Yesuhz cao teu paez seu kawlz aarz
10
Hnhz raak teu paez Daehz seu kawlz aarz rae aez keuh nahz a na wah thengz phiz boh cih aez ihz penz keunyz keui moh rak. 2 Mus teu paez seu kawlz aarz samz, seun teungz naeh Simon an ihz raak Petros, seum bohz hnhz Andre, Yakop, Yohn an naeh kuanz Sebede, 3 Phillip, Bartholome, Thomas, Matthe an naeh ihz seutz khawn, Yakop an naeh kuanz Alphaeus, Thadae, 4 Simon ihz plaakz prih omz Yio boh Yudas Iskariot an ngaz saz kokz Hnhz.Kaanz teu paez seu kawlz aarz
5 Yesuhz phuhz keuh seu kawlz aarz seumz daz, “Yak lan tawiz peur lah ihz an nam anz kheuz Yio, yak kut tawiz weng kheuz Samari. 6 Lan tawiz kheuz Israel an naeh soz an bilz keui raez. 7 Meuz pehz lan ne rawz daz, ‘Kraao prih kaang raaoz a wa thatz tae.’ 8 Cih aez ihz penz keui moh rak, aez ihz yam keui meu rae imz, aez ihz tut keui rak, wah thengz phiz, ceun pehz bawnz maat ne aez ihz nahz maat maat. 9 Yak khaenz ron, khamz, tawng tuhz seum mat, 10 yak khaenz seu kiz lae reung dengz, kreung plut, cawng khlapz boh kawn teur leui keui. Kawp daz ihz cih kaanz ne theukz bawnz boh langz.
11 Meuz kut tuhz weng tuhz pruh ne khahz kaang ihz an trohz thangz rae thangz kaang keuh thonz taw pehz lae mial. 12 Meuz pehz kut tuhz kaang ihz ne tak keuh raez. 13 Kaang an diz beuk theukz kaw reung dengz nimz aez naeh kaai keuh, beuk nam theukz kaw aez truz cu mial pehz. 14 Beuk ihz nam saanyz rap pehz, nam teuk ngarz mony reu ma pehz kaw meuz pehz lae thaz kaang an diz ne pisz thengz yangz cawng pehz. 15 Ohz daz mawn pehz nahz, kaai seu ngihz tatz traz ne weng an diz ngaz talz na lak weng Sodom boh weng Komorrah.
Talz ihz pae suamz
16 Ohz phuhz lan pehz naeh ceun soz plawiz peur lah sohz prawk. Kawp ceun diz lakz laem ceun heunyz, keu ceum ceun ploiz raez. 17 Seu tih ihz thiangz pehz. Keuh ngaz aapz pehz tawiz rumz keui, rotz pehz tawiz crawp rawz traz keuh. 18 Ihz ngaz laak lan pehz aacz ngaai khunz boh ihz mawh kawp Ohz, aez naeh saak se Ohz aacz ngaai keuh boh ihz an nam anz kheuz Yio. 19 Meuz ihz mat pehz ne yak kawcz phawmz ngaz daz naehz, ngaz daz ceun nae. Meuz diz luat Phraz Pen Caoh ngaz aez pehz nahz mony reu ma an trohz. 20 Kawp daz nam anz pehz tahz lao leui, naeh Khuanz Paz ne lao tuhz pehz.
21 Kuanz mai teur deuiz ngaz aapz aez ihz piamz, kuanz paz kaw ngaz naeh ceun diz, kuanz keui kaw ngaz cih khatz mah paz daehz rae aapz aez ihz piamz. 22 Ihz keui ngaz ceuh pehz kawp pehz naeh teu paez Ohz, keuiz daz ihz yum klakz taw dutz ne ngaz bawnz reung dengz khyawt. 23 Meuz ihz pae suamz pehz seu ti ne kraai tiunz moh thaengz seu ti lah. Ohz daz mawn pehz nahz, co pehz maat sirz tawiz weng prih Israel ne Kuanz Kingz Ihz ngaz truz.
24 Teu paez nam kyahz taan sra daehz, kuanz leng nam mawh taan tahz paz leng daehz. 25 Teu paez naeh ceun sra daehz, kuanz leng naeh ceun tahz paz leng daehz kaw trohz. Beuk ihz raak tahz kaang naeh khunz phiz Beelsebul kaw kaai ihz kaang hnhz baaiz nam lo lao leui.
Tahz an lo doz
26 Kawp ceun diz yak doz keuh. Nam maang phrihz phrahz naehz an reupz bawnz, an seun tapz keui ngaz lawk. Nam maang ta ihz nam mas an unz bawnz. 27 An Ohz lao tuhz an bimz ne pehz lao tuhz an thaangz raez, reus keu seoz an pehz ngarz kaw pehz sawz lang kusz kaang raez. 28 Yak doz ihz piamz bawnz taw toz, an nam piamz bawnz khuanz. Lo doz Tahz piamz bawnz tang toz tang khuanz tuhz ngal raai. 29 Simz sriapz keu aarz ne saz paekz tawng seu pyaz nam anz haz? Beuk Paz pehz nam sunz aez naeh ne simz hawkz kaw nam bawnz klaez tuhz keu tehz. 30 Paz pehz yawt pehz thanz paw dawkz mok hukz kingz pehz klawhz senz. 31 Kawp ceun diz yak doz, pehz myaat lak wungz simz keu diz.
Ihz saanyz rap boh ihz nam saanyz rap
32 Ihz daz daehz mas Ohz aacz ngaai ihz ne Ohz kaw ngaz daz Daehz mas hnhz aacz ngaai Paz Ohz an naeh lang kaang raaoz. 33 Keuiz daz ihz daz daehz nam mas Ohz aacz ngaai ihz ne Ohz kaw ngaz daz Daehz nam mas hnhz aacz ngaai Paz Ohz an naeh lang kaang raaoz.
Nam leh truz an nimz, leh truz waac
34 Yak thaang Ohz leh reung dengz nimz truz cu prih keu tehz. Ohz nam leh reung dengz nimz truz, leh truz waac. 35 Kawp daz Ohz truz cih teuk praasz kuanz keur meh aez khatz paz, kuanz keun nyah aez khatz mah, kuanz moi aez khatz keunz. 36 Raan su daehz kaw ngaz naeh truz ihz kaang daehz.
37 Ihz rak mah paz daehz leuz Ohz ne nam theukz Ohz, ihz rak kuanz daehz leuz Ohz kaw nam theukz Ohz. 38 Ihz nam baekz lakz klawngz klaengz tawiz Ohz kaw nam theukz Ohz. 39 Ihz sunz aez phawmz daehz lawt ne ngaz luh sumz, ihz luh sumz phawmz kawp Ohz samz ngaz bawnz phawmz cen cen.
A keoz
40 Ihz saanyz rap pehz keui naeh ihz rap Ohz, ihz saanyz rap Ohz kaw saanyz rap Tahz an phuhz Ohz truz. 41 Ihz saanyz rap ihz taangz phraz kawp hnhz naeh ihz taangz phraz ne bawnz a keoz ceun ihz taangz phraz. Ihz saanyz rap ihz keu sangz kawp hnhz naeh ihz keu sangz kaw bawnz a keoz ceun ihz keu sangz. 42 Ohz daz mawn pehz nahz, ihz aez omz seu klakz tawz teu paez Ohz an kyehz lak ihz ne bawnz a keoz nam kaat.”