Yesuhz lao lawng Yohn tahz teuk sruz
11
Meuz Yesuhz a wa seumz teu paez Daehz seu kawlz aarz ne lae lan sawnz aez rawz aez tawiz weng prih Kalile.2 Yohn moh tuhz thang ne ngarz lawng Khris cih, hnhz cao teu paez daehz teur ka 3 truz maanyz Yesuhz daz, “Mih naeh Tahz an te truz haz? Nam anz kaw ehz ngaz bawnz mang thaengz hawkz haz?”
4 Yesuhz mial daz, “Weng lao mial Yohn nahz an paarz ngarz boh an paarz awlz. 5 Ihz ngaai bimz keui awlz, ihz cawng nam rak keui nuar, ihz tut keui rak, ihz lutz keui ngarz, ihz yam keui meu rae imz, ihz phaanz keui kaw a wa bawnz ngarz reu oiz rak. 6 Ihz nam thaang pleung kawp Ohz ne bawnz an rak.”
7 Meuz teu paez Yohn keui weng lan ne Yesuhz lao plaez wungz ihz keui nahz lawng Yohn daz, “Pehz lan yawt naehz tuhz ruk? Yawt teungz teur law kurz pat haz? 8 Beuk nam anz kaw lan yawt naehz? Ihz kap kreung laep haz? Ihz kap kreung laep keui moh tawiz hawz khunz. 9 Lan yawt naehz? Ihz taangz phraz haz? Anz, Ohz lao pehz nahz, hnhz mawh lak ihz taangz phraz eu. 10 Taemz mok lawng hnhz tuhz kyaamz lik daz, ‘Teuk ngarz raez, Ohz ngaz phuhz ihz krai reu oiz Ohz aacz ngaai Mih, hnhz ngaz meu rae reung dengz aacz ngaai Mih.’ 11 Ohz lao mawn pehz nahz tuhz keun nyah keut ne maat maang ihz mawh myaat lak Yohn tahz teuk sruz. Keuiz daz ihz kyehz lak ihz lang prih kaang raaoz ne mawh myaat lak hnhz boh. 12 Tae leh seu ngihz Yohn tahz teuk sruz taw phraeoz seu ni ne prih kaang raaoz talz ihz kyaamz keui kut rae ihz tiu kut keu diz kaw rimz leh. 13 Kawp daz kyaamz ihz taangz phraz boh kyaamz sinz keui rawz tak phraeoz co Yohn. 14 Beuk pehz sunz saanyz rap kaw hnhz an ni naeh Eliyas an ngaz truz. 15 Ihz maang keu tiakz keui aez hnhz ngarz.
16 Ngaz leh naehz neungz ihz kaap seu ni? Keuh naeh ceun kuanz ihz keu dez tuhz teur laas keui teur raak daz daehz nahz, 17 ‘Ehz putz ceu waasz kaw pehz nam kaz, ehz keun euiz kaw pehz nam lengz lengz.’ 18 Kawp daz Yohn truz nam suamz nam tiangz ne keuh daz naeh ihz phiz kut. 19 Kuanz Kingz Ihz truz suamz suamz tiangz tiangz ne keuh daz, Hnhz an ni naeh ihz suamz leuz tiangz leuz, naeh tahz keu daaoz, naeh ihz cih bohz ihz seutz khawn boh ihz nam taap keui. Keuiz daz pinya Phraz Pen Caoh mas naeh an anz tawiz kaanz Daehz cih.”
Weng an nam caanz reung dengz kawi
20 Meuz ceun diz Yesuhz seun teungz nae ihz weng an Hnhz plaez mok an laak laaiz heungz keui nahz, kawp daz keuh nam caanz reung dengz kawi daehz. 21 “Oz, weng Korasin! Oz, weng Betsaida! An laak laaiz an plaez a pehz ne khanz seuk daz plaez kaai weng Taia boh weng Sidon ne keuh ngaz kap kreung teur haaoz rae keu dez tuhz keum rum, caanz reung dengz kawi truz thaz meuz neungz. 22 Ohz lao pehz nahz, kaai seu ngihz tatz traz ne weng an keu diz ngaz talz na lak weng Taia boh weng Sidon. 23 Mih luz, weng Kapernaum, mih ngaz talz ihz phrawz daehz lang kaang raaoz haz? Nam keuiz, mih ngaz klaez phraeoz prih Maranahz. An laak laaiz plaez a mih ne khanz seuk daz plaez kaai weng Sodom kaw weng an diz yeung naeh phraeoz seu ngihz meu ni. 24 Ohz lao pehz nahz, kaai seu ngihz tatz traz ne weng an diz ngaz talz na lak weng Sodom.”
Tahz aez an sa phawmz ta ihz khiz phawmz
25 Meuz kraao an diz Yesuhz daz, “Paz, an naeh Tahz kaang raaoz boh prih keu tehz, Ohz taang kez cuz Mih kawp daz Mih unz mok an keu ni ihz mawz ihz mas keui nahz, samz lawk plaez kuanz ihz kyehz keui nahz. 26 Anz, Paz, kawp daz an ni naeh an Mih trohz phawmz.”
27 Waaiz an diz Yesuhz kaw daz ihz nahz, “Paz Ohz aapz aez Ohz nahz hacz aamz. Neuz lak Hnhz yaeh nam mas Kuanz, neuz lak Kuanz boh ihz an Kuanz lawk plaez ne yaeh nam mas Paz.