ɄYeesu ajelwa nʉ Seetano
4
Ɨpo ʉYeesu ahalongozewa nʉ Mʼpepo ʉMʼfinjile hu lʉʉgwa huje ajelwe nʉ Seetano.a
2 ɄYeesu ahamala ʉhwo ɨnsiku amashʉmi ganɨ,
ʉsanya na nʉsiku ahahwiyiima alye ɨshalye.
Ɨpo hu malishilo,
ɨnzala yahanʼnuma.
3 Ɨpo ʉnʼjeli ʉSeetano ahamʼmwɨnzɨla ʉYeesu ahaga,
“Aawe nkashele ʉli Mwana wa Ngʉlʉbhɨ,
b ʉgabhʉʉzye amawe ɨga huje gabhe ntogito.”
4 Leelo ʉmwene ʉYeesu ahamʼmwamula ahaga,
“Ɨsimbwilwe mu Nsimbo ɨMfinjile huje,
‘Ʉwʉʉmi wa muntu saga wufumilana nɨ shalye sheene,
leelo hu shila lizwi lya lifuma hwa Ngʉlʉbhɨ.’ ”c
5 Ɨpo ʉSeetano ahanʼtwala ʉYeesu hwi‑ibooma ifinjile ɨlyɨ Yelusaleemu,
ahanʼzʉvya pa mwanya pa shidunkud pa lubhaga lwɨ nyumba ɨmfinjile ɨya Ngʉlʉbhɨ.e
6 Ahamʼmʉʉzya ahaga,
“Aawe nkashele ʉli Mwana wa Ngʉlʉbhɨ,
ʉhwitaaje pa nsi.
Saga ʉbhala‑avwalale,
pɨpo ɨsimbwilwe mu Nsimbo ɨMfinjile huje,
‘ɄNgʉlʉbhɨ anza hubhasonteelezye abhantumi bhaakwe
huje bhaʼtoneele mu makhono gaabho
huje ʉsahagwɨle mu mawe na‑avwalale poshe ɨshinama.’ ”f
7 ɄYeesu ahaga,
“Nantele,
ɨsimbwilwe mu Nsimbo ɨMfinjile huje,
‘Ʉgandi hunʼjele ʉMwɨnɨ ʉNgʉlʉbhɨ,
ʉNgʉlʉbhɨ waaho.’ ”g
8 Nantele,
ʉSeetano ahanʼtwala ʉYeesu pa mwanya tee pi‑igamba,
ahanʼnanga ʉwumwɨnɨ ʉwɨ nsi zyonti peeka nʉ mwamu waakwe.
9 Ahamʼmʉʉzya ahaga,
“Nkashele wansugamilila anɨ na humpuute,
ɨmbala hupeele ɨvi vyonti.”
10 Ɨpo ʉYeesu ahaga,
“Epa ɨpa,
wee Seetano!
Enya,
ɨsimbwilwe mu Nsimbo ɨMfinjile huje,
‘Ʉmʼpuutaje ʉMwɨnɨ ʉNgʉlʉbhɨ,
ʉNgʉlʉbhɨ waaho.
Nantele,
ʉmʼmombelaje yʉʉyo mwene.’ ”h
11 Ɨpo ʉSeetano ahanʼneha ʉYeesu,
abhantumi afume hwa Ngʉlʉbhɨ bhahɨnza,
bhahamʼmombelaga.
ɄYeesu ahwanda ɨmbombo yaakwe hu mukowa ʉgwɨ Galilaaya
12 ɄYeesu lwa wʉmvwa huje ʉYoohani ʉMwozi akʉngwɨlwe mu hoobhe,
ahabhala hu mukowa ʉgwɨ Galilaaya,
ahafiha mwi‑ibooma ɨlyɨ Nazaleeti.
13 Ɨshi,
ʉYeesu ahasogola hu Nazaleeti,
ahabhala akhale hwi‑ibooma ɨlyɨ Kapelenawumu.
Ibooma ɨlyo lili munshɨnjɨ yɨ nsʉmbi ɨyɨ Galilaaya.
Nantele lipahana nɨ nsi ɨzyɨ shikholo ɨsha Zabulooni nɨ sha Nafutaali.
14 Gahabhombɨɨshe ɨsho huje libhombeshe izwi liila lya‑ahayanjile ʉNgʉlʉbhɨ hwi‑idala ɨlya nʼkuwi waakwe ʉYesaaya huje,
15 “Ɨnsi ɨya Zabulooni nɨ ya Nafutaali
zili mwi‑idala lya libhala hu nsʉmbi,
mwi‑isyɨla ɨli‑isooho ɨlyɨ Yolodaani.
Ʉhwo hu mukowa ʉgwɨ Galilaaya,
ʉmwo mwa bhakhala abhantu bha saga Bhayahuudi.
16 Abhantu ɨbho bhakhala mu hiisi,
bhalolile ʉlukhozyo ʉlugoosi.
Bhope ɨbho bhakhala mu hiisi ɨya‑afwe,
ʉlukhozyo ʉlwa shampwi lwahabhakhozya.”i
17 Afume hu habhaazyo haala,
ʉYeesu ahanda alʉmbɨɨlɨle ahagaga,
“Lambaji na huzileshe ɨmbiibhi zyenyu,
pɨpo ʉwumwɨnɨ ʉwa hu mwanya wupalamiiye.”
ɄYeesu ahubhasalula abhasundwe abha hwande
18 Isiku limo ʉYeesu lwa‑ajenda munshɨnjɨ yɨ nsʉmbi ɨyɨ Galilaaya,
ahabhalola abheela nswɨ bhabhɨɨlɨ,
abhanakwabho,
ʉSiimoni ʉyo itaawa lyakwe ahali yʉ Peeteli nʉ nʼdoodo waakwe ʉAnduleeya.
Abheela nswɨ ɨbha bhaheelaga ɨnswɨ nɨ nyeelo mu nsʉmbi.
19 ɄYeesu ahabhabhʉʉzya ahaga,
“Mumbɨnjɨlɨzyaje anɨ na‑abhe bhasundwe bhaanɨ.
Lyoli ɨmbala hubhamanyizye hubhaleete abhantu hwaliinɨ nanshi sha mwaheelaga ɨnswɨ hwisinda.”j
20 Pɨnɨɨpo lwene bhahazileha ɨnyeelo zyabho,
bhahanda humʼmɨnjɨɨlɨle ʉYeesu.
21 ɄYeesu lwa wajendeelela pilongolela hashe,
ahabhalola abhanakwabho bhabhɨɨlɨ abhanjɨ,
ʉYaakobo nʉ Yoohani,
abhavwɨlɨ bha Zebedaayo.
Bhabhɨɨlɨ ɨbho bhahali mu waato peeka nʉ yise waabho ʉZebedaayo,
bhahazilɨnganyaaga ɨnyeelo zyabho.
ɄYeesu ahabhakwizya bhope.
22 Lwʉlwo,
bhahawuleha ʉwaato nʉ yise waabho,
na humʼmɨnjɨɨlɨzye ʉYeesu.
ɄYeesu ahubhamanyizya abhantu na hubhaponie abhabhinu
23 ɄYeesu ahazyʉngʉʉlaga hu mukowa gwonti ʉgwɨ Galilaaya.
Ahatʉʉhaga mu nyumba ɨzya‑apuutile na‑amanyiililek ɨzya Bhayahuudi,
ahabhamanyizyaga abhantu na‑alʉmbɨɨlɨle ɨNongwa ɨNyinza ɨzyɨ wumwɨnɨ ʉwa hu mwanya na hubhaponie ʉbhinu ʉwɨ waaji wonti.
24 Ɨpo ɨnongwa zyakwe zyahanyampaana tee afishe mu mukowa gwonti ʉgwɨ Siiliya.
Abhantu bhahabhatwalaga abhabhinu bha bhahali nɨ mpʉngo ɨzyɨ waaji wuwinji.
Mwɨ‑ɨbho,
bhahali ɨbho bha bhahali na mapepo,
bha bhahagwanga shaaha na‑afumye itatafula hwi‑ilomu,
na bha bhahafwiye hundwɨmo.
Ʉmwene ʉYeesu ahabhaponiaga ɨbho bhonti.
25 Ɨmpʉga ɨzya bhantu abhinji tee zyahali zihumʼmɨnjɨɨlɨzya afume hu mukowa ʉgwɨ Galilaaya,
hu mabooma ishʉmi aga hu Dekapooli,
l hwi‑ibooma ɨlyɨ Yelusaleemu,
hu mukowa ʉgwɨ Yudeeya na hwi‑isyɨla ɨli‑isooho ɨlyɨ Yolodaani.