Imanyiiso kʉ sipʉga isyʉ silɨ mu mpelela
2
1 Pwʉ ʉve,
ʉvamanyiise avaanu ʉkʉva nɨ migendele ɨminonu ndʉwʉ tsilɨwo imanyiiso tsa lweli.
2 Ʉvavʉʉle avandyakoni vɨtʉgage,
vave vaanu avikwɨmɨkiwa,
vave nʉ lʉhala lwa vʉmuunu,
avanya lwɨdɨko lwa lweli,
avanya lʉgano nʉ lwɨjʉmɨɨlɨtso.
3 Vʉvʉle vʉle,
naveene avadala avagogolo vave nʉ lʉgendo ʉlukʉnʼginia ʉNgʉlʉve,
vɨlekelwe ʉkʉva vavʉʉlɨlɨtsi,
vɨlekelwe ʉkʉva vagaatsi,
apeene vanogye vavamanyiisaage avange imbombo inonu.
4 Mwɨlyo,
viiva vikʉvamanyiisa avadala avasaala ʉkʉvagana avagoosi va veene na vaana va veene.
5 Naveene avadala avasaala vave nʉ lʉhala lwa vʉmuunu,
vave nʉ lʉgendo ʉlʉnonu,
vavombage vʉnonu imbombo mu nyumba tsa veene,
vave viipa,
ikange vave avipʉlɨka kʉ vagoosi va veene,
pakʉta ɨlimenyu lya Ngʉlʉve lɨleke ʉkʉbedwa.
6 Vʉvʉle vʉle,
naveene avadɨɨmi ʉvavʉnge vave nʉ lʉhala lwa vʉmuunu.
7 Najyʉve,
ʉveetsage kɨmanyilo mu mbombo tsyoni inonu,
ʉvonie ɨlweli nʉ kʉsindamala mu manyiiso tsyako.
8 Ʉgwʉ witsova gaveetsage ga lweli,
ʉkʉta ʉnya kʉbeetsa ɨɨkotse isoni,
ʉlwakʉva nakaave nɨ limenyu lya kʉtʉtsova ʉvʉviivi.
9 Ikange avavanda,
ʉvavʉʉle ʉkʉta vavapʉlɨkage avatwa va veene,
vavahovosaage mu tsyoni,
vɨlekelwe ʉkʉkaningʼana na veene.
10 Ikange valeke ʉkʉhɨɨtsa,
apeene vave vihʉʉvɨlwa siitso na vatwa va veene,
pakʉta imbombo inonu tsa veene tsyoni tsivakwege avo vapʉlɨhɨtsaage imanyiiso tsa Ngʉlʉve,
ʉMpoki viitu.
11 Ʉvamanyiise ago,
ʉlwakʉva ʉNgʉlʉve avoniitse ʉlʉhʉngʉ lwa mwene,
ʉlwʉ lukʉvapoka avaanu vooni.
12 Ʉlʉhʉngʉ ʉlʉ,
lukʉtʉmanyiisa ʉkʉbeela ʉvʉviivi nʉ vʉnogwe wa kɨlʉnga.
Pwʉ ʉnsɨkɨ wʉ tʉlɨ mu kɨlʉnga ɨkɨ tʉveetsage vaanu avanya lʉhala lwa vʉmuunu,
avagolosu,
ikange avikʉnkonga ʉNgʉlʉve.
13 Tʉtaame kʉ nzɨla ɨjɨ,
wʉ tuhʉʉvɨla ɨkɨgono kɨlya ɨkɨnonu,
ɨkyʉ ʉmwene ʉYɨɨsʉ Kɨlɨsiti,
ʉNgʉlʉve ʉNʼdwadwa,
ikange ʉMpoki viitu,
alakilivuka mu wɨɨmɨkiwa wa mwene.
14 Ʉjwa aahʉmiitse ʉwʉʉmi wa mwene pakʉta atʉgombole ʉkʉhʉma mu vʉtulanongwa wooni,
nʉ kʉtʉvalatsa tʉve vaanu va mwene va lweli,
avikɨkupila ʉkʉvomba inonu.
15 Ʉvamanyiise ago gooni,
ʉvadʉlʉse nʉ kʉvavʉnga kʉ vʉtavʉlɨlwa wooni,
ʉmuunu ʉvaveetsaga aleke ʉkʉkʉbeda.