Mataayo 8

ɄYeesu ahumʼponia na hunʼsangalusye ʉwɨ makete

(Maalʉko 1:40-45; Luuka 5:12-16)

Hu habhaazyo ɨho ʉYeesu lwa wiiha mwi‑igamba, ɨmpʉga ɨngoosi ɨya bhantu yahamʼmɨnjɨɨlɨla. 2 Enya, ʉmuntu ʉmo ʉwɨ mpʉngo ɨyɨ makete ahɨnzɨle na‑asugamile pitagaalila lya Yeesu, ahamʼmʉʉzya ahaga, “Wee Mwɨnɨ, ɨmɨɨnye huje, ʉbhajiiye humponie na hunsangalusye. Nkashele ʉgɨɨne, ɨlaabha ʉmponie na hunsangalusye.” 3 ɄYeesu ahagolosya ʉnʼkhono gwakwe, ahamʼpalamansya ahaga, “Ɨhwanza. Pona na‑asangalushe!” Ahabhaazyo hɨnɨɨho ahapona amakete. 4 Ɨpo ʉYeesu ahanʼkhajiilizya ʉmuntu ʉla ahaga, “Ʉgandi humʼmʉʉzye ʉmuntu wowonti ɨga! Leelo, bhalaga ʉhwilolesye hwa nʼsayi wa Ngʉlʉbhɨ na‑afumye ɨnsangu nanshi ʉMoose sha‑ahalajiziizye, huje wubhe simishizi aje ʉponile.”

Ʉlwɨtɨho lwa nʼnongozi ʉwa bhalwi

(Luuka 7:1-10; Yoohani 4:43-54)

5 Hu habhaazyo ɨho ʉYeesu lwa watʉʉha mwi‑ibooma ɨlyɨ Kapelenawumu, ʉnʼnongozi ʉmo ʉwa bhalwi abhɨ Shiluumi ahamʼmwɨnzɨla ʉYeesu na hunʼnaabhe 6 ahaga, “Wee Mwɨnɨ, ʉmʼmomvi waanɨ agonile hu khaaya, afwiye hundwɨmo, abhinile tee. Ɨhulaabha ʉmʼponie.” 7 ɄYeesu ahamʼmwamula ahaga, “Ɨhwɨnza humʼponie.” 8 Leelo ʉnʼnongozi ʉyo ahamʼmʉʉzya ahaga, “Ndaadi, wee Mwɨnɨ! Saga ɨhondɨɨye huje aawe ʉtʉʉshe mu nyumba yaanɨ. Leelo ʉyanje izwi lwene, wope ʉmʼmomvi waanɨ abhala‑apone. 9 Ɨnjanjile ɨsho, pɨpo anɨ nanɨ ɨndi pa nsi pa bhalongozi bhaanɨ, nantele ɨndi na bhalwi bha bhali pa nsi yaanɨ. Nkashele ɨhunʼnajizya ʉmo mwa bheene huje, ‘Bhala,’ abhala lubhilo. Nkashele ɨhunʼnajizya ʉwamwabho huje, ‘Ɨnza,’ ahwɨnza wope lubhilo. Wope ʉmʼmomvi waanɨ nkashele ɨhunʼnajizya aje, ‘Bhomba ɨshi,’ abhomba shɨnɨɨsho.” 10 ɄYeesu lwa wʉmvwa ɨzyo, ahaswiga tee, ahabhabhʉʉzya bha bhahamʼmɨnjɨlɨɨye ahaga, “Lyoli ɨhubhabhʉʉzya huje saga ɨndolile ʉmuntu nka weeka mwa Bhaizilaeeli ʉwɨ lwɨtɨho ʉlugoosi nanshi ʉlwu! 11 Ɨhubhabhʉʉzya huje abhantu bhabhinji afume ɨmbali zyonti ɨzyɨ nsi bhahayɨnza, bhahayilyanga peeka nʉ Abulahaamu, ʉIsaaka nʉ Yaakobo mu wumwɨnɨ ʉwa hu mwanya. 12 Leelo aBhaizilaeeli abhinji ɨbho bha bhahanziwaaga huje bhabhe mu wumwɨnɨ ʉwo, ɨbho bhahayitaagwa hwʉnzɨ hu hiisi. Ʉhwo hwa hwʉhwo bhahayililaga na‑azyeguzye amiino hu nongwa yɨ mavune amakhali.”

13 Ɨpo ʉYeesu ahamʼmʉʉzya ʉnʼnongozi ʉla ahaga, “Bhalaga! Ɨbhanje nanshi ʉlwɨtɨho lwaho sha lulɨɨho.” Ahabhaazyo hahaala ʉmʼmomvi waakwe ʉla ahapona.

ɄYeesu ahubhaponia abhabhinu

(Maalʉko 1:29-34; Luuka 4:38-41)

14 ɄYeesu ahatʉʉha mu nyumba ya Peeteli, ʉmwo ahamʼmwaga ʉnyinavyala wa Peeteli agonile pa shitala, abhinile tee ɨnzegema. 15 Ɨpo ʉYeesu ahamʼpalamansya ʉnʼkhono gwakwe, pɨnɨɨpo ahapona ɨnzegema ɨla. Wope ahɨmɨɨlɨla na hwande hubhatengaanye ɨshalye.

16 Isiku liliila nalyabheela, bhahanʼneetela ʉYeesu abhantu abhinji bha bhahali na mapepo. Ɨpo ʉYeesu ahagashɨmbɨzya amapepo ɨgo hwi‑izwi lyakwe. Nantele, ahabhaponia abhabhinu bhonti. 17 Ɨgo gahabhombɨɨshe huje libhombeshe izwi liila lya lyahayangwilwe nʉ nʼkuwi ʉYesaaya huje, “Aheejile ʉwoonywa weetu, nantele ahanyʉmʉʉye ʉbhinu weetu.”

Ɨnongwa ɨzya humʼmɨnjɨɨlɨle ʉYeesu

(Luuka 9:57-62)

18 ɄYeesu lwa waalola huje abhantu abhinji bhahumʼmʉngaanila, ahabhalajizya abhasundwe bhaakwe huje, “Saali tifwɨmɨɨle hwi‑isyɨla ɨlyɨ nsʉmbi.” 19 Ɨpo ʉmʼmanyizyi ʉmo ʉwɨ ndajizyo zya Moose ahabhala hwa Yeesu, ahamʼmʉʉzya ahaga, “Wee Mʼmanyizyi, ɨmbala hubhɨnjɨɨlɨle hwohwonti hwʉ‑ʉnza‑abhale!” 20 ɄYeesu ahamʼmwamula ahaga, “Ɨmbɨla zili na magwenya aga‑agone, ɨnyonyi zili nɨ vyansʉ ɨvya‑agone, leelo anɨ nɨMwana wa Muntu saga ɨndi nɨ nyumba huje ɨngaagona.” 21 Ɨpo ʉnʼsundwe ʉwamwabho ahamʼmʉʉzya ʉYeesu ahaga, “Wee Mwɨnɨ, ɨlaabha ʉnɨtɨshɨle aje, ɨmbale nasʉʉti, ɨnʼsyɨle ʉyise waanɨ.” 22 Leelo ʉYeesu ahamʼmwamula ahaga, “Aawe mbɨnjɨlɨzyaje! Bhaleshi abhafwe bhabhasyɨlaje abhafwe bhaabho.”

ɄYeesu akhajila ɨhaala ɨhali na mabhilingwa

(Maalʉko 4:35-41; Luuka 8:22-25)

23 Ɨshi ʉYeesu ahatʉʉha mu waato, abhasundwe bhaakwe bhope bhahamʼmɨnjɨɨlɨla, ɨpo bhahanda afwɨmɨɨle. 24 Ɨshi hu habhaazyo ɨho lwa bhali mu nsʉmbi muula, lubhilo ɨhaala ɨhali yahɨnza na mabhilingwa amagoosi, amɨnzɨ gahanda atʉʉshe mu waato. Leelo ʉmwene ʉYeesu ahali agonile ʉtulo. 25 Ɨpo abhasundwe bhaakwe bhahabhala hunʼdaamuzye hwi‑ibwago bhahaga, “Wee Mwɨnɨ weetu! Tifyʉle! Taafwa!”

26 Wope ʉYeesu ahaga, “Hu nongwa yeenu muhwogopa nanshi ɨshi, amwɨ mwa muli nʉ lwɨtɨho ʉludoodo?” Ɨpo ahɨmɨɨlɨla na huyikhajile ɨhaala ɨhali ɨla na mabhilingwa, hwahabha myɨ lwonti. 27 Abhasundwe bhaakwe bhahaswiga, bhahaga, “Ɨshi, ʉnʉ yʉ naanu hwope ɨhaala ɨhali nɨ nsʉmbi vyope vihumʼmwʉmvwa?”

ɄYeesu ahubhaponia abhantu bhabhɨɨlɨ bha bhali na mapepo

(Maalʉko 5:1-20; Luuka 8:26-39)

28 ɄYeesu lwa wafwɨmɨɨla ɨnsʉmbi ɨyɨ Galilaaya, ahafiha mu nsi ɨya Bhagelaasi. Ʉhwo ahakhomaana na bhantu bhabhɨɨlɨ bha bhahali na mapepo, bhahafumile hu nkʉngwa. Abhantu ɨbho bhahali bhakhali tee, nʉʉmo ʉmuntu wa‑ahalɨngaga huje ashile idala liila.

29 Ɨpo bhahabwaga ibwago tee bhahaga, “Wee Mwana wa Ngʉlʉbhɨ, tili nɨ yeenu naawe? Wɨlɨ, ʉyɨnzɨle hutiyazye sha hasɨɨle ahabhaazyo?” 30 Sha hutali hashe, pahali ni‑idiimo igoosi ɨlyɨ ngʉlʉbhɨ lya lidiimwa. 31 Ɨpo amapepo gaala gahanʼkʉndɨɨlɨzya ʉYeesu gahaga, “Nkashele ʉhutishɨmbɨzya, tilaabha ʉtɨtɨshɨle titʉʉshe mu ngʉlʉbhɨ ziila.”

32 Wope ʉYeesu ahaga, “Bhalaji!” Ɨpo amapepo gahafuma mwa bhantu bhaala, gahabhala, gahazitʉʉha ɨngʉlʉbhɨ ziila. Ɨpo idiimo lyonti ɨlyɨ ngʉlʉbhɨ lyahashɨmbɨla lubhilo, lyahiiha ʉlwiha luula ʉlukhali, lyahagwɨla mu nsʉmbi na‑afwe. 33 Abhadiimi bhɨ ngʉlʉbhɨ ziila lwa bhaalola zya zibhombɨɨshe, bhahashɨmbɨla bhahabhala mwi‑ibooma. Bhahanda hubhabhʉʉzye abhantu zyonti ɨzyo zibhombɨɨshe hwa bhaala bha bhahali na mapepo. 34 Abhantu bhonti abha mwi‑ibooma ɨlyo bhahafuma, bhahamʼmalila ʉYeesu. Lwa bhanʼnola, bhahanʼkʉndɨɨlɨzya tee huje asogole mu nsi yaabho.