Maalʉko 1

ƗNongwa ɨNyinza ɨzya Yeesu ʉKilisiti nanshi sha zyahasimbwilwe nʉ

Maalʉko

ɄYoohani ʉMwozi ahwanda alʉmbɨɨlɨle

(Mataayo 3:1-12; Luuka 3:1-18; Yoohani 1:19-28)

Ʉwu wʉ wandilo wɨ Nongwa ɨNyinza ɨzya Yeesu ʉKilisiti ʉMwana wa Ngʉlʉbhɨ. 2 Zyahasimbwilwe nʉ nʼkuwi wa Ngʉlʉbhɨ ʉYesaaya mu shitaabu shaakwe huje, ʉNgʉlʉbhɨ ahaga,

“Enya, nahayihunʼsonteelezya ʉmʼmomvi waanɨ ʉyo ahayihutagaalila.

Ahayihubhabhɨɨha nzɨɨla abhantu huje, bhahwejeelele,

nanshi abhantu sha bhalɨngaanya idala hu nongwa ya mwɨnɨ.”

3 “Ʉmʼmomvi ʉnʉ ya yʉʉla ahayilʉmbɨlɨlaga mu lʉʉgwa huje,

‘Lilɨnganyaaji idala lya Mwɨnɨ,

mugolosyaje idala lyakwe.’ ”

4 Ʉnʼsontwa ʉyo ahali yʉ Yoohani ʉMwozi, ʉyo ahakuwiilwe nʉ Yesaaya ʉnʼkuwi wa Ngʉlʉbhɨ. ɄYoohani ahʉmvwɨha mu lʉʉgwa, ahalʉmbɨlɨlaga huje, abhantu bhalaataje, bhazileshe ɨmbiibhi zyabho na hwozewe huje, ʉNgʉlʉbhɨ abhakhobhoshele ɨmbiibhi zyabho. 5 Abhantu abhinji afume hwi‑ibooma ɨlyɨ Yelusaleemu na mu mukowa gwonti ʉgwɨ Yudeeya bhahamʼmalilaga ʉYoohani huje, bhanʼtejeelezye. Bhahalambaga na huzileshe ɨmbiibhi zyabho, wope ahabhozyaga mwi‑isooho ɨlyɨ Yolodaani.

6 ɄYoohani ahakwataga amenda agɨ mawooya agɨ hanu ya bhayiga ngamiya, ahahwipinyaga ni‑ilamba ɨlyɨ nkwembe mu nʼsana gwakwe. Ɨshalye shaakwe shahali nzije nʉ wʉʉshi. 7 ɄYoohani ahalʉmbɨlɨlaga ahagaga, “Hwisinda lyanɨ abhala hwɨnze ʉmuntu ʉnʼgoosi hunshile anɨ. Anɨ saga ɨhondɨɨye abhe nʼkalwe waakwe huje, ɨnganʼsugamila na hwawule ɨnkusa zyɨ ndaatʉ zyakwe. 8 Anɨ ɨhubhoozya amwɨ na mɨnzɨ, leelo ʉmwene ahayihubhoozya nʉ Mʼpepo ʉMʼfinjile.”

ɄYeesu ahwozewa na‑ajelwe hu lʉʉgwa

(Mataayo 3:13-4:11; Luuka 3:21-22; 4:1-13)

9 Ɨnsiku ziziila, ʉYeesu ahɨnza afume hwi‑ibooma ɨlyɨ Nazaleeti, hu mukowa ʉgwɨ Galilaaya. Wope ʉYoohani ʉMwozi ahamʼmwozya pa Yolodaani paala. 10 ɄYeesu lwa waazʉbha lwene mu mɨnzɨ, ahalola ɨmwanya nyiigule, nʉ Mʼpepo ʉMʼfinjile ahwiha hwa mwene nanshi ɨnkʉnda. 11 Izwi lyahʉmvwɨha afume hu mwanya hu nongwa ya Yeesu huje, “Aawe we Mwana waanɨ ʉnʼkʉndwe, ʉhungwɨzya ʉmwoyo.”

12 Pɨnɨɨpo lwene ʉMʼpepo ʉMʼfinjile ahanʼnongozya ʉYeesu abhale hu lʉʉgwa. 13 Ahadɨɨla paala ɨnsiku amashʉmi ganɨ, ahajeliilwe abhombe ɨmbiibhi nʉ Seetano. Ahali peeka nɨ hanu, bhope abhantumi afume hwa Ngʉlʉbhɨ bhahamʼmombelaga.

ɄYeesu ahubhasalula abhasundwe abha hwande

(Mataayo 4:12-22; Luuka 4:14-15; 5:1-11)

14 ɄHeloode ʉAntipa ya‑ahali mwɨnɨ mu habhaazyo ɨho, ahanʼkʉnga ʉYoohani mu hoobhe. Sha‑ahwɨli mu hoobhe, ʉYeesu ahabhala hu mukowa ʉgwɨ Galilaaya, ahalʉmbɨlɨlaga ɨNongwa ɨNyinza ɨzya Ngʉlʉbhɨ. 15 Lwa‑ahalʉmbɨlɨlaga, ahagaga, “Ahabhaazyo ɨho hahakuwiilwe hafishile. Nantele, ʉwumwɨnɨ ʉwa Ngʉlʉbhɨ wupalamiiye. Ɨshi, lambaji na huzileshe ɨmbiibhi zyenyu, na huzyɨtɨshe ɨNongwa ɨNyinza ɨzya Ngʉlʉbhɨ.”

16 Isiku limo ʉYeesu lwa‑ashizanya munshɨnjɨ yɨ nsʉmbi ɨyɨ Galilaaya, ahanʼnola ʉSiimoni nʉ Anduleeya, bha bhahali bhanakwabho. Bhaheelaga ɨnswɨ nɨ nyeelo, pɨpo bhahali bheela nswɨ. 17 ɄYeesu ahaga, “Mumbɨnjɨlɨzyaje anɨ na‑abhe bhasundwe bhaanɨ. Lyoli ɨmbala hubhamanyizye hubhaleete abhantu hwaliinɨ, nanshi sha mwaheelaga ɨnswɨ hwisinda.” 18 Pɨnɨɨpo lwene bhahazileha ɨnyeelo zyabho, bhahanda humʼmɨnjɨɨlɨzye ʉYeesu.

19 Lwa waabhala pilongolela hashe peeka na bhasundwe bhaakwe bhabhɨɨlɨ, ʉYeesu ahanʼnola ʉYaakobo nʉ Yoohani abhavwɨlɨ bha Zebedaayo bhali mu waato, bhahazilɨnganyaaga ɨnyeelo zyabho. 20 Lwʉlwo, ahabhakwizya huje, bhabhe bhasundwe bhaakwe. Bhahanʼneha ʉZebedaayo ʉyise waabho na bhabhomba mbombo bhaakwe mu waato muula, bhahanda humʼmɨnjɨɨlɨzye ʉYeesu.

ɄYeesu alolesya ikhone lyakwe

(Luuka 4:31-37)

21 Ɨpo ʉYeesu na bhasundwe bhaakwe bhanɨ bhahabhala mwi‑ibooma ɨlyɨ Kapelenawumu. Isiku ɨlyɨ Sabaato lwa lyafiha, bhahatʉʉha mu nyumba ɨya‑apuutile na‑amanyiilile, wope ʉYeesu ahanda amanyizye paala. 22 Abhantu bhonti bha bhahanʼtejelezyaga bhahakhasamala tee hu manyizyo zyakwe. Bhahakhasamala tee, pɨpo saga ahamanyiziizye nanshi sha bhahamanyizyaga abhamanyizyi bhaabho abhɨ ndajizyo zya Moose, leelo nanshi ʉmuntu wa‑ali ni‑ikhone.

23 Mu nyumba yaabho ɨya‑apuutile na‑amanyiilile muula mwahali nʉ muntu wa‑ahali ni‑ipepo, lyahakhoola haani 24 lyahaga, “Wee Yeesu wa hu Nazaleeti! Ʉgandi hutitaamye. Tije ʉyɨnzɨle hutinangaanye? Ɨhumanya huje, aawe we naanu, aawe ʉli Mʼfinjile wa Ngʉlʉbhɨ!” 25 ɄYeesu ahalikhajila ipepo liila ahaga, “Pʉʉma! Fuma mwa muntu ʉnʉ!” 26 Ipepo liila lyahanʼnyinzanya haani, lyahakhoolile na‑afume mwa muntu ʉla. 27 Abhantu bhonti bhahaswiga haani, bhahabhʉzɨlɨzanya huje, “Yeenu yɨɨnɨ? Ɨmanyizyo ɨzyo njenu, zi‑ikhone! Nantele, enya, ali ni‑ikhone ɨlya‑adaje amapepo, gope gafuma!” 28 Ɨpo ɨnongwa ɨzya Yeesu zyahanyampaana nalinaali mu nsi zyonti ɨzya munshɨnjɨ mu mukowa gwonti ʉgwɨ Galilaaya.

ɄYeesu ahubhaponia abhabhinu

(Mataayo 8:14-17; Luuka 4:38-41)

29 Lwa walikhajila ipepo, ʉYeesu na bhasundwe bhaakwe ʉSiimoni, ʉAnduleeya, ʉYoohani nʉ Yaakobo bhahafuma mu nyumba ɨya‑apuutile na‑amanyiilile. Bhahabhala hu khaaya ya Siimoni nʉ Anduleeya. 30 Lwa bhaafiha lwene, bhahamʼmʉʉzya huje, ʉnyinavyala wa Siimoni mʼminu, abhinile ɨnzegema, agonile mu nyumba pa shitala shaakwe. 31 Ɨpo ʉYeesu ahazʉmbɨɨla pa‑agonile, ahanʼkhata ʉnʼkhono, ahamʼmʉʉsya. Lwʉnʉʉlwo ʉnyinavyala wa Siimoni ahapona ɨnzegema na hwande hubhatengaanye ɨshalye.

32 Isiku liliila nalyabheela ɨSabaato lwa yamaliha, abhantu abha pi‑ibooma paala bhahanʼnetelaga ʉYeesu abhabhinu abhinji na bha bhahali na mapepo. 33 Abhantu abhinji afume mwi‑ibooma liila nka bhahabhʉngaana pa lubhʉngʉlʉ lwa pa khaaya ya Siimoni nʉ Anduleeya. 34 ɄYeesu ahabhaponiaga abhantu bha bhahali nɨ mpʉngo ɨzyɨ waaji nʉ waaji. Nantele, ahagefwaga amapepo aminji, leelo saga ahagalehaga amapepo ɨgo huje gayanje, pɨpo gahamɨɨnye huje, ʉYeesu yʉ Mwana wa Ngʉlʉbhɨ.

ɄYeesu abhala apuute hu mfiso

(Luuka 4:42-44)

35 Ɨndaabhɨ yaakwe nashampwi, ʉYeesu ahafuma, ahabhala pamo pa saga pahali na bhantu, ahanda apuute. 36 Lwa bhamʼmwaga nʉʉmo mu nyumba, ʉSiimoni na bhamwabho bhahanda humʼmwanze. 37 Lwa bhamʼmwaga, bhahamʼmʉʉzya bhahaga, “Abhantu abhinji haani ʉhwo bhahuhwanza!” 38 Ʉmwene ʉYeesu ahabhaamula ahaga, “Ena, hwope hwahali shinza! Ɨshi saali tibhale hu mabooma aganjɨ aga mu pɨɨpɨ nɨ‑ɨli huje, hwope ɨmbale ɨndʉmbɨɨlɨle, pɨpo ya yɨɨnɨ ɨmbombo yɨ‑ɨnɨnzɨɨye.” 39 Ɨpo leelo, ahajenda mu mukowa gwonti ʉgwɨ Galilaaya na‑alʉmbɨɨlɨle mu nyumba zyabho ɨzya‑apuutile na‑amanyiilile, na hubheefwe abhantu amapepo.

ɄYeesu ahumʼponia na hunʼsangalusye ʉwɨ makete

(Mataayo 8:1-4; Luuka 5:12-16)

40 Isiku limo ʉmuntu ʉmo ʉwɨ mpʉngo ɨyɨ makete ahamʼmwɨnzɨla ʉYeesu, ahasugamila pa manama gaakwe, ahanʼnamba huje, “Ɨmɨɨnye huje, ʉbhajiiye humponie na hunsangalusye. Nkashele ʉgɨɨne, ɨlaabha ʉmponie na hunsangalusye.” 41 ɄYeesu ahanʼnolela ɨnkʉmbʉ, ahagolosya ʉnʼkhono gwakwe, ahamʼpalamansya ʉmʼminu, ahamʼmwamula ahaga, “Ɨhwanza. Pona na‑asangalushe!” 42 Pɨnɨɨpo lwene amakete gahamʼmwepa, ahasangaluha. 43-44 ɄYeesu ahanʼkhajiilizya huje, “Ʉgandi humʼmʉʉzye ʉmuntu wowonti ɨga. Leelo, bhalaga ʉhwilolesye hwa nʼsayi wa Ngʉlʉbhɨ. Ʉbhale, ʉfumye ɨnsangu hu nongwa ya‑asangalushe hwaho, nanshi ʉMoose sha‑ahalajiziizye, huje wubhe simishizi aje ʉponile.” Ahanʼsogozya lubhilo. 45 Leelo, ʉmuntu ʉla ahasogola paala, ahanda hubhamamile abhantu poponti paala na‑ayanje ʉYeesu zya‑amʼmombɨɨye. Lwa wakhonzya ɨsho, ʉYeesu ahanda apootwe atʉʉshe mu mabooma gogonti gaala pa pazelu. Ahabhanga mwene hwʉnzɨ hu mabooma, leelo abhantu bhahamʼmwɨnzɨlaga afume ʉhwu nʉ‑ʉhwu.