Aez seu tih boh aez keum rang
12
Meuz phangz an diz ihz keui naeh penz rengz teur cuhz daehz, paw ngaz teur paenz talz daehz. Yesuhz seun teungz lao aacz teu paez Daehz keui nahz, “Seu tih yawt toz daehz, yak cih yeung Pharise, keuh naeh ceu, seuk cih daehz naeh ihz rak.
2 Nam maang phrihz phrahz naehz an reupz bawnz, an seun tapz keui ngaz lawk. Nam maang ta ihz nam mas an unz bawnz.
3 An pehz lao tuhz an bimz ne ngaz ngarz tuhz an thaangz, an pehz lao keu seoz tuhz lukz kaw ngaz sawz lang kusz kaang.
Tahz an lo doz
4 Raen, Ohz daz pehz nahz, yak doz ihz piamz bawnz taw toz, waaiz an diz keuh nam caang cih thaengz seu naez.
5 Ohz lao plaez pehz nahz tahz an pehz lo doz ne naeh Phraz an maang taanz khoz piamz ihz boh caang leh teuk klaez tuhz ngal raai. Anz, pehz lo doz Hnhz taw Daehz.
6 Simz sriapz khanz ne leh paekz tawng aarz metz paez yal nam anz haz? Phraz Pen Caoh nam teur wir keuh teun akz keuiz.
7 Hukz kingz pehz kaw Hnhz yeung dawkz. Kawp ceun diz pehz yak doz. Pehz langz mawh lak simz sriapz eu.
Rap khris boh thiangz khris
8 Ohz lao mawn pehz nahz, ihz rap khaam Ohz aacz ngaai ihz ne, Kuanz Kingz Ihz kaw ngaz rap khaam keuh aacz ngaai teu maan kaang raaoz Phraz Peh Caoh.
9 Keuiz daz ihz thiangz Ohz aacz ngaai ihz ne, Kuanz Kingz Ihz kaw ngaz thiangz keuh aacz ngaai teu maan kaang raaoz Phraz Pen Caoh.
10 Ihz upz pleung Kuanz Ihz ne caang plawiz lawt bawnz reung dengz kawi, keuiz daz ihz upz pleung Khuanz Seu Ngamz ne nam caang plawiz lawt.
11 Meuz ihz leh pehz lan cu tawiz crawp boh aacz ngaai ihz mawh, ihz peur aacz ne yak kawcz phawmz ngaz tawpz daz ceun nae.
12 Meuz ceun diz Khuanz Seu Ngamz ngaz sawnz aez pehz nahz ngaz lao ceun nae.”
Ihz maang ngeu
13 Maang ihz hawkz an naeh tuhz wungz ihz ne daz Yesuhz nahz, “Tahz sra, lao mai ohz teur baengz aez phrihz phrahz an paz ehz kiutz mok luz.”
14 Yesuhz mial daz, “Yaeh khaanz Ohz teur baengz aez phrihz phrahz paarz?”
15 Yesuhz daz wungz ihz keui nahz, “Seu tih, yak lawphahz mawh, phawmz ihz ne nam tae kaai phrihz phrahz an daehz maang keuiz.”
16 Yesuhz lao ihz keui nahz mony pung taek, “Maang ihz maang hawkz, sraakz hnhz ne bawnz ngohz kaaiz heungz baaiz.
17 Hnhz wonz daz daehz eunz, ‘Ohz ngaz cih seu naez ez? Nam maang ti mok phrihz phrahz leui a.’
18 Hnhz daz daehz eunz, ‘Ohz a wa mas kamz ni a, ya thengz taen ngohz rae ngaz cih thaengz mawh mawh keui. Ngohz kaaiz boh kreung laep keui ngaz mok a diz.
19 Samz daz mial phawmz khuanz daehz nahz, mih maang phrihz phrahz ngohz kaaiz ta damz toz daehz kumz heungz wit baaiz. Moh sa sa, suamz tiangz moh khyaw khyaw lah!’”
20 Keuiz daz Phraz Pen Caoh daz hnhz nahz, “Ihz ngeu aez, borz meu ni ngaz leh khuanz phawmz mih, an mih rawmz mok ne yaeh ngaz bawnz?”
21 Yesuhz siupz lao thaengz, “Ihz maang an rawmz mok toz daehz keui ne naeh ihz phaanz aacz ngaai Phraz Pen Caoh ceun ihz maang an diz.”
Yak khiz
22 Yesuhz lao teu paez Daehz keui nahz, “Kawp ceun diz Ohz lao pehz nahz, yak khiz ngaz suamz naehz ta phawmz daehz, ngaz kap naehz ta toz daehz,
23 phawmz myaat lak seum suamz, toz myaat lak kreung.
24 Yawt luk aakz keui. Keuh nam plihz nam buiz, nam woc, nam maang taen ngohz. Keuiz daz Phraz Pen Caoh damz keuh. Pehz myaat lak simz nam anz haz!
25 Reung dengz khiz ne caang cih aez a saak hanz thaengz seu keun teungz haz?
26 An kyehz ceun diz daehz nam tang caang cih lawh, caang daz khiz tawiz tang meoz keui a?
27 Wonz yawt teungz ruk keui cih seu naez daakz truz. Keuh nam cih kaanz, nam peusz nam kez. Keuiz daz Ohz lao pehz nahz, kreung kap khunz Solomon bunz mawh ne aatz nam taan daakz ruk keu diz.
28 Phraz Pen Caoh yeung kap aez teungz ruk keui nahz kreung, imz tuhz ruk meu ni bawnz sapz tuhz ngal kap siz ne kaai pehz baaiz aez bawnz kap leuz lak ruk keu diz eu. Euz ihz reung dengz yum lany keui!
29 Kawp ceun diz yak khahz ta suamz ta tiangz. Yak khiz phawmz ta keu diz.
30 Ihz nam yum Phraz keui khahz an keu diz. Paz pehz mas pehz lo an keu diz.
31 Khahz aacz prih Phraz Pen Caoh raez, waaiz an diz Hnhz ngaz aez an pehz lo keu diz.
Rawmz phan ta lang kaang raaoz
32 Wungz soz kyehz keui aez, pehz yak doz, Paz pehz pyaw aez tang prih Daehz.
33 Saz phrihz phrahz pehz, leh paekz teur baengz aez ihz phaanz keui nahz. Cih thangz paekz an nam caang teutz caang loz ta pehz, rawmz phan ta aez maang lang kaang raaoz, ti an peun rah nam caang rah, ruk raak nam caang ya.
34 Kawp daz phan ta daehz naeh a naez kaw pehz takz phawmz a diz.
Peur cao an maang seu tih
35 Mat seum mat, kleoz tang ngal ngawiz rae peun tan mok raez.
36 Naeh ceun peur cao pao tahz daehz weng truz thaz pawiz kopz ku, meuz hnhz weng khrakz keur wah ne keuh tan lawk aez luat.
37 Meuz tahz keuh weng truz awlz peur cao daehz peun tan ceun diz ne naeh peur cao an rak. Ohz daz mawn pehz nahz, tahz keuh seuk wat daehz rae cao peur cao daehz keu dez a pheunz ne cih damz keuh.
38 Tahz keuh weng awlz ceun diz meuz khinz sawmz, nam anz kaw meuz aacz yaerz keu dawrz ne peur cao keu diz naeh peur cao an rak.
39 Pehz mas boh beuk tahz kaang ne mas mok kraao peun rah ngaz truz ne, hnhz nam praasz thengz kaang daehz, yak aez ihz kut bawnz.
40 Pehz kaw peun tan mok raez, kawp daz nam mas kraao Kuanz Kingz Ihz ngaz truz maen meuz daehz nam thaang.”
Kuanz leng an rak boh kuanz an meukz
41 Petros maanyz Yesuhz daz, “Tahz ehz, Mih lao pung taek ne naeh ta ehz pan haz, ta ihz hacz aamz nahz haz?”
42 Caoh Phraz kaw lao mial, “Kuanz leng an maang saet ca boh maang pinya ne naeh yaeh? Kaai ihz an diz tahz kaang ngaz aapz hnhz rae aez hnhz teur baengz kuanz leng teur deuiz nahz seum suamz.
43 Meuz tahz paz leng truz awlz kuanz leng cih ceun diz ne bawnz an rak.
44 Ohz daz mawn pehz nahz, tahz an diz ngaz aapz aez upz kaang daehz hacz aamz.
45 Keuiz daz kuanz leng an diz thaang tahz daehz hinz weng rae tiz kuanz leng keur meh tang keun nyah, suamz suamz tiangz tiangz cawc boh,
46 tahz hnhz ngaz weng truz seu ngihz an hnhz nam thaang ne, ngaz mak hnhz penz patz aez hnhz nahz taam teur kawmz ihz nam maang saet ca.
47 Kuanz leng an mas reung dawhz tahz daehz, keuiz daz nam raenz mok toz daehz ne talz taam kawn heungz baaiz.
48 Keuiz daz kuanz leng an nam mas reung dawhz tahz daehz rae cih pleung ne talz taam kawn lany. Kaai ihz bawnz heungz ne bawnz phrawz mial heungz, kaai ihz bawnz heungz leuz kaw bawnz phrawz mial heungz leuz boh.”
Yesuhz cih aez ihz teuk praasz
49 “Ohz truz cih aez ngal kat tuhz prih keu tehz, Ohz sunz aez kat!
50 Ohz bawnz leh teuk sruz an peur teuk, Ohz kreuk phawmz thonz taw reung dengz peur teuk an diz peun.
51 Thaang Ohz leh truz reung dengz nimz tuhz prih keu tehz haz? Nam anz keuiz, Ohz truz ta ihz teur teuk praasz daehz.
52 Tae leh seu ni lan, ihz kaang khanz ne teur teuk praasz, keu waiz ngaz khatz keu aarz, keu aarz samz ngaz khatz keu waiz.
53 Paz ngaz khatz kuanz, kuanz ngaz khatz paz, mah boh kuanz keun nyah, keunz boh moi keui kaw ngaz teur khatz tang daehz.”
Lawng an mas kraao
54 Yesuhz daz ihz hacz aamz nahz, “Meuz pehz awlz peu eumz raw thaz reu keutz ne pehz caang daz luat ngaz cung kaw cung mawn.
55 Meuz pehz awlz kurz thaz seun daalz truz ne pehz daz ngaz kawcz kaw kawcz mawn.
56 Ihz seuk cih keui aez, pehz yawt keu tehz boh plengz ne mas boh ngaz cung, ngaz kawcz, keuiz daz pehz paw nam raamz bawnz kaap seu ni ez.
Cih aez teur maen
57 Cih naehz pehz paw nam mas daehz an nae naeh an anz a?
58 Meuz ihz cih a muz sapz pehz ngaz lan cu rumz ne cih aez teur maen meuz yeung naeh tawiz reung dengz. Beuk nam cih ceun diz hnhz ngaz leh pehz aapz a ihz mawh tatz traz, ihz mawh tatz traz samz aapz tuhz tihz siukz, siukz samz leh pehz sapz tuhz khawk.
59 Ohz daz pehz nahz, ka ni maat phre hacz ne pehz nam caang lae thaz khawk.”