Kyaamz Markus
Traz Yohn an aez teuk sruz omz
(Matthe 3:1-12, Lukas 3:1-18, Yohn 1:19-28)
1
An ni naeh seun teungz reu oiz rak lawng Yesuhz Khris, Kuanz Phraz Pen Caoh.
Markus 1:1-13
“Teuk ngarz raez! Ohz ngaz plawiz lan ihz phuhz reu oiz Ohz aacz Mih,
an ngaz meu rae reung dengz Mih ne.
‘Meu rae reung dengz Phraz Cen Cen,
aez reung dengz keu sangz ta Hnhz nuar.’”
4 Reus ihz hawkz an raak ne naeh Yohn, hnhz truz aez teuk sruz omz tuhz ruk. Hnhz rawz tang traz aez ihz seuk weur phawmz daehz boh leh teuk sruz. Beuk cih ceun diz, Phraz Pen Caoh ngaz plawiz reung dengz kawi pehz.
5 Ihz weng Yerusalem tang ihz prih Yio tang heungz truz cu Yohn. Keuh teur aacz daehz lao plaez reung dengz kawi daehz, keuh leh teuk sruz a hnhz tuhz omz Yordan.
6 Tahz Yohn kap kreung an leh hukz meu rang maang soz cih. Hnhz leh seum mat hurz mat peur ngeun daehz, suamz caarz boh ngaam ceun ngur ruk.
7 Yohn rawz plaez daz, “Ihz an truz thaz puatz ohz ne mawh myaat lak ohz. Ohz an ni nam theukz seuk deumz khawz tang nuarz cawng khlapz Hnhz.
8 Ohz aez pehz nahz teuk sruz tuhz omz pan, Tahz an diz samz aez pehz nahz teuk sruz tuhz Khuanz Seu Ngamz.”
Yesuhz leh teuk sruz omz boh khaam reung dengz kyaam ya
9 Meuz diz Yesuhz truz thaz prih Kalile weng Nasaret, leh teuk sruz a Yohn tuhz omz Yordan.
10 Meuz Hnhz lae truz thaz omz ne, Hnhz awlz plengz plakz haakz, Khuanz Phraz cur cu kaai Hnhz naeh ceun ploiz ne.
11 Meuz diz, reus rawhz truz thaz kaang raaoz ne daz, “Mih naeh Kuanz an Ohz yaw, an Ohz trohz phawmz.”
12 Waaiz an diz, Khuanz Phraz phuhz Yesuhz lan luat tuhz ruk.
13 Hnhz moh tuhz ruk an diz ponz kawlz seu ngihz, Satan kyaam ya Hnhz. A diz maang tang toz ruk raai keui, keuiz daz teu maan kaang raaoz keui truz lum la Hnhz.
Yesuhz raak tahz kahz keu ponz
14 Waaiz Yohn klaez khawk ne, Yesuhz truz cu mial prih Kalile, rawz traz reu oiz rak Phraz Pen Caoh daz,
Markus 1:14-45
15 “Kraao a wa phraeoz, kraao prih Phraz Pen Caoh a wa thatz tae! Teur aacz daehz caanz reung dengz kawi raez, yum reu oiz rak raez!”
16 Meuz Yesuhz nuar boh waar nawngz Kalile ne, Hnhz awlz tahz kahz kuanz mai keu aarz, Simon kaar Andre, kaar yeung rup boh kahz tuhz nawngz kawp daz kaar naeh tahz kahz.
17 Yesuhz daz kaar nahz, “Lan tawiz Ohz raez. Ohz ngaz cih paarz naeh tahz kahz khahz ihz.”
18 Kaar kaw mok thengz luat rup daehz, lan tawiz Hnhz.
19 Peun lan thaengz a diz nyaenz, Hnhz awlz Yakop kaar Yohn, an naeh kuanz Sebede, yeung meu rae boh rup daehz tuhz ceun luang.
20 Yesuhz raak leh luat kaar aez kaar lan tawiz Daehz, kaar kaw lan tawiz Hnhz, mok thengz paz daehz Sebede boh ihz suamz caangz tuhz ceun luang.
Yesuhz wah thengz phiz
21 Yesuhz boh teu paez Hnhz keui lan weng Kapernaum. Meuz phraeoz truz seu ngihz sinz, Hnhz kut tuhz crawp rawz traz, sawnz aez ihz keui nahz.
22 Ihz keui teur aacz daehz sangz baaiz an Hnhz sawnz, kawp daz an Hnhz sawnz ne naeh ceun ihz maang a na, nam naeh ceun sra mawz kyaamz.
23 Meuz diz luat, tuhz crawp rawz traz ne maang ihz phiz kut hawkz. Ihz an diz raak daz,
24 “Euz! Yesuhz, ihz weng Nasaraet, cih naehz Tahz ehz truz cu ehz a? Ngaz truz ya ehz haz? Tahz ehz naeh yaeh ehz mas boh. Tahz ehz naeh Tahz an seu ngamz, an truz thaz Phraz Pen Caoh.”
25 Yesuhz wah thengz phiz, lao daz, “Moh pras pras, lae lan thaz ihz an ni”.
26 Phiz an diz kaw cih aez ihz an diz raw, raak usz usz lae lan thaz ihz an diz.
27 Ihz hacz aamz kaw sangz baaiz teur daz daehz nahz, “An ni naeh seu naez ez? Traz teun mehz meoz an nae ez? Ehz nam ti awlz traz an maang a na ceun ni. Phiz keui kaw teuk ngarz an Hnhz lao a.”
28 Reu oiz Yesuhz kaw sirz lan luat tuhz prih Kalile hacz aamz.
Yesuhz seuk neum ihz penz
29 Waaiz Yesuhz lae thaz crawp rawz traz ne Yakop kaar Yohn kaw lan tawiz, kut tuhz kaang Simon kaar Andre. Yakop kaar Yohn kaw lan tawiz keuh.
30 Keunz keuh Simon reum yaetz boh a diz. Ihz keui kaw lao luat Yesuhz lawng hnhz reum.
31 Yesuhz kaw lan cu hnhz, yawk tihz leh peun rawi, reum hnhz kaw bilz, hnhz kaw cih damz keuh boh.
32 Meuz teuk borz, seu ngihz a wa keutz ne ihz leh ihz penz boh ihz phiz kut keui truz cu Yesuhz.
33 Ihz tang weng keui kaw bucz boh teun leukz kaang an diz.
34 Yesuhz cih aez ihz penz klawhz meoz keui moh rak, wah thengz thaengz tang phiz. Phiz keui kaw mas boh Yesuhz naeh yaeh. Kawp ceun diz Hnhz nam aez keuh upz naehz.
Yesuhz rawz traz tuhz prih Kalile
35 Ceun kap siz teuk ngup cao, co prih maat thaangz, Yesuhz rawi lan suz tawngz ti nam maang ihz.
36 Simon boh kuanz bohz hnhz keui teur aacz daehz khahz dawmz Hnhz.
37 Meuz a wa awlz Yesuhz ne daz, “Ihz keui teur aacz daehz khahz dawmz boh Mih.”
38 Yesuhz kaw daz, “Han! Ehz lan tawiz pruh an naeh rim keu ni, aez Ohz bawnz rawz traz tawiz keu diz. Kawp ceun ni rae Ohz truz.”
39 Kawp ceun ni Yesuhz lan tawiz tuhz prih Kalile paw sirz rae rawz traz tawiz crawp keui, wah thengz tang phiz keui.
Yesuhz seuk neum ihz tut
40 Maang ihz tut hawkz truz seuk deumz aacz ngaai Yesuhz maanyz daz, “Tahz, beuk Mih sunz kaw cih aez ohz rak.”
41 Yesuhz kaw teur yawng hnhz, teuk yawr tihz Daehz rae teu hnhz daz, “Ohz sunz boh, aez mih rak.”
42 Meuz diz luat tut hnhz kaw a wa rak.
43 Yesuhz kaw lao seumz mawn mawn rae cao hnhz lan luat,
44 “Yak lao yaeh nahz lawng an ni. Keuiz daz lan cu saangz longz plaez toz mih. Pukz caw kreung lu ceun Moses seumz mok, aez naeh saak se aacz ngaai ihz, ta mih a wa seu ngamz.”
45 Keuiz daz hnhz lae lan lao plaez lawng daehz paw sirz. Kawp ceun diz, Yesuhz nam caang kut tuhz weng saang raang leui. Hnhz bawnz moh thaz nawk weng ti seun tapz ihz boh. Keuiz daz ihz klawhz ti keui teur aacz daehz truz cu Hnhz.