Yesuhz seuk neum ihz yam seu plaakz
9
Yesuhz kut tuhz ceun luang rae lo truz cu mial weng Daehz. 2 Ihz teur ka leh ihz yam seu plaakz yaetz boh kaai saatz ne truz cu Hnhz. Meuz Yesuhz awlz reung dengz yum keuh ne daz ihz yam seu plaakz nahz, “Yak phawmz kyehz, kuanz Ohz, Ohz a wa plawiz lawt reung dengz kawi mih.”3 A diz maang sra mawz kyaamz teur ka keui daz tuhz phawmz daehz, “Hnhz an ni upz pleung Phraz Pen Caoh.”
4 Yesuhz mas keuh thaang ceun diz rae maanyz keuh nahz, “Cih naehz, tuhz phawmz pehz thaang nam rak ceun diz a? 5 An nae lao yoh? ‘A wa plawiz lawt reung dengz kawi mih,’ ne yoh haz? ‘Ceng nuar lan raez,’ ne yoh haz? 6 Aez pehz mas Kuanz Kingz Ihz maang a na tuhz prih keu tehz plawiz lawt bawnz reung dengz kawi,” rae Hnhz lao ihz yam seu plaakz nahz, “Rawi raez, leh ti yaetz mih, weng kaang daehz.”
7 Ihz an diz kaw rawi weng kaang daehz. 8 Meuz wungz ihz keui awlz an diz ne sangz, keuh lupz phrawz Phraz Pen Caoh an aez ihz nahz a na ceun diz.
Raak leh Matthe
9 Yesuhz lae truz thaz a diz ne awlz ihz seutz khawn hawkz, mus hnhz daz Matthe, keu dez boh siungz seutz khawn rae daz hnhz nahz, “Lan tawiz Ohz raez.” Matthe kaw ceng lan tawiz Hnhz. 10 Meuz Yesuhz suamz seum suamz teuk borz tuhz kaang Matthe ne ihz seutz khawn boh ihz maang reung dengz kawi keui truz suamz kawmz Hnhz boh teu paez Hnhz. 11 Meuz Pharise keui awlz ne keuh maanyz teu paez Hnhz, “Cih naehz sra pehz suamz kawmz ihz seutz khawn boh ihz raai keui a?”
12 Meuz Yesuhz ngarz ne daz, “Ihz moh rak keui nam lo tahz seu neumz, ihz penz keui pan lo a. 13 Tuhz kyaamz lik daz, ‘Ohz song reung dengz teur yawng, nam song toz pukz caw,’ an daz ne pehz lan sawnz leh raez. Ohz truz ta raak leh ihz keu sangz nam anz, keuiz daz naeh ta ihz maang reung dengz kawi keui.”
Maanyz lawng kaerz seum suamz
14 Teu paez Yohn tahz teuk sruz keui truz maanyz Hnhz daz, “Ehz boh Pharise keui kaerz seum suamz, cih naehz teu paez Mih keui nam kaerz a?”
15 Yesuhz kaw daz, “Meuz tahz seu naaoz yeung naeh kawmz boh khaekz daehz tuhz pawiz kopz ku ne anz keuh bawnz kawcz phawmz? Kraao leh tahz seu naaoz praasz lan keuh ne ngaz phraeoz boh, meuz diz keuh ngaz kaerz seum suamz. 16 Yaeh nam leh banz teun mehz teuk baangz kreung trimz, kawp daz banz teun mehz teuk rut kreung trimz rae tuhz baaiz waas. 17 Yaeh nam leh omz seu pit teun mehz sapz tuhz seu kiz hurz trimz. Beuk cih ceun diz, seu kiz hurz luh, omz seu pit kaw lae rae seu kiz hurz kaw luh. Omz seu pit teun mehz kaw sapz tuhz seu kiz hurz teun mehz leun, beuk ceun diz, caang mok bawnz ceu nawhz tang aarz meoz.”
Kuanz keun nyah an yam boh keun nyah thawkz naamz
18 Meuz Yesuhz daz boh ceun diz ne maang ihz mawh hawkz truz seuk deumz aacz ngaai Hnhz rae daz, “Kuanz keun nyah ohz taamz yam. Keuiz daz truz rae leh tihz Mih taangz kaai hnhz ne aez hnhz imz mial.”
19 Yesuhz kaw ceng lan tawiz hnhz, teu paez Hnhz kaw lan tawiz.
20 Meuz phangz an diz, maang keun nyah hawkz naamz thawkz a wa bawnz seu kawlz aarz wit. Hnhz lan tawiz puatz Yesuhz rae teu caam caai kreung Hnhz. 21 Keun nyah an diz daz tuhz phawmz daehz, “Beuk ohz bawnz teu caam caai kreung Hnhz kaw an ohz penz ne ngaz bilz,” daz ceun diz rae truz thaz puatz Yesuhz, teu caam caai kreung Hnhz.
22 Yesuhz waaiz yawt hnhz daz, “Yak kawcz phawmz kuanz, kawp mih yum rae a wa bilz.” Keun nyah an diz kaw moh rak luat meuz diz.
23 Meuz Yesuhz kut tuhz kaang ihz mawh ne awlz wungz ihz keui ronyz rae putz piz tawiz ihz yam. 24 Hnhz lao keuh, “Lae thaz nawk raez, kuanz keun nyah ne nam yam keuiz, yaetz reuk ngeut pan.” Keuiz daz keuh ngot keulz Hnhz. 25 Meuz wungz ihz keui lae thaz nawk ne Hnhz kut tawnz tihz kuanz keun nyah, kuanz keun nyah kaw rawi truz. 26 Reu oiz an diz sirz lan tuhz prih an diz.
Yesuhz seuk neum ihz ngaai bimz keu aarz
27 Meuz Yesuhz lae lan thaz a diz ne maang ihz ngaai bimz keu aarz truz tawiz puatz Hnhz, kaar raak daz, “Kuanz khunz Dawit, teur yawng aaiz raez.”
28 Meuz Yesuhz kut tuhz kaang ne kaar truz cu Hnhz, Hnhz kaw maanyz kaar, “Anz paarz yum Ohz cih penz bawnz?” Kaar kaw mial daz, “Yum boh, Tahz.”
29 Yesuhz kaw teu ngaai kaar rae daz, “Aez naeh tawiz ceun paarz yum.” 30 Ngaai kaar kaw a wa awlz. Yesuhz seumz mawn kaar nahz, “Yawt, yak aez ihz mas lawng an ni naz.” 31 Keuiz daz kaar lae teuk prae reu oiz an diz tuhz prih an diz.
Ihz ahz mawz reu ma
32 Meuz kaar lae lan ne ihz keui leh truz ihz ahz hawkz an phiz kut, truz cu Yesuhz. 33 Meuz a wa wah thengz phiz ne ihz ahz an diz kaw mawz upz truz. Wungz ihz keui sangz baaiz rae daz, “Tuhz kheuz Israel ne nam ti awlz ceun ni.”
34 Keuiz daz Pharise keui daz, “Hnhz ceuk naeng khunz phiz rae wah thengz phiz.”
Ihz cih kaanz lany
35 Yesuhz lan tawiz weng tawiz pruh, sawnz aez ihz nahz tawiz crawp, rawz reu oiz rak lawng prih Phraz boh cih aez ihz penz klawhz meoz keui moh rak. 36 Meuz Hnhz awlz wungz ihz ne Hnhz teur yawng keuh kawp daz keuh khiz phawmz rae nam maang an kawr naeh ceun soz nam maang ihz damz. 37 Hnhz lao teu paez Daehz keui nahz, “An rak seum woc leh keui heungz baaiz, keuiz daz ihz woc samz lany. 38 Maanyz Tahz aez phuhz truz ihz woc leh tuhz maar.”