Ɨkalata jya Paulo
kwa Tito
Ʉlʉpembetso lwa Paulo kwa Tito
1
1 Ɨkalata ɨjɨ jɨhʉmile kwane ndɨ Paulo,
ndɨ ndɨlɨ mbanda va Ngʉlʉve,
ikange ndɨ mpositili va Yɨɨsʉ Kɨlɨsiti.
Ʉne ndɨsuungʼilwe ndɨvavʉʉlanitsaage avahalwa va Ngʉlʉve mu lwɨdɨko,
na mu vʉmanyi wa lweli ʉwʉ vukʉvalongolela mu kʉnkonga ʉNgʉlʉve.
2 Mwɨlyo,
viiva nʉ lʉhʉʉvɨlo lwa wʉʉmi ʉvʉtsila vʉmalɨlo,
pakʉva ʉNgʉlʉve aatʉhʉʉviitse ʉwʉʉmi ʉwa wʉ kɨkaanale ɨkɨlʉnga ʉkʉpelwa.
Ikange,
ʉNgʉlʉve nitsova ʉvʉnuasi.
3 Lɨno,
ʉnsɨkɨ gwa Ngʉlʉve gʉsiike,
avoniitse ɨlimenyu lya mwene mu kulongwi ɨjyʉ amye ndɨjɨlʉmbɨlɨlage,
ndʉwʉ lʉlɨvo ʉlʉlagɨlo lwa Ngʉlʉve ʉMpoki viitu.
4 Ndikʉkʉvɨgɨla ʉve Tito,
vɨ mwana vango jɨlweli mu vʉhange wa lwɨdɨko.
Ʉlʉhʉngʉ nʉ lʉnotsehetso ʉkʉhʉma kwa Ngʉlʉve ʉDaada na kwa Mesiya ʉYɨɨsʉ,
ʉMpoki viitu,
siveetsage nʉʉve.
Ɨmbombo jya Tito ʉkʉ kʉ Kilete
5 Ndyakʉlekile ʉkʉ kʉ Kilete,
ʉkʉta ʉnotse ʉgwʉ gakeepile mu kɨpʉga kya vɨɨdɨki,
nʉ kʉhala avandyakoni mu vʉtsenge wooni ndʉwʉ ndyakʉlagye.
6 Ʉndoleeli va kɨpʉga kya vɨɨdɨki,
anogye ʉkʉva muunu ʉvɨ nitsowa imbiivi itsiveetsaga.
Aleke ʉkʉva ndigu,
a avaana va mwene vave vɨɨdɨki,
b valeke ʉkʉva vagalagala evo ʉkʉva avanavikɨjisa,
7 manya ʉndoleeli agotoliilwe ɨmbombo jya Ngʉlʉve,
nanogiili ʉkʉva muunu va kʉtsowa imbiivi itsiveetsaga.
Akʉleke ʉkwɨginia,
ʉntsila nʉ lʉviipo,
ʉvɨ nanʼgaatsi,
ʉntsila nɨ mbatsa,
ikange aleke ʉkʉva nʉ vʉnogwe ʉvʉviivi ʉwa kyʉma.
8 Apeene ave mwipa,
ʉvɨ ihovokela inonu,
ʉnya lʉhala lwa vʉmuunu,
ʉnʼgolosu,
ʉmbalatse,
ʉvɨ ikɨtʉga.
9 Ave ikwibata ɨlweli jya Livangɨli lya Yɨɨsʉ Kɨlɨsiti,
ndʉwʉ amanyiisiiwe.
Apo ikʉlʉmanya ʉkʉvanywilitsa avaanu kʉ manyiiso tsa lweli nʉ kʉvalesa ʉwʉ visiga ɨlimenyu lya Ntwa.
10 Lola,
pwʉvale avaanu vongosu ʉwʉ navikɨjisa,
vitsova amamenyu amatsila lʉvʉmbʉlɨlo,
ikange vateki,
siitso aVayahudi ʉwʉ vapitsiige vivɨɨka mbʉlongolo inyiiho tsa veene.
11 Avaanu avo vabeetsiwe ʉkʉmanyiisa,
ʉlwakʉva vikʉvajatsa avaanu vooni ava nyumba tsyoni,
ʉpwʉ vimanyiisa ʉgwʉ naganogiili.
Vivomba ewo ʉkʉta vakave indalama.
12 Ikange ʉnyamalago mpamato mu vanyamalago va kʉ Kilete,
aatye,
“AVakilete vanuasi isigono syoni,
vakali ʉta sikanu sya mwinyasi,
vanya mwojo,
ikange voolo.”
13 Ʉvʉtsovi ʉvʉ wa lweli.
Mwɨlyo,
avɨɨdɨki ʉvatanile siitso,
ʉkʉta vakonge imanyiiso tsa lweli.
14 Vɨlekelwe ʉkʉpʉlɨhɨtsa isitsaago isya Kɨyahudi nɨ ndagɨlo tsa vaanu ʉwʉ vavʉlekile ʉwajɨlweli.
15 Avo vimanyiisa ʉkʉta,
pwʉsile isiinu isyʉ sikolelanie.
Hʉmbe kʉ valya avagolosu pamiiho ga Ngʉlʉve isiinu syoni sivalatsiiwe.
Lɨno,
kʉ valya avakolelinie ikange avatava vɨɨdɨki,
isiinu syoni sikolelanie,
ʉlwakʉva ʉlʉhala ni nyɨvonelo tsa veene,
tsidɨgile ʉvʉlami.
16 Vikɨtsova vaveene ʉkʉta vammanyile ʉNgʉlʉve,
hʉmbe mu migendele gya veene vikʉmʼbeela.
Avo wʉ vikʉmbipitsa ʉNgʉlʉve,
vahambwike,
vilemwa ʉkʉvomba ɨmbombo nɨmamato ɨnonu.