ɄYeesu ahubhasalula abhasundwe abha hwande
5
Isiku limo ʉYeesu ahɨmɨlɨɨye panshɨnjɨ pa nsʉmbi ɨyɨ Galilaaya,
a ahamanyizyaga izwi lya Ngʉlʉbhɨ.
Abhantu abhinji bhahamʼbijilizyaga lwa bhahunʼtejeelezya lwa‑ayanga izwi lya Ngʉlʉbhɨ.
2 ɄYeesu ahazilola ɨnyaato zibhɨɨlɨ panshɨnjɨ pa nsʉmbi.
Abheela nswɨ saga bhahali,
pɨpo bhahali ahwozye ɨnyeelo zyabho.
3 ɄYeesu ahatʉʉha mu waato wa wahali wa Siimoni.
Ahanʼnaabha ʉSiimoni awusejeezye hashe muuhati mu nsʉmbi.
Ɨpo ʉYeesu ahakhala mu waato,
na‑ajendeelele huyimanyizye ɨmpʉga ɨya bhantu.
4 Lwa waamala amanyizye,
ahamʼmʉʉzya ʉSiimoni ahaga,
“Twala ʉwaato pa pibhiiye,
ɨpo mwisye ɨnyeelo zyenyu,
mwele ɨnswɨ.”
5 ɄSiimoni ahamʼmwamula ʉYeesu ahaga,
“Wee Mwɨnɨ,
tibhombile ɨmbombo ɨya hwele ʉsiku wonti,
saga tizyajile nka zimo.
Leelo,
alɨngaane na‑aje,
ʉyanjile aawe,
ɨnza hwisye ɨnyeelo.”
6 ɄSiimoni na bhamwabho bhahiisya ɨnyeelo zyabho.
Lwa bhiisya,
bhaheela ɨnswɨ zinyinji tee,
ɨnyeelo zyope zyahanzaga adaduuhane.
7 Bhahabhapalisya abhamwabho bha bhahali mu waato ʉwɨnjɨ huje bhɨnze hubhaavwe.
Lwa bhɨnza,
bhahamemya ɨnswɨ mu nyaato zyonti zibhɨɨlɨ.
Ɨnswɨ zyahali nyinji tee,
zyope ɨnyaato zyahanzaga adwine.
8 ɄSiimoni ʉyo itaawa lyakwe ɨlyamwabho bhahagaga Peeteli,
lwa waalola ɨzyo,
ahasugamila pa manama ga Yeesu,
ahaga,
“Wee Mwɨnɨ,
ɨhulaabha ʉyeepe paliinɨ,
pɨpo anɨ ɨndi mʼmomba mbiibhi.”
9 ɄSiimoni ahayanjile ɨsho alɨngaane na‑aje,
ʉmwene na bhanjɨ bhonti bha bhahali peeka,
bhahaswijile tee hu winji wɨ nswɨ zya bhaheelile.
10 Bhope abhaana bha Zebedaayo,
ʉYaakobo nʉ Yoohani bha bhahali bheela nswɨ peeka nʉ Siimoni,
bhahaswiga tee.
Ɨpo ʉYeesu ahamʼmʉʉzya ʉSiimoni ahaga,
“Siimoni,
ʉgandi hwogope!
Afume sanyʉʉnʉ ɨmbala humanyizye hubhaleete abhantu hwaliinɨ nanshi sha waheelaga ɨnswɨ hwisinda.”b
11 Ɨpo bhahazitwala ɨnyaato zyabho panshɨnjɨ pa nsʉmbi,
bhahazileha zyonti pɨnɨɨpo,
bhahanda humʼmɨnjɨɨlɨle ʉYeesu.
ɄYeesu ahumʼponia na hunʼsangalusye ʉwɨ makete
12 Isiku limo ʉYeesu ahatʉʉha mwi‑ibooma limo ɨlya hu mukowa ʉgwɨ Galilaaya.
Ʉmwo ahali ʉmuntu ʉmo ʉwɨ mpʉngo ɨyɨ maketec ʉmʼbɨlɨ gwonti.
Ʉmuntu ʉla lwa wanʼnola ʉYeesu,
ahagwa kupama pa nsi,
ahanʼnamba ahaga,
“Wee Mwɨnɨ,
ɨmɨɨnye huje,
ʉbhajiiye humponie na hunsangalusye.
Nkashele ʉgɨɨne,
ɨlaabha ʉmponie na hunsangalusye.”
13 ɄYeesu ahagolosya ʉnʼkhono gwakwe,
ahamʼpalamansya ahaga,
“Ɨhwanza.
Pona na‑asangalushe!”
Ahabhaazyo hɨnɨɨho amakete gahamʼmwepa mu mʼbɨlɨ gwakwe.
14 Ahanʼkhajiilizya ʉmuntu ʉla ahaga,
“Ʉgandi humʼmʉʉzye ʉmuntu wowonti.
Leelo ʉbhale,
ʉhwilolesye hwa nʼsayi wa Ngʉlʉbhɨ,
ʉfumye ɨnsangu hu nongwa ya‑asangalushe hwaho,
nanshi ʉMoose sha‑ahalajiziizye,
huje wubhe simishizi aje ʉponile.”
15 Leelo ɨnongwa ɨzya Yeesu zyahonjelelaga anyampaane ɨmbali zyonti.
Abhantu abhinji bhahabhʉngaanaga hunʼtejeelezye na‑apone ɨmpʉngo zyabho,
16 leelo hahinji ʉmwene ahabhalaga hwa saga bhali abhantu huje,
apuute.
ɄYeesu ali ni‑ikhone ɨlya‑akhobhoshele ɨmbiibhi
17 Hu habhaazyo hamo,
ʉYeesu ahabhamanyizyaga abhantu mu nyumba ɨmo.
Mwɨ‑ɨbho bhahalɨɨho aBhafalisaayod na bhamanyizyi abhɨ ndajizyo zya Moosee afume mu vipanga vyonti ɨvya mu mukowa ʉgwɨ Galilaaya,
ʉgwɨ Yudeeya na mwi‑ibooma ɨlyɨ Yelusaleemu.
Ikhone lya Mwɨnɨ ʉNgʉlʉbhɨ lyahali peeka nawo hubhaponie abhabhinu.
18 Ɨpo bhahɨnza abhantu bhamo,
bhahanʼnyemuuye ʉmuntu mu shɨlɨlɨ wa‑ahafwiye hundwɨmo.
Abheene bhahanzaga hunʼtʉʉsye mu nyumba huje,
bhamʼmɨɨshe pa‑ali ʉYeesu.
19 Leelo bhahapootwa hunʼtʉʉsye ʉmʼminu ʉla pa lyango,
pɨpo abhantu bhahamemile tee.
Ɨpo bhahazʉbha pa mwanya pa nyumba,
bhahadobhola igʉlʉ,
f bhahamʼmwisya ʉmʼminu ʉla mu shɨlɨlɨ paahati pa‑ahakhɨɨye ʉYeesu.
20 ɄYeesu lwa waalola zya bhabhomba abhantu bhaala,
ahamanya huje,
bhali nʉ lwɨtɨho.
Ahamʼmʉʉzya ʉmʼminu ʉla ahaga,
“Mʼmanyani,
ɨmbiibhi zyaho zikhobhosheliilwe.”
21 Ɨpo abhamanyizyi abhɨ ndajizyo zya Moose na Bhafalisaayo bhahanda abhʉzɨlɨzanye huje,
“Ʉmuntu ʉnʉ ayanga bhʉlɨ bhʉlɨ ɨsho?
Ahunʼniga yʉ Ngʉlʉbhɨ.
Nʉʉmo ʉmuntu wa‑agabhakhobhoshela abhantu ɨmbiibhi,
lyoli yʉ Ngʉlʉbhɨ mwene.”
22 ɄYeesu ahazimanya ɨnsɨɨbho zyabho ahaga,
“Yeenu mu mooyo geenyu musɨɨbha ɨsho?
23 Ɨshi,
lilihu lya lili lipʉpʉʉsu tee,
humʼmʉʉzye ʉmuntu huje,
‘Ɨmbiibhi zyaho zikhobhosheliilwe,’
awe humʼmʉʉzye huje,
‘Ɨmɨɨlɨla,
bhalaga’?
24 Ɨshi leelo,
ɨmbalanje huje,
lyoli anɨ nɨMwana wa Muntug ɨndi ni‑ikhone ɨlya hubhakhobhoshele ɨmbiibhi abhantu mu nsi.”
Ɨpo ʉYeesu ahamʼmʉʉzya ʉmuntu ʉla wa‑ahafwiye hundwɨmo huje,
“Ɨhubhʉʉzya ɨnjiga,
ɨmɨɨlɨla,
ega ɨshɨlɨlɨ shaaho,
bhalaga hu khaaya!”
25 Pɨnɨɨpo ʉmuntu ʉla ahɨmɨɨlɨla pa maaso gaabho,
ahanyeemula ɨshɨlɨlɨ shaakwe,
ahasogola,
ahaweela hu khaaya yaakwe sha‑ahumʼmwamiha ʉNgʉlʉbhɨ.
26 Ɨshi,
bhonti bhahaswiga tee na‑abhe nʉ wooga ʉgoosi,
ɨpo bhahaga,
“Asanyʉʉnʉ tizilolile ɨzya‑aswijizye.”
Nantele,
bhahamʼmwamihaga ʉNgʉlʉbhɨ.
ɄYeesu ayɨnzɨle hubhafyʉle abhabhomba mbiibhi
27 Pamandɨ ʉYeesu ahafuma mu nyumba ɨla,
ahanʼnola ʉnʼsomvya sonko ʉmo wa bhahagaga Laawi,
h akhɨɨye pa‑ahasomvyaga ɨsonko.
ɄYeesu ahamʼmʉʉzya ahaga,
“Ɨnzaga,
ʉmbɨnjɨlɨzyaje anɨ,
ʉbhe nʼsundwe waanɨ.”
28 Wope ʉLaawi ahɨmɨɨlɨla,
ahavileha vyonti,
ahanda humʼmɨnjɨɨlɨle ʉYeesu.
29 ɄLaawi ahanʼtengaanya ʉYeesu ɨshalye ɨsha‑akwɨlane pa khaaya yaakwe.
Yope ɨmpʉga ya bhasomvya sonko na bhantu abhanjɨ abhinji bhahalya ɨshalye peeka nabho.
30 Abhamanyizyi abhɨ ndajizyo zya Moose bha bhahali Bhafalisaayo na Bhafalisaayo abhanjɨ,
bhahanda hubhabhune abhasundwe bha Yeesu bha bhahali peeka nawo bhahagaga,
“Yeenu mulya na‑amwele peeka na bhasomvya sonko na bhabhomba mbiibhi?”i
31 ɄYeesu ahabhaamula ahaga,
“Abhantu bha saga bhabhinile lwonti,
saga bhahumʼmwanza ʉnʼganga,
lyoli abhabhinu bha bhahumʼmwanza ʉnʼganga.
32 Anɨ saga ɨnɨnzɨle hubhakwizye bha bhahwilola huje bhagolosu,
ndaadi!
Ɨnɨnzɨle hubhakwizye abhabhomba mbiibhi huje,
bhalambaje.”
ɄYeesu alɨngaanisya ɨmanyizyo ɨnkʉʉlʉ nɨ njenu
33 Abhantu bhamo bhahamʼmʉʉzya ʉYeesu bhahaga,
“Abhasundwe bha Yoohani na bhasundwe bha Bhafalisaayo bhahwiyiima alye ɨnsiku zimo,
bhajendeelela hu mpuuto lwene.
Leelo abhasundwe bhaaho bhalya na‑amwele ɨnsiku zyonti!”
34 ɄYeesu ahabhaamula ahaga,
“Bha bhaniilwe nʉ mweji bhabhajiiye wɨlɨ ahwiyiime alye,
lwa bhali peeka nʉ mweji?
35 Leelo hu nsiku zya zihwɨnza,
abhalʉgʉ bhaakwe lwa bhahayihumʼmwefwa ʉmweji paahati pa bhaanwa bhaakwe,
ɨpo pa pɨɨpo abhaanwa bhahayihwiyiima alye.”
36 Ahabhabhʉʉzya hu shifwani ahaga,
“Hwope asangaanye ɨmanyizyo zyanɨ zya zili njenu na miiho geenyu hulɨngaana lwene nanshi ʉmuntu wa‑azembula ɨshipatiho mu mwenda ʉmʼpya na‑amame mu mwenda ʉnʼkʉʉlʉ.
Wa‑akhonzya ɨsho,
abha anangɨɨnye ʉmwenda ʉmʼpya,
shope ɨshipatiho shiila saga shilɨngaana nʉ mwenda ʉnʼkʉʉlʉ.
37 Nantele,
asangaanye ɨmanyizyo zyanɨ zya zili njenu na miiho geenyu hulɨngaana lwene nanshi asulule ɨdivaayij ya saga ndozu mu nyambɨk ɨnkʉʉlʉ,
pɨpo lwɨ‑ɨlʉla na‑atutubhe,
ɨnyambɨ ɨbhala‑akunwe abʉʉse,
lyoli ɨnza‑apwagushe.
Ɨdivaayi yope ɨnza hwitishe.
38 Ɨdivaayi ya saga ndozu ɨhwanziwa abhɨɨhwe mu nyambɨ ɨmpya.
39 Nantele nʉʉmo ʉmuntu wa‑asʉngwa amwele ɨdivaayi ya saga ndozu,
lwa‑amwelile ɨnkʉʉlʉ,
pɨpo abhantu bhayiga,
ɨdivaayi ɨnkʉʉlʉ yɨ nyinza tee.”