Abhamanyiihanyi abhɨ nzota bhabhala humʼpuute ʉYeesu
2
ɄYeesu ahapapwilwe mwi‑ibooma ɨlyɨ Beseleheemu,
hu mukowa ʉgwɨ Yudeeya,
hu habhaazyo ɨho ʉmwɨnɨ ʉHeloode ʉNʼgoosia lwa‑alongozya.
Ɨshi,
hu habhaazyo ɨho,
mwi‑ibooma ɨlyɨ Yelusaleemub bhahafumiiye abhamanyiihanyi abhɨ nzota bha bhahafumile ʉhwo litukulila isanya.
Abhamanyiihanyi ɨbho bhahaga,
2 “Ali hwoshi ʉyo apapwilwe huje abhe Mwɨnɨ wa Bhayahuudi?
Timɨɨnye huje apapwilwe,
pɨpo tiyilolile ɨntondwe ʉhwo hwa litukulila isanya.
Ɨshi sha shɨɨsho atɨ tɨnzɨle humʼpuute.”
3 Ʉmwɨnɨ ʉHeloode ʉNʼgoosi lwa wʉmvwa ɨgo,
ahataamiwa mu mwoyo gwakwe peeka na bhantu bhonti abha hu Yelusaleemu.
4 Ɨpo ahabhabhʉngaanya abhalongozi bhonti bha bhasayi bha Ngʉlʉbhɨ,
c peeka na bhamanyizyi abhɨ ndajizyo zya Moose,
d ahabhabhʉzɨɨlɨzya ahaga,
“ɄMʼfyʉli ahayipaapwa hwi?”
5 Bhope bhahamʼmwamula bhahaga,
“Ahwanziwa apaapwe hwi‑ibooma ɨlyɨ Beseleheemu,
hu mukowa ʉgwɨ Yudeeya.
Ɨgo ga gɨɨgo ʉnʼkuwi ahasimbile huje,
6 ‘Nawe libooma lyɨ Beseleheemu,
wʉ‑ʉli hu nsi ɨyɨ shikholo ɨsha Yuuda,
aawe saga wa‑asyonshelwe lwonti
hu longozi wɨ shikholo ɨsha Yuuda!
Mwaliiwe ahayifumila ʉnʼnongozi
ʉyo ahayibha nʼdiimi wa bhantu bhaanɨ aBhaizilaeeli.’ ”e
7 Ɨpo ʉHeloode ʉNʼgoosi ahabhakwizya hu mfiso abhamanyiihanyi abhɨ nzota bhaala huje bhamʼmʉʉzye ɨlyoli lwa bhahayilolile ɨntondwe ɨla.
8 Ɨpo ahabhasonteelezya hwi‑ibooma ɨlyɨ Beseleheemu,
ahabhabhʉʉzya ahaga,
“Bhalaji mubhʉzɨɨlɨzye shinza huje mumanye ʉhwo ʉmwana ʉyo hwa‑alɨɨho.
Nkashele mwamʼmwaga,
mwɨnze lubhilo,
mumbʉʉzye huje nanɨ ɨmbale humʼpuute.”
9 Hu habhaazyo abhamanyiihanyi bhaala lwa bhʉmvwa amazwi ga mwɨnɨ,
bhahasogola.
Ɨntondwe ɨla ya bhahayilolile ɨmbali ɨla hwa litukulila isanya,
yahabhatagalilaga nantele,
bhope bhahayibhɨnjɨlɨlaga afishe lwa yaafiha na hwɨmɨɨlɨle pa‑alɨɨho ʉmwana.
10 Ɨshi,
lwa bhahayilola ɨntondwe ɨla,
bhahasha tee.
11 Ɨpo bhahatʉʉha mu nyumba,
bhahanʼnola ʉmwana ali peeka nʉ nyina waakwe ʉMaliya,
bhahanʼsugamilila,
bhahamʼpuuta.
Bhahasatula ɨmbuguulu zyabho,
bhahafumya ɨmpeesya hwa mwana.
Ɨmpeesya ɨzyo zyahali zahaabu,
vintu ɨvya‑asushizye nɨ nyemba zya zinunshila shinza.
12 Ɨshi,
ʉNgʉlʉbhɨ ahabhasunda mu nzozi huje bhasahasheele aweele nantele hwa Heloode ʉNʼgoosi.
Ɨpo bhahashilila idala ɨlyɨnjɨ aweele hu nsi yaabho.
Ashɨmbɨɨlɨle hu nsi ɨyɨ Miisili
13 Abhamanyiihanyi abhɨ nzota bhaala lwa bhasogola,
ʉnʼtumi wa Mwɨnɨ ahamʼmwɨnzɨla ʉYoosefu mu nzozi,
ahamʼmʉʉzya ahaga,
“Daamuha!
Ʉmʼmweje ʉmwana nʉ nyina waakwe,
mushɨmbɨɨlɨle hu nsi ɨyɨ Miisili.
Mushɨmbɨɨlɨle ʉhwo,
pɨpo ʉmwɨnɨ ʉHeloode ʉNʼgoosi ahumʼmwanza ʉmwana ʉyo huje anʼgoje.
Ɨshi,
musyale huhuula afishe hu habhaazyo ɨho lwa nahayihubhabhʉʉzya huje muweele.”
14 Ɨpo ʉsiku wuwuula ʉYoosefu ahadaamula,
ahamʼmwega ʉnʼshɨ waakwe nʉ mwana waakwe,
ahashɨmbɨɨlɨla hu nsi ɨyɨ Miisili.
15 Ahakhala ʉhwo afishe hu habhaazyo ɨho ʉHeloode lwa waafwa.
Ɨga gonti gahabhombɨɨshe ɨsho huje izwi liila lya lyahayangwilwe nʉ nʼkuwi wa Mwɨnɨ ʉNgʉlʉbhɨ libhombeshe huje,
“Nahanʼkwiziizye ʉmwana waanɨ afume hu nsi ɨyɨ Miisili.”f
ɄHeloode ahubhagoga abhaana abhɨ shilume abha hu Beseleheemu
16 ɄHeloode ʉNʼgoosi lwa waamanya huje abhamanyiihanyi abhɨ nzota bhaala bhanʼgobɨɨye,
ahaviitwa tee.
Ɨpo ahalajizya huje abhaana bhonti abhɨ shilume bhagogwe,
ahwande abhaana abheela afishe hwa bhaana abhɨ maaha gabhɨɨlɨ,
abha hu Beseleheemu peeka na bha mu mabooma aganjɨ ɨgo gahali munshɨnjɨ.
Ahabhombile ɨsho alɨngaane na habhaazyo ɨho ahabhʉzɨɨwe afume hwa bhamanyiihanyi abhɨ nzota.
17 Ɨsho sha lyahabhombɨɨshe izwi lya‑ahayanjile ʉnʼkuwi wa Ngʉlʉbhɨ ʉYelemiya huje,
18 “Izwi igoosi ɨlya‑azondeelezye lyahʉmvwɨha hwi‑ibooma ɨlyɨ Laama.
ɄLaaheli ahubhazondela abhaana bhaakwe,
nantele,
saga ahwanza ajinjiziwe ʉmwoyo,
pɨpo abhaana bhaakwe nabhamo nantele.”g
Aweele afume hu nsi ɨyɨ Miisili
19 ɄHeloode ʉNʼgoosi lwa waafwa,
ʉnʼtumi wa Mwɨnɨ ʉNgʉlʉbhɨ ahamʼmwɨnzɨla nantele ʉYoosefu mu nzozi huula hu nsi ɨyɨ Miisili.
20 Ahamʼmʉʉzya ahaga,
“Bhʉʉha,
ʉmʼmweje ʉmwana nʉ nyina waakwe,
ʉweele hu nsi ɨyɨ Izilaeeli,
pɨpo bhaala bha bhahanzaga hunʼgoje ʉmwana ʉyo,
bhafwiye.”
21 Ɨpo ʉYoosefu ahabhʉʉha,
ahamʼmwega ʉnʼshɨ waakwe nʉ mwana waakwe,
bhahaweela hu nsi ɨyɨ Izilaeeli.
22 Leelo ʉmwene ʉYoosefu lwa waamanya huje,
ʉAlikaleeyo ʉmwana wa mwɨnɨ ʉHeloode ahali mwɨnɨ wa hu mukowa ʉgwɨ Yudeeya pa‑ahalongozyaga ʉyise waakwe,
ahoogopa abhale huula.
Ɨshi,
lwa wasundwa mu nzozi,
ahabhala hu mukowa ʉgwɨ Galilaaya.h
23 Ʉhwo,
ahakhala hwi‑ibooma ɨlyɨ Nazaleeti.
Ɨsho sha lyahabhombeha izwi lya lyahayangwilwe hu nongwa ya Yeesu hwi‑idala ɨlya bhakuwi bha Ngʉlʉbhɨ huje,
“Ahayibha akwiziwa Nʼnazaleeti.”