ɄYeesu ahumʼponia ʉmuntu wa‑ali na mapepo
5
ɄYeesu na bhasundwe bhaakwe bhahafiha hwi‑isyɨla ɨlyɨnjɨ ɨlyɨ nsʉmbi ɨyɨ Galilaaya,
hu nsi ɨya Bhagelaasi.
2 ɄYeesu lwa wiiha lwene afume mu waato,
ʉmuntu ʉmo wa‑ahali na mapepo ahafuma hu nkʉngwa,
a ahanʼshɨmbɨɨlɨla ʉYeesu.
3 Ʉmuntu ʉnʉ ahakhalaga hu nkʉngwa.
Ahali ni‑ikhone,
saga ahalɨɨho ʉmuntu nkʉ‑ʉmo wa‑abhajiiye humʼpinye nka hu manyololo.
4 Bhahamʼpinyaga hahinji lwene na manyololo mu manama.
Mu nyoobhe bhahamʼpinyaga nɨ mpɨngo,
leelo ahadadulanyaaga vyonti.
Saga ahalɨɨho ʉmuntu nkʉ‑ʉmo wa‑abhajiiye hunʼtole.
5 Ahakhalaga hu nkʉngwa na mu magamba pasanya na nʉsiku,
ahabwagaga ibwago na hwibhoolanye na mawe.
6 Ʉmuntu ʉla lwa wanʼnola ʉYeesu hutali lwene,
ahanʼshɨmbɨɨlɨla,
ahabhala,
ahasugamila pa manama gaakwe.
7-8 ɄYeesu lwa wanʼnola,
ahalibhʉʉzya ipepo lya lyahali mwa mwene huje,
“Fuma mwa muntu ʉnʉ!”
Ɨpo ʉmuntu ʉla ahakhoola ɨhoolo haani huje,
“Wee Yeesu,
Mwana wa Ngʉlʉbhɨ wa‑ali Nʼgoosi hu vintu vyonti,
ɨndi nɨ yeenu naawe?
Ɨhulamba hwi‑itaawa lya Ngʉlʉbhɨ huje,
ʉgandi hundavye.”
9 ɄYeesu ahabhʉzɨɨlɨzya huje,
“Itaawa lyaho we naanu?”
Lyahamʼmwamula lyahaga,
“Itaawa lyanɨ nɨ Mpʉga,
b pɨpo atɨ tili bhinji muuhati mwa muntu ʉnʉ.”
10 Ipepo liila lyahanʼnamba haani huje,
“Ʉgandi hutidaje mu nsi ɨnɨ.”
11 Ɨshi,
papaala hwahali ni‑idiimo igoosi ɨlyɨ ngʉlʉbhɨ.
Idiimo ɨlyo lyahalyanga mu lubhambala ʉlwɨ hagamba.
12 Ɨpo amapepo gaala gahaga,
“Tihulamba huje,
ʉtɨtɨshɨle titʉʉshe mu ngʉlʉbhɨ ziila.”
13 ɄYeesu ahagɨtɨshɨla,
gope gahafuma,
gahazitʉʉha ɨngʉlʉbhɨ.
Idiimo lyonti ɨlyɨ ngʉlʉbhɨ lyahashɨmbɨla lubhilo,
lyahiiha ʉlwiha lwa lusulɨɨme haani ʉlwɨ hagamba haala,
lyahagwɨla mu nsʉmbi na‑afwe.
Ɨngʉlʉbhɨ ɨzyo zyahali ɨelufu zibhɨɨlɨ ɨshi.
14 Abhadiimi bhɨ ngʉlʉbhɨ ziila bhahashɨmbɨla,
bhahabhala mwi‑ibooma ipalamani na paala,
na mu vipanga ɨvya mu pɨɨpɨ.
Poponti pa bhahafihaga,
bhahabhabhʉzyaga abhantu ɨnongwa ɨzyo.
Abhantu bhahɨnza huje,
bhahwilolele bhɨɨbho zya zyabhombeha.
15 Bhahamʼmwɨnzɨla ʉYeesu.
Lwa bhanʼnola ʉmuntu wa‑ahali nɨ mpʉga yɨ mapepo akhɨɨye,
akwɨte amenda,
ali nɨ njeele zyonti,
bhahoogopa haani.
16 Bhaala bha bhahalolile zya zyamʼmwaga ʉmuntu ʉla nɨ ngʉlʉbhɨ,
bhabha bhahubhabhʉʉzya abhantu abhanjɨ zyɨnɨɨzyo.
17 Ɨpo ɨmpʉga ɨla yahanda hunʼnaabhe ʉYeesu huje asogole mu nsi yaabho.
18 ɄYeesu lwa‑atʉʉha mu waato,
ʉmuntu ʉla gahamʼmwepile amapepo,
ahanʼnambaga ʉYeesu ahagaga,
“Nɨtɨshɨzye huje,
ɨʼbhɨnjɨlɨzyaje aawe na‑abhe nʼsundwe waaho.”
19 Leelo,
ʉYeesu saga ahamʼmwɨtɨshɨla,
ahamʼmʉʉzya huje,
“Bhalaga humwenyu,
ʉbhabhʉʉzye ɨnongwa ɨmwamu ɨzi ʉMwɨnɨ ʉNgʉlʉbhɨ zya‑aʼbhombɨɨye,
na sha waʼlolela ɨnkʉmbʉ.”
20 Ɨpo ʉmuntu ʉla ahasogola,
ahanda anyampaanye ɨnongwa mu mabooma ishʉmi aga hu Dekapooli,
c ɨmbombo ɨmwamu ɨzyo ʉYeesu zya‑amʼmombɨɨye.
Abhantu bhonti bhahaswigaga.
ɄYeesu ahumʼponia ʉnʼshɨ ʉmo na hunʼzyʉsye ʉnʼnɨndu
21 ɄYeesu na bhasundwe bhaakwe lwa bhafwɨmɨɨla ɨnsʉmbi mu waato aweele hwi‑isyɨla ɨlyɨnjɨ,
ɨmpʉga ɨngoosi ɨya bhantu yahamʼmʉnganiiye papaala panshɨnjɨ pa nsʉmbi.
22 Pɨnɨɨpo,
ahɨnza ʉnʼnongozi ʉmo wɨ nyumba yaabho ɨya‑apuutile na‑amanyiilile,
ʉyo itaawa lyakwe ahali yʉ Yaayilo.
Lwa wanʼnola ʉYeesu,
ahamʼmalila,
ahasugamila pa manama gaakwe.
23 Ahanʼnamba huje,
“Ʉmwalɨ waanɨ mʼminu,
asyalile hashe afwe.
Nalamba nalamba,
saali ʉmʼmɨɨshɨle ɨnyoobhe zyaho,
huje ɨmpʉngo ɨyeepe mu mʼbɨlɨ gwakwe na huje asahaafwe.”
24 ɄYeesu ahalongozanya nawo abhale hwa mwene.
Ɨmpʉga ɨngoosi ɨla yahamʼmɨnjɨlɨzyaga,
bhahamʼbijilizyaga tee paala pa‑ahali.
25 Mu mpʉga ɨla mwahali nʉ nʼshɨ ʉmo wa‑ahali nɨ mpʉngo ɨya‑azwe idanda hu shishɨ hu maaha ishʉmi na gabhɨɨlɨ.
26 Ʉnʼshɨ ʉla ahayɨmbɨle haani abheete mwa bhaganga abhinji.
Ahamalile ɨshʉʉma shaakwe shonti abheete mwa bhaganga,
leelo ɨmpʉngo yaakwe saga yahatontaga lwonti,
lyoli yahonjelelaga.
27-28 Ʉnʼshɨ ʉla lwa wʉmvwa ɨzyo ʉYeesu abhombile,
ahasɨɨbhaga huje,
“Nkashele nagupalamansya lwene ʉmwenda gwakwe,
ɨmbala‑apone.”
Ɨpo ahabhala hwisinda hwa Yeesu mu mpʉga ya bhantu,
ahagupalamansya ʉmwenda gwa Yeesu.
29 Lwa wagupalamansya lwene,
idanda lyahaleha afume,
wope ahahwiyʉmvwa huje,
aponile lyoli.
30 ɄYeesu ahamanya lwene huje,
ikhone lyakwe libhombile ɨmbombo.
Ahashebhela,
ahabhabhʉzɨɨlɨzya huje,
“Weenu wa wampalamansya amenda gaanɨ?”
31 Abhasundwe bhaakwe bhahamʼmwamula bhahaga,
“Hee!
Ɨshi,
ʉlola abhantu bhonti ɨbha bhahwibijiilizya hwaliiwe,
ɨshi yeenu ʉbhʉzɨɨlɨzya ʉyiga,
‘Weenu wa wampalamansya?’ ”
32 Leelo,
ahelenganya amaaso ʉhwu nʉ‑ʉhwu ahwenye ʉmuntu wa wamʼpalamansya.
33 Ɨpo ʉnʼshɨ ʉla ahoogopa,
ahɨnza na‑asugamile pa manama ga Yeesu sha‑ayinga,
d pɨpo ahamɨɨnye zya zibhombɨɨshe hwa mwene.
Ahamʼmʉʉzya sha zyahali.
34 ɄYeesu ahamʼmʉʉzya huje,
“Nʼnɨndu,
ʉponile,
pɨpo ʉli nʉ lwɨtɨho.
Bhalaga hu tengaanu,
ɨshi ʉponile.”
35 ɄYeesu lwa‑ali sha‑ayanga nʉ nʼshɨ ʉyo,
abhantu bhahɨnza afume hu khaaya ya Yaayilo,
ʉnʼnongozi wɨ nyumba ɨya‑apuutile na‑amanyiilile,
bhahaga,
“Wee Yaayilo,
leha hunʼnyanzye ʉMʼmanyizyi,
ʉmwalɨ waaho afwiye.”
36 Leelo ʉYeesu saga ahasaaga ɨzyo bhahayangaga lwonti,
ahamʼmʉʉzya ʉyise wa mwalɨ ʉla huje,
“Ʉgandi ahwogope lwonti,
ʉbhe nʉ lwɨtɨho lwene.”
37 ɄYeesu ahabhagalusya abhantu bhonti abhanjɨ huje,
bhagandi alongozanye nawo.
Leelo,
ahabhala nʉ Peeteli,
ʉYaakobo nʉ Yoohani ʉnʼdoodo wa Yaakobo bheene.
38 Lwa bhaafiha pa khaaya ya Yaayilo,
ʉYeesu na bhasundwe bhaakwe bhahabhaaga abhantu bhalila na‑azonde.
39 ɄYeesu ahatʉʉha mu nyumba muula,
ahabhabhʉzɨɨlɨzya huje,
“Muzonda yeenu?
Ʉnʼnɨndu ʉnʉ saga afwiye,
agonile tulo lwene.”
40 Ɨmpʉga ya bhantu bhaala yahakhasamala na hunʼseshe,
leelo wope ʉYeesu ahabhafumya bhonti hwʉnzɨ.
Ahamʼmwega ʉyise wa mwana nʉ nyina waakwe na bhasundwe bhaakwe bhataatu,
bhahabhala hu mpanda hwa bhahagulambaliishe ʉmʼvimba.
41 Ahagukhata ʉmʼvimba guula ʉnʼkhono,
ahaga,
“Talita,
komi!”
Hwa huje,
“We nʼnɨndu,
ɨnjiga,
daamuha!”
42 Pɨnɨɨpo,
ʉnʼnɨndu ʉyo ahɨmɨɨlɨla,
ahanda ajende.
Ahali na maaha ishʉmi na gabhɨɨlɨ.
Abhantu bha bhahalolile ɨgo bhahaswiga tee.
43 ɄYeesu ahabhakhajiilizya haani huje,
“Mugandi humʼmʉʉzye ʉmuntu nka weeka zya zyabhombeha.”
Nantele,
ahabhabhʉʉzya abhapaafi bha nʼnɨndu ʉla huje,
bhamʼpeele ɨshalye.