Yesuhz wah phiz ruakz lae kaai ihz hawkz
5
Waaiz an diz, Yesuhz boh teu paez keui phraeoz eungz Kerasina, thaz tui omz nawngz Kalile.
Markus 5:1-20
2 Meuz Yesuhz lae thaz ceun luang ne maang ihz phiz kut hawkz, lae truz thaz ruk peun lu ne truz saanyz Hnhz.
3 Ihz an diz moh tuhz ruk peun lu, yaeh nam pae hnhz, leh nuarz hirz mat mok kaw nam bawnz.
4 Leh nuarz hirz kai mat mok tihz cawng hnhz heungz laehz baaiz, keuiz daz hnhz tiut teuk teutz tang nuarz hirz. Yaeh nam pae mat bawnz hnhz.
5 Hnhz raak tuhz ruk peun lu boh kaai rang klawhz seu ngihz klawhz borz, hnhz leh reu aangz pacz saetz toz daehz.
6 Meuz hnhz awlz Yesuhz thaz meuz teun yaan ne wang lan cu waiz Hnhz,
7 raak keurz daz, “Yesuhz, Kuanz Phraz Pen Caoh an trawng dutz aez, sunz cih ohz ceun nae? Ohz teung kaao Phraz Pen Caoh rae maanyz Tahz ehz, yak cih aez ohz peur teuk,”
8 Ihz an diz daz ceun diz ne kawp Yesuhz a wa wah thengz phiz thaz hnhz daz, “Lae lan thaz hnhz raez.”
9 Yesuhz maanyz hnhz, “Mus mih daz naehz?”
Ihz an diz kaw daz, “Mus Ohz daz Phiz Wungz, kawp daz ehz naeh heungz baaiz.”
10 Phiz keui maanyz Hnhz mawh mawh heungz heungz, yak aez wah plaez daehz thaz prih an diz.
11 A diz maang lek wungz mawh suamz boh kaai rang ne
12 phiz keui maanyz Yesuhz, “Aez ehz bawnz kut tuhz wungz lek keu diz.”
13 Hnhz kaw aez keuh kut. Phiz keui kaw lae thaz ihz an diz, kut tuhz wungz lek, lek keui teuk basz cur tawiz phraakz rae leucz yam tuhz omz nawngz. Lek keui raenz naeh seu aarz rengz.
14 Ihz khaenz lek keui wang lan lao ihz tuhz weng boh tawiz pruh. Ihz keui kaw teur aacz daehz rip truz yawt lawng an taamz naeh peun.
15 Meuz keuh phraeoz tawz Yesuhz ne keuh awlz ihz an phiz kut ne keu dez boh a diz, kap boh kreung, awlz tang phawmz hnhz a wa rak mial rae keuh kaw doz.
16 Ihz an awlz ihz phiz kut boh lek keu diz, mial lao plaez ihz an truz thaz puatz keui nahz.
17 Meuz ceun diz, keuh maanyz Yesuhz lae lan thaz eungz daehz.
18 Meuz Yesuhz kut tuhz ceun luang, ihz an phiz a wa lae kaai hnhz ne maanyz lan tawiz Hnhz.
19 Keuiz daz, Yesuhz daz, “Mih yak truz tawiz Ohz, weng cu lang kaang pehz lao plaez kuanz mai pehz nahz, lawng an Phraz Cen Cen teur yawng mih, cih kez cuz tawz mih thanz teur nae ne.”
20 Ihz an diz kaw weng krai plaez ihz nahz lawng an Phraz Cen Cen cih kez cuz kaai daehz tawz prih Dekapolis. Ihz an bawnz ngarz keui kaw teur aacz daehz sangz baaiz.
Kuanz Yairus boh keun nyah thawkz naamz
21 Meuz Yesuhz mial lo lan thaz tui omz, meuz Hnhz yeung naeh waar omz ne, ihz heungz baaiz teur aacz daehz truz cu Hnhz.
Markus 5:21-43
22 Meuz diz luat, maang ihz mawh crawp hawkz, mus hnhz daz Yairus ne truz seuk deumz aacz ngaai Hnhz rae
23 maanyz daz, “Kuanz keun nyah ohz ngaz yam. Truz rae leh tihz Mih taangz kaai hnhz ne hnhz ngaz moh rak, ngaz nam yam.”
24 Yesuhz kaw lan tawiz Yairus, wungz ihz keui teur aacz daehz prawk teu Hnhz.
25 Meuz ceun diz, maang keun nyah hawkz, naamz thawkz a wa bawnz seu kawlz aarz wit.
26 Hnhz a wa khahz tahz seuk neumz heungz baaiz, ron khamz seu hnhz maang keui a wa hacz kaw nam kian baaiz yeung na.
27 Hnhz ngarz reu oiz Yesuhz, hnhz lan tawiz puatz Hnhz rae teu kreung Hnhz.
28 Hnhz daz tuhz phawmz daehz, “Beuk ohz bawnz teu kreung Hnhz kaw, an ohz penz ne ngaz bilz.”
29 Meuz ceun diz luat naamz hnhz kaw eutz. Hnhz mas toz daehz a wa bilz.
30 Yesuhz mas taanz khoz lae thaz toz Daehz ne waaiz cu yawt ihz maanyz daz, “Yaeh teu kreung Ohz lah?”
31 Teu paez Hnhz keui kaw daz, “Ihz heungz thanz teur ni teur aacz daehz prawk teu boh Mih ne caang daz maanyz, ‘Yaeh teu Ohz lah?’”
32 Yesuhz yeung waaiz yawt takz dahz takz kaaiz kawp sunz mas ihz an teu kreung Daehz.
33 Keun nyah an diz kaw doz teur ceus kawp daz hnhz mas reung naeh kaai daehz, truz seuk deumz aacz ngaai Yesuhz. Hnhz lao plaez Yesuhz nahz lawng an daehz cih hacz aamz.
34 Yesuhz kaw daz, “Kuanz, kawp mih yum rae a wa bilz. Lan nimz nimz naz. An mih penz ne a wa bilz.”
35 Meuz daz boh ceun diz ne, maang ihz truz thaz kaang Yairus, truz lao daz Hnhz nahz, “Kuanz keun nyah mih a wa yam, cih naehz lah yeung tawiz sukz boh Tahz Sra a?”
36 Yesuhz kaw ngarz tang Daehz rae daz Yairus nahz, “Yak doz, lo yum pan.”
37 Waaiz an diz, neuz lak Petros, Yakop boh seum bohz hnhz Yohn pan Yesuhz nam aez yaeh lan tawiz Daehz.
38 Meuz keuh phraeoz a kaang ihz mawh crawp ne keuh awlz ihz keui ronyz, raak yaam boh a diz.
39 Yesuhz kut tuhz kaang keuh ne maanyz keuh, “Pehz yaam cih naehz? Kuanz ihz ne nam yam keuiz, yaetz reuk ngeut pan.”
40 Keuh kaw ngot keulz Hnhz. Yesuhz aez keuh lae thaz nawk rae, mah paz kuanz ihz tang teu paez Hnhz keui kut cu tuhz lukz hnhz ne
41 Hnhz tawnz tang tihz hnhz daz, “Talitha kum,” an loz daz, “Kuanz, Ohz daz mih nahz, rawi raez.”