene lʉveetsage nʉʉnyie nyɨ vooni.