Yesuhz cih aez ihz tut moh rak
8
Meuz Yesuhz cur truz thaz rang ne wungz ihz keui lan tawiz Hnhz. 2 Maang ihz tut hawkz truz seuk deumz aacz ngaai Hnhz ne daz, “Tahz, beuk Mih sunz kaw cih aez ohz rak.”3 Yesuhz kaw teuk yawr tihz Daehz rae teu hnhz daz, “Ohz sunz boh, aez mih rak!” Meuz diz luat tut hnhz kaw a wa rak. 4 Yesuhz lao hnhz, “Yak lao yaeh nahz lawng an ni. Keuiz daz lan cu saangz longz plaez toz mih. Pukz caw kreung lu ceun Moses seumz mok, aez naeh saak se aacz ngaai ihz.”
Reung dengz yum ihz mawh siukz
5 Meuz Yesuhz kut tuhz weng Kapernaum ne maang ihz mawh siukz hawkz an upz seu peur ya ne truz maanyz aez kawr daehz daz, 6 “Tahz, peur cao ohz yam seu plaakz rae yaetz khin boh lang kaang ne.”
7 Yesuhz daz hnhz, “Ohz ngaz lan boh cih aez hnhz moh rak.” 8 Ihz mawh siukz an diz tawpz daz, “Tahz, ohz nam theukz Mih kut tuhz eupz kaang ehz. Maang mony reu ma seu khaw keuiz kaw peur cao ohz ngaz moh rak. 9 Kawp daz ohz naeh ihz tuhz keutz a na khunz. Tuhz keutz ohz kaw maang siukz heungz baaiz. Beuk ohz lao hawkz nahz, ‘Lan raez,’ daz kaw hnhz lan. Beuk ohz lao thaengz hawkz nahz, ‘Truz raez,’ daz kaw hnhz truz. Ohz cao peur cao daehz, ‘Cih an ni raez,’ daz kaw hnhz cih.”
10 Meuz Yesuhz ngarz an diz ne sangz, lao ihz tawiz puatz Daehz keui nahz, “Ohz daz mawn pehz nahz, tuhz kheuz Israel ne Ohz nam ti awlz reung dengz yum thanz teur ni. 11 Ohz daz pehz nahz, ihz keui heungz baaiz ngaz truz thaz reu lae, thaz reu keutz rae keu dez suamz kaai pheunz kawmz Abraham, Isaac boh Yakop tuhz prih kaang raaoz. 12 Keuiz daz kuanz prih kaang raaoz, an naeh kheuz Israel keui ngaz talz wah thengz an bimz thaz nawk, ti an keuh bawnz yaam boh teur kak raangz.” 13 Yesuhz lao ihz mawh siukz, “Lan, aez naeh ceun mih yum.”
Meuz diz luat peur cao hnhz kaw moh rak.
Yesuhz seuk neum ihz heungz
14 Meuz Yesuhz kut tuhz kaang keuh Petros ne Hnhz awlz keunz keuh Petros reum yaetz boh a diz. 15 Hnhz teu tihz keun nyah an diz, reum hnhz kaw bilz. Hnhz kaw rawi cih damz Yesuhz boh.
16 Meuz teuk borz ne ihz keui leh ihz phiz kut truz cu Yesuhz. Hnhz kaw leh mony reu ma wah thengz phiz. Ihz penz keui kaw Hnhz cih aez moh rak. 17 An ni aez keunyz mony reu ma ihz taangz phraz Isaiah daz, “Hnhz leh thengz an suhz an rit ehz boh an suhz an penz ehz.”
Ihz an sunz penz teu paez Yesuhz
18 Meuz Yesuhz awlz wungz ihz keui wit wit Daehz ne cao keuh lo lan thaz tui omz nawngz. 19 Maang sra mawz kyaamz hawkz truz lao Hnhz daz, “Tahz sra, ohz ngaz lan tawiz Mih ti Mih lan.”
20 Yesuhz kaw mial daz, “Sohz keu tehz maang tuhz moh, simz ploiz keui kaw maang haanz, keuiz daz Ohz an naeh Kuanz Kingz Ihz samz nam maang ti tam kingz.”
21 Teu paez thaengz hawkz samz lao Hnhz daz, “Tahz, aez ohz bawnz weng saangz keo aacz paz daehz.”
22 Keuiz daz Yesuhz lao hnhz, “Lan tawiz Ohz raez, aez ihz yam keui saangz keo mial ihz daehz yam raez.”
Yesuhz peuk deukz kurz boh seuk mar omz
23 Meuz Yesuhz kut tuhz ceun luang ne teu paez Hnhz kaw lan tawiz Hnhz. 24 Meuz diz luat penz truz cung longz kurz longz, ceun luang paw ngaz beukz tuhz keutz seuk mar omz. Keuiz daz Yesuhz samz yaetz reuk ngeut boh. 25 Teu paez keui lan peun rawi Hnhz daz, “Tahz, khyawt ehz raez! Ehz ngaz leucz omz.”
26 Hnhz lao daz, “Oz, ihz reung dengz yum lany keui aez, cih naehz lah pehz doz baaiz a?” Yesuhz kaw ceng lao kurz boh seuk mar omz nahz rae deukz lan. 27 Teu paez keui kaw sangz baaiz, teur daz daehz nahz, “Hnhz an ni naeh yaeh ez? Kurz boh seuk mar omz kaw teuk ngarz Hnhz.”
Yesuhz seuk neum ihz phiz kut keu aarz
28 Meuz Yesuhz phraeoz thaz tui omz nawngz eungz Kadara ne ihz phiz kut keu aarz truz saanyz Hnhz. Kaar kyaamz baaiz rae yaeh nam yaak lan reung dengz senz an diz. 29 Kaar raak keurz daz, “Oz Kuanz Phraz Pen Caoh aez, Mih lo aaiz cih naehz? Meuz kraao maat phraeoz ne Mih ngaz truz aez ehz peur teuk haz?”
30 A diz maang lek wungz mawh suamz boh nam thatz nam yaan keuh. 31 Phiz keui maanyz Yesuhz, “Beuk Mih wah ehz kaw aez ehz kut tuhz wungz lek keu diz.”
32 Yesuhz daz keuh nahz, “Lan raez.” Keuh kaw kut tuhz wungz lek, lek keui teuk basz cur tawiz phraakz rae leucz yam tuhz omz nawngz.