Lawng aez ihz phaanz
6
“Seu tih yak cih aez ihz awlz daehz naeh ihz phraz traz. Beuk pehz cih ceun diz, pehz ngaz nam bawnz a keoz tawz Paz pehz an naeh lang kaang raaoz.2 Kawp ceun diz meuz pehz aez ihz peur teuk keui nahz ne yak tiz mawng ceun ihz seuk cih daehz naeh ihz rak keui cih tuhz crawp boh tawiz reung dengz, aez ihz thanz paw lupz daehz. Ohz daz mawn pehz nahz keuh a wa bawnz a keoz daehz seu keuh trohz bawnz. 3 Kawp ceun diz meuz pehz aez ihz peur teuk keui nahz ne tihz takz kaaiz mih cih ne yak aez tihz takz dahz mih mas, 4 kawp ceun diz an pehz aez ne aez naeh an seun tapz. Waaiz an diz Paz pehz an awlz an seun tapz hacz aamz ne ngaz aez pehz nahz a keoz.”
Mony suz tawngz
5 “Meuz pehz suz tawngz ne yak cih ceun ihz seuk cih daehz naeh ihz rak, kawp keuh song ceng suz tawngz tawiz tuhz crawp boh tawiz seu dukz reung dengz, aez ihz keui awlz heungz. Ohz daz mawn pehz nahz keuh a wa bawnz a keoz an keuh trohz bawnz. 6 Keuiz daz meuz pehz suz tawngz ne kut tuhz lukz daehz, dapz keur wah rae maanyz tawz Paz pehz an leh ngaai yawt nam awlz. Waaiz an diz Paz pehz an awlz an seun tapz hacz aamz ne ngaz aez pehz nahz a keoz.
7 Samz thaengz meuz pehz suz tawngz ne yak upz samz samz mony reu ma daehz ceun ihz nam yum phraz. Kawp daz keuh thaang an suz tawngz hanz hanz ne Phraz Pen Caoh teuk ngarz. 8 Yak cih ceun keuh, kawp daz Paz pehz mas an pehz lo thaz meuz maat maanyz tawz Hnhz. 9 Kawp ceun diz suz tawngz daz ceun ni raez,
‘Paz ehz an naeh lang kaang raaoz,
aez mus Mih naeh ti ro se se kamz.
10 Aez prih Mih tae se kamz,
ceun reung dawhz Mih keunyz lang prih kaang raaoz ne
aez keunyz tuhz prih keu tehz se kamz.
11 Aez ehz nahz seum suamz kumz ta seu ngihz meu ni se kamz.
12 Ceun ehz plawiz lawt reung dengz kawi ihz cih pleung ehz ne
plawiz lawt aez ehz se kamz.
13 Yak aez ehz lan tawiz reung dengz kyaam ya,
khyawt leh ehz thaz an nam rak se kamz.
Aez a na, taanz khoz boh bunz keui
aez naeh an Mih cen cen se kamz. Amen.’
14 Beuk pehz plawiz lawt reung dengz kawi ihz kaw Paz pehz kaang raaoz kaw ngaz plawiz lawt pehz eunz. 15 Beuk pehz nam plawiz lawt reung dengz kawi ihz kaw Paz pehz ngaz nam plawiz lawt pehz eunz.”
Kaerz seum suamz
16 “Meuz pehz kaerz seum suamz ne yak cih ngaai kyehz ceun ihz seuk cih daehz naeh ihz rak. Keuh cih aez ihz mas daehz kaerz seum suamz rae cih ngaai kyehz. Ohz daz mawn pehz nahz, keuh a wa bawnz a keoz seu keuh taan bawnz. 17 Keuiz daz meuz pehz kaerz seum suamz ne thukz nam man a kingz rae khez ngaai daehz raez, 18 beuk cih ceun diz ihz nam mas an daehz kaerz seum suamz, keuiz daz Paz pehz leh ngaai yawt nam awlz ne mas boh. Paz pehz an awlz an seun tapz hacz aamz ne ngaz aez pehz nahz a keoz.”
Phan ta lang kaang raaoz
19 “Yak rawmz ta daehz nahz phan ta tuhz prih keu tehz an ni, an ruk raak boh mah phrihz keui caang ya, an peun rah keui caang klawkz caang rah. 20 Keuiz daz rawmz ta daehz nahz phan ta lang kaang raaoz tui raez, ti an ruk raak boh mah phrihz keui nam caang ya, ti an peun rah keui nam caang klawkz nam caang rah. 21 Kawp daz phan ta daehz naeh a naez kaw pehz takz phawmz a diz.”
Ngaai naeh ceun ngal ngawiz toz
22 “Ngaai pehz naeh ngal ngawiz toz pehz. Beuk ngaai pehz rak kaw thaangz tang toz. 23 Beuk ngaai mih nam rak kaw bimz tang toz. Beuk an thaangz tuhz mih ne bimz kaw an bimz an diz naeh bimz lang aez teuk.”
Tahz keu aarz
24 “Yaeh kaw nam cih bawnz peur cao tahz keu aarz. Hnhz ngaz ceuh hawkz, rak hawkz, nam anz kaw ngaz nap suamz hawkz, nam saangz suamz hawkz. Pehz nam cih bawnz peur cao Phraz Pen Caoh boh paekz.”
Yak kawcz phawmz
25 “Kawp ceun diz Ohz lao pehz nahz, yak khiz ta phawmz daehz, ngaz suamz naehz, ngaz tiangz naehz? Yak khiz ta toz daehz ngaz kap naehz? Phawmz myaat lak seum suamz, toz myaat lak kreung nam anz haz? 26 Yawt simz ploiz keui, keuh nam plihz nam buiz, nam woc, nam sapz mok tuhz taen, keuiz daz Paz pehz kaang raaoz damz keuh. Pehz myaat lak keuh nam anz haz? 27 Reung dengz khiz ne caang cih aez a saak hanz thaengz seu keun teungz haz?
28 Cih naehz khiz phawmz ta kreung kap a? Wonz yawt teungz ruk keui cih seu naez daakz truz. Keuh nam cih kaanz nam peusz nam kez. 29 Keuiz daz Ohz lao pehz nahz, kreung khunz Solomon bunz mawh ne aatz nam taan daakz ruk keu diz. 30 Phraz Pen Caoh yeung kap aez teungz ruk keui nahz kreung imz tuhz ruk meu ni bawnz sapz tuhz ngal kap siz ne kaai pehz baaiz aez bawnz kap leuz lak ruk keu diz nam anz haz, euz ihz reung dengz yum lany keui?
31 Kawp ceun diz yak khiz phawmz daz, ‘Ngaz suamz lan naehz? Ngaz tiangz lan naehz? Ngaz kap lan naehz?’ 32 Ihz nam yum Phraz keui khahz an keu diz hacz aamz. Paz pehz kaang raaoz mas an pehz lo hacz aamz. 33 Khahz aacz prih Phraz Pen Caoh boh reung deng keu sangz raez, waaiz an diz Hnhz ngaz aez an pehz lo hacz aamz. 34 Kawp ceun diz yak kawcz phawmz ta kap siz. Kawp daz kap siz an diz kawcz phawmz ta hnhz. An peur teuk meu ni kaw kumz ta seu ngihz meu ni.”