Luuka 4

ɄYeesu ajelwa nʉ Seetano

(Mataayo 4:1-11; Maalʉko 1:12-13)

ɄYeesu lwa woozewa, ahasogola pi‑isooho ɨlyɨ Yolodaani sha‑alongozewa nʉ Mʼpepo ʉMʼfinjile. ɄMʼpepo ʉMʼfinjile ahanʼtwala hu lʉʉgwa. 2 Ʉhwo ahajelwa nʉ Seetano ɨnsiku amashʉmi ganɨ. Ɨnsiku zyonti ɨzyo saga ahalyanga nka hamo. Ɨnzala yahanʼnuma tee lwa zyashila ɨnsiku ɨzyo. 3 Ɨpo ʉSeetano ahamʼmʉʉzya ʉYeesu ahaga, “Aawe nkashele ʉli Mwana wa Ngʉlʉbhɨ, ʉlibhʉʉzye iwe ɨli libhe ntogito.” 4 ɄYeesu ahamʼmwamula ahaga, “Ɨsimbwilwe mu Nsimbo ɨMfinjile huje, ‘Ʉwʉʉmi wa muntu saga wufumilana nɨ shalye sheene.’ ”

5 Ɨpo ʉSeetano ahanʼtwala ʉYeesu pamo pa pahali pa mwanya tee. Hu habhaazyo heeka lwene ahanʼnanga ʉwumwɨnɨ ʉwɨ nsi zyonti. 6-7 ɄSeetano ahaga, “Nkashele wansugamilila anɨ na humpuute, ɨmbala hupeele ikhone ɨlya‑alongozye ʉwumwɨnɨ ʉwu wonti nʉ mwamu waakwe. Ɨnjanjile ɨsho, pɨpo ɨvi vyonti vyaliinɨ. Anɨ ɨhumʼpeela ʉmuntu wowonti wɨ‑ɨhwanza humʼpeele.” 8 ɄYeesu ahamʼmwamula ahaga, “Ɨsimbwilwe mu Nsimbo ɨMfinjile huje, ‘Ʉmʼpuutaje ʉMwɨnɨ ʉNgʉlʉbhɨ, ʉNgʉlʉbhɨ waaho, nantele ʉmʼmombelaje yʉʉyo mwene.’ ”

9 Ɨpo ʉSeetano ahanʼtwala ʉYeesu hwi‑ibooma ɨlyɨ Yelusaleemu, ahanʼzʉvya pa mwanya pa shidunku pa lubhaga lwɨ nyumba ɨmfinjile ɨya Ngʉlʉbhɨ. Ahamʼmʉʉzya ahaga, “Aawe nkʉ‑ʉli Mwana wa Ngʉlʉbhɨ, ʉhwitaaje pa nsi afume ɨpa. 10 Saga ʉbhala‑avwalale, pɨpo ɨsimbwilwe mu Nsimbo ɨMfinjile huje,

‘ɄNgʉlʉbhɨ anza hubhasonteelezye abhantumi bhaakwe huje, bhaʼdiime,

11 nantele bhaʼtoneele mu makhono gaabho huje,

ʉsahagwɨle mu mawe na‑avwalale poshe ɨshinama.’ ”

12 ɄYeesu ahamʼmwamula ahaga, “Nantele ɨsimbwilwe mu Nsimbo ɨMfinjile huje, ‘Ʉgandi hunʼjele ʉMwɨnɨ ʉNgʉlʉbhɨ, ʉNgʉlʉbhɨ waaho.’ ” 13 ɄSeetano lwa waamala hunʼjele ʉYeesu hu madala gonti, ahanʼneha hu habhaazyo ɨho.

ɄYeesu ahwanda ɨmbombo yaakwe hu mukowa ʉgwɨ Galilaaya

(Mataayo 4:12-17; Maalʉko 1:14-15)

14-15 Ɨpo ʉYeesu ahaweela hu mukowa ʉgwɨ Galilaaya sha‑alongozewa nʉ Mʼpepo ʉMʼfinjile. Ahamanyizyaga mu nyumba zyabho ɨzya‑apuutile na‑amanyiilile. Abhantu bhonti bha bhahanʼtejelezyaga, bhahamʼmwamihaga. Ɨnongwa zyakwe zyahanyampaana mu nsi zyonti ɨmpalamani.

ɄYeesu akhaanwa humwabho hu Nazaleeti

(Mataayo 13:53-58; Maalʉko 6:1-6)

16 Isiku limo ʉYeesu ahabhala hwi‑ibooma ɨlyɨ Nazaleeti ɨlyo ahaleliilwe. Isiku ɨlyɨ Sabaato ahatʉʉha mu nyumba ɨya‑apuutile na‑amanyiilile nanshi sha‑ahalʉbhɨɨye. Ahɨmɨɨlɨla huje, abhaazye ɨNsimbo ɨMfinjile. 17 Bhahamʼpeela ɨshitaabu ɨsha nʼkuwi ʉYesaaya, ahiigula pa pasimbwilwe huje,

18 “ɄMʼpepo wa Mwɨnɨ ʉNgʉlʉbhɨ ali peeka naanɨ,

pɨpo ʉNgʉlʉbhɨ ansaluuye hubhalʉmbɨɨlɨle abhapɨɨna ɨNongwa ɨNyinza.

Ansonteleziizye hubhabhʉʉzye abhakʉngwe

hu nongwa ya hwigulilwe hwabho,

nantele abhantonko huje, bhande alole.

Ansonteleziizye hubhafyʉle bha bhabhombelwa shibhiibhi,

19 na hubhalʉmbɨɨlɨle ahabhaazyo ɨho ʉMwɨnɨ ʉNgʉlʉbhɨ ahayɨnza

hubhalolesye abhantu ɨmpyana.”

20 Lwa wabhaazya, ahagubiha ɨshitaabu shiila, ahaweezya hwa mwavwi wɨ nyumba ɨya‑apuutile na‑amanyiilile, ahakhala huje, ayande amanyizye. Abhantu bhonti bha bhahali mu nyumba muula bhahamʼmwenyaaga. 21 Ɨpo ahanda hubhamanyizye ahaga, “ƗNsimbo ɨMfinjile ɨzi zya mwʉmvwɨzye lwɨ‑ɨbhaazya, asanyʉʉnʉ zibhombɨɨshe.” 22 Bhonti bhahamʼmwamiha tee. Bhahaswiga hu mazwi aminza ga wayanga, bhahaga, “Ʉnʉ saga mwana wa Yoosefu?”

23 Wope ahabhabhʉʉzya ahaga, “Ɨmɨɨnye lwene huje, munza humbʉʉzye ɨnjango ɨnɨ aje, ‘Wee nʼganga, hwiponiaje weewe!’ Nantele munza‑aje, ‘Ɨmbombo zya tahazyʉmvwɨzye, ɨzyo zyʉ‑ʉzibhombile hwi‑ibooma ɨlyɨ Kapelenawumu, ɨshi ʉbhombe nɨ‑ɨpa pi‑ibooma lyaho.’ ” 24 Ahajendeelela ayanje ahaga, “Lyoli ɨhubhabhʉʉzya, saga alɨɨho ʉnʼkuwi ya‑ahwambɨɨlɨlwa pi‑ibooma lyakwe. 25 Mu nsiku ziila ʉnʼkuwi ʉEliya zya‑ahali, ɨmvula saga yahatoonyile hu maaha gataatu na meezi nʼtanda. Ɨnzala ɨngoosi yahagwa mu nsi yonti ɨyɨ Izilaeeli. Lyoli ɨhubhabhʉʉzya, mu nsiku ziila bhahali abhafwɨle bhinji mu nsi ɨyo. 26 Leelo ʉEliya saga ahasonteleziiwe hwa mʼfwɨle nka weeka mwɨ‑ɨbho abha hu nsi ɨyɨ Izilaeeli. Lyoli ahasonteleziiwe hwa mʼfwɨle ʉwa mu shipanga ɨshɨ Saleeputa mwi‑ibooma ɨlyɨ Siidoni. 27 Nantele mu nsiku ɨzya nʼkuwi ʉEliisha, bhahali abhantu bhabhinji abhɨ mpʉngo ɨyɨ makete mu nsi ɨyɨ Izilaeeli. Leelo saga ahalɨɨho nka weeka wa‑ahasangaluushe na‑apone, lyoli yʉ Naamani mwene wa‑ahafumile hu nsi ɨyɨ Siiliya.” 28 Abhantu bhonti bha bhahali mu nyumba ɨya‑apuutile na‑amanyiilile, lwa bhʉmvwa amazwi ɨgo, bhahaviitwa tee. 29 Nalinaali bhahɨmɨɨlɨla, bhahamʼmwefwa ʉYeesu mwi‑ibooma lyabho ɨlya hu Nazaleeti lya lyahali pa mwanya pi‑igamba. Bhahanzaga humʼbunshile hu mpalapaata ɨngoosi huje, agwɨlɨle pa nsi na‑afwe. 30 Leelo ʉmwene ahashila paahati yaabho, ahasogola.

ɄYeesu alolesya ikhone lyakwe

(Maalʉko 1:21-28)

31 Pamandɨ ʉYeesu ahiiha hwi‑ibooma ɨlyɨ Kapelenawumu lya lyahali mu mukowa ʉgwɨ Galilaaya. Ʉhwo ahabhamanyizya abhantu mu nyumba ɨya‑apuutile na‑amanyiilile isiku ɨlyɨ Sabaato. 32 Abhantu bhahakhasamala tee hu manyizyo zyakwe, pɨpo zyahali ni‑ikhone. 33 Isiku limo ɨlyɨ Sabaato, mu nyumba ɨya‑apuutile na‑amanyiilile muula, mwahali nʉ muntu wa‑ahali ni‑ipepo, lyahakhoola tee 34 lyahaga, “Wee Yeesu wa hu Nazaleeti! Ʉgandi hutitaamye. Tije ʉyɨnzɨle hutinangaanye? Ɨhumanya huje, aawe we naanu, aawe ʉli Mʼfinjile wa Ngʉlʉbhɨ.” 35 ɄYeesu ahalikhajila ipepo liila ahaga, “Pʉʉma myɨ! Fuma mwa muntu ʉnʉ!” Ɨpo ipepo liila lyahanʼgwisya pitagaalila lyabho, lyahafuma hwa muntu ʉla sinta humʼvwalazye. 36 Abhantu bhonti bhahaswiga tee, bhahabhʉzanyaaga bheene bhahagaga, “Ɨmanyizyo ɨzi ziswijizya tee! Ʉmuntu ʉnʉ adaga amapepo hwi‑ikhone na hu waamulo waakwe, gope gafuma!” 37 Ɨnongwa ɨzya Yeesu zyahanyampaana mu nsi ɨla yonti.

ɄYeesu ahubhaponia abhabhinu

(Mataayo 8:14-17; Maalʉko 1:29-39)

38 ɄYeesu ahafuma mu nyumba ɨya‑apuutile na‑amanyiilile, ahabhala mu nyumba ya muntu ʉmo wa bhahagaga Siimoni. Lwa waafiha, ahamʼmwaga ʉnyinavyala wa Siimoni abhinile ɨnzegema tee, bhahanʼnaabha ʉYeesu huje, amʼponie. 39 Ɨpo ʉYeesu ahɨmɨɨlɨla pa pɨɨpɨ nʉ mʼminu, ahayikhajila ɨnzegema ɨla, yope yahanʼneha. Pɨnɨɨpo ʉmʼminu ahapona, ahɨmɨɨlɨla na hwande hubhatengaanye ɨshalye.

40 Isanya lwa lyaswa, abhantu bhonti bha bhahali na bhabhinu abhɨ mpʉngo ɨzyɨ waaji nʉ waaji, bhahanʼtwalilaga ʉYeesu abhabhinu bhaabho. Wope ahabhaponiaga bhonti hwi‑idala ɨlya hubhapalamansye. 41 Nantele ahagefwaga amapepo hwa bhantu abhinji sha gayanganiha, gahagaga, “Aawe ʉli Mwana wa Ngʉlʉbhɨ!” ɄYeesu ahagakhajilaga huje, gagandi ayanje nahamo, pɨpo gahamʼmɨɨnye huje yʉ Mʼfyʉli.

42 Ɨndaabhɨ yaakwe lwa hwasha, ʉYeesu ahasogola mwi‑ibooma liila, ahabhala pamo pa saga pahali na bhantu. Ɨmpʉga ɨngoosi ɨya bhantu yahanda humʼmwanze, yahafiha pa‑ahali. Lwa bhamʼmwaga, bhahalɨnga hunʼkhaane huje, agandi asogole mwi‑ibooma lyabho. 43 Leelo ʉmwene ahabhabhʉʉzya ahaga, “Ɨhwanziwa alʉmbɨɨlɨle ɨNongwa ɨNyinza ɨzyɨ wumwɨnɨ ʉwa Ngʉlʉbhɨ mu mabooma aganjɨ. Ɨli lyɨnɨɨlyo nahasonteleziiwe hulibhombe.” 44 Ɨpo ʉYeesu ahasogola paala, ahabhala sha‑alʉmbɨɨlɨla mu nyumba ɨzya‑apuutile na‑amanyiilile mu mabooma gaminji aga mu nsi yonti ɨya Bhayahuudi.