ɄYoohani ʉMwozi ahwanda alʉmbɨɨlɨle
3
ɄYeesu lwa‑ali hu Nazaleeti,
ahafumiiye ʉmuntu ʉmo ʉyo itaawa lyakwe ahali yʉ Yoohani ʉMwozi.
Ʉmuntu ʉyo ahalolɨɨshe mu lʉʉgwa ʉlwa hu mukowa ʉgwɨ Yudeeya.
Ahalʉmbɨlɨlaga ahagaga,
2 “Lambaji na huzileshe ɨmbiibhi zyenyu,
pɨpo ʉwumwɨnɨ ʉwa hu mwanyaa wupalamiiye.”
3 ɄYoohani ʉyo ya yʉʉyo ahayangwaga nʉ Ngʉlʉbhɨ ashilile hwa nʼkuwi waakweb ʉYesaaya huje,
“Ʉmʼmomvi ʉnʉ ya yʉʉla ahayilʉmbɨlɨlaga mu lʉʉgwa huje,
‘Lilɨnganyaaji idala lya Mwɨnɨ,
mugolosyaje idala lyakwe.’ ”c
4 ɄYoohani ahakwataga amenda agɨ mawooya agɨ hanu ya bhayiga ngamiya,
ahahwipinyaga ni‑ilamba ɨlyɨ nkwembe mu nʼsana gwakwe.
d Ɨshalye shaakwe shahali nzije nʉ wʉʉshi.
5 Abhantu abhinji bhahamʼmwɨnzɨlaga afume hwi‑ibooma ɨlyɨ Yelusaleemu na hu mukowa gwonti ʉgwɨ Yudeeya na mu mbali zyonti ɨzya hunshɨnjɨ yi‑isooho ɨlyɨ Yolodaani.
6 Bhahalambaga na huzileshe ɨmbiibhi zyabho,
wope ahabhozyaga mwi‑isooho ɨlyɨ Yolodaani.
7 Leelo ʉmwene ʉYoohani lwa waalola aBhafalisaayo na Bhasadukaayoe bhahumʼmwɨnzɨla hu winji huje abhoozye,
ahabhabhʉʉzya ahaga,
“Amwɨ muli bhabhiibhi nanshi ɨnzoha!
f Muyiga mugashɨmbɨla ʉlufundo lwa Ngʉlʉbhɨ lwa lwahayɨnza,
hwi‑idala ɨlya hwozewe sinta alambe hu lyoli?
8 Ɨnjendo zyenyu zilolesyaje huje mulambile na huzileshe lwonti ɨmbiibhi zyenyu.
9 Muleshe asɨɨbhe huje,
‘Tiponile hu nongwa ya maama weetu ʉAbulahaamu.’
g Lyoli ɨhubhabhʉʉzya,
ʉNgʉlʉbhɨ abhajiiye hugagalulanye amawe ɨga abhe bhaana bha Abulahaamu!
10 Ɨshi,
ʉNgʉlʉbhɨ ahwibhɨɨshɨle nzɨɨla ayazye abhantu bha saga bhabhomba ɨnyinza,
nanshi ʉmuntu wa‑akhɨɨte ɨntemo na hwibhɨɨshe nzɨɨla ateme amakwi.
Ɨshi nkashele ikwi saga lihwela amantongooni aminza,
litemwa na‑ataagwe mu mwoto.
11 Anɨ ɨhubhoozya amwɨ na mɨnzɨ abhonesye huje mulambile hu mbiibhi zyenyu.
Leelo ʉyo wa‑ahwɨnza hwisinda lyanɨ ali ni‑ikhone hunshile anɨ.
Anɨ saga ɨhondɨɨye abhe nʼkalwe waakwe huje ɨngasatula ɨnkusa zyɨ ndaatʉ zyakwe.
h Ʉyo ahayihubhoozya nʉ Mʼpepo ʉMʼfinjile na hu mwoto.
12 Ʉmwene ahayihubhabagulanya abhagolosu na bhabhomba mbiibhii nanshi ʉmuntu wa‑agulusya ɨngano pa lubhʉngʉlʉ.
Abhʉngaanya ɨngano na huyibhɨɨshe mu shanga,
leelo ameelelo ahugapemba mu mwoto gwa saga guzima nka lumo.”
Ahwozewe hwa Yeesu
13 Ɨpo ʉYeesu ahafiha pi‑isooho ɨlyɨ Yolodaani afume hu mukowa ʉgwɨ Galilaaya huje,
ayoozewe nʉ Yoohani ʉMwozi.
14 Leelo ʉmwene ʉYoohani ahalɨnga huje akhaane.
Ahamʼmʉʉzya ʉYeesu ahaga,
“Ɨshi,
zili wɨlɨ huje aawe ʉyɨnze hwaliinɨ?
Anɨ nɨɨnɨ ɨhwanziwa ahwozewe naawe.”
15 ɄYeesu ahamʼmwamula ahaga,
“Aawe ʉbhombe ɨsho,
pɨpo tihwanziwa hugabhombe gonti gaala ʉNgʉlʉbhɨ ga‑ahwanza.”
Ɨpo ʉYoohani ahɨɨtɨha,
ahamʼmwozya.