Tahz seu ngihz sinz
12
Meuz phangz an diz Yesuhz datz lan tawiz maar ngohz kaaiz kyung kaai seu ngihz sinz. Teu paez Hnhz keui coh rae seur keut suamz seum kawr ngohz kaaiz kyung. 2 Meuz Pharise keui awlz ne daz Hnhz nahz, “Yawt, teu paez Mih keui cih nam tawiz sinz traz.”3 Hnhz mial daz, “Meuz khunz Dawit boh bohz hnhz keui coh ne keuh cih naehz, pehz nam ti rawz maen haz? 4 Hnhz kut tuhz kaang Phraz Pen Caoh rae suamz kaaiz mun an taangz aacz ngaai Phraz Pen Caoh, sangz daz tawiz sinz Moses naeh mok ne mas boh daehz boh kuanz bohz daehz nam suamz bawnz, an saangz longz keui pan suamz bawnz. 5 Pehz nam ti rawz tuhz sinz Moses haz? Sinz an nam bawnz cih kaanz kaai seu ngihz sinz tuhz wat daz kaw saangz longz keui nam cih tawiz sinz kaw nam kawi. 6 Ohz lao pehz nahz, a niz maang ihz mawh myaat lak wat. 7 Beuk pehz mas ti loz, ‘Ohz song reung dengz teur yawng, nam song toz pukz caw’ kaw pehz nam yaak nae ihz nam maang reung dengz kawi. 8 Kawp daz Kuanz Kingz Ihz naeh Tahz seu ngihz sinz.”
Ihz tihz wiatz seu plaakz
9 Yesuhz lae thaz a diz rae kut tuhz crawp rawz traz Yio boh. 10 A diz maang ihz tihz wiatz seu plaakz. Pharise pao yawt aez daehz caang nae Yesuhz, maanyz, “Seuk neum kaai seu ngihz sinz ne anz tawiz traz haz?”
11 Hnhz lao keuh, “Beuk pehz maang soz hawkz, klaez lu kaai seu ngihz sinz ne anz maang ihz nam leh plaez? 12 Ihz myaat lak soz baaiz baaiz. Kawp ceun diz cih an rak kaai seu ngihz sinz ne tawiz boh sinz traz.” 13 Yesuhz daz ihz an diz nahz, “Peuk caatz tihz mih raez.” Hnhz kaw peuk caatz tihz daehz rae a wa rak deuiz ceun thaz seu plaakz boh. 14 Keuiz daz Pharise keui lae lan rae teur daz daehz nahz, ngaz piamz thengz Yesuhz ceun nae.
Peur cao an Phraz Pen Caoh ras
15 Meuz Yesuhz mas lawng an diz ne lae lan thaz a diz. Ihz heungz baaiz lan tawiz Hnhz, Hnhz cih aez keuh moh rak, 16 aez seu tih yak aez ihz keui lao ihz nahz reung naeh Daehz. 17 An ni aez keunyz mony reu ma ihz taangz phraz Isaiah, daz, 18 “An ni naeh peur cao Ohz ras, an Ohz rak, an Ohz trohz phawmz, Ohz ngaz mok khuanz Daehz kaai Hnhz rae Hnhz ngaz rawz traz an phrengz kaai kheuz ihz hacz aamz. 19 Hnhz nam rawhz, nam keurz. Nam maang ihz ngarz reus Hnhz tawiz reung dengz. 20 Hnhz ngaz nam kacz teuk peukz teungz teur law an wot, nam ku teuk ngat ngal ngawiz an teun kaz taamz tawhz thonz taw Hnhz cih aez traz an phrengz ne pae. 21 Kheuz ihz hacz aamz keui mang kaai mus Hnhz.”
Yesuhz boh khunz phiz Beelsebul
22 Waaiz an diz ihz keui leh ihz ahz hawkz an phiz kut, ngaai hnhz kaw bimz ne truz cu Hnhz, Hnhz kaw cih aez moh rak rae ihz ahz an diz kaw mawz upz truz rae a wa awlz. 23 Ihz hacz aamz kaw sangz rae daz, “Hnhz an ni naeh Kuanz khunz Dawit hiuz nawz?”
24 Keuiz daz meuz Pharise keui ngarz ne daz, “Hnhz ceuk naeng khunz phiz Beelsebul rae wah thengz phiz.”
25 Yesuhz mas an keuh thaang ne daz keuh nahz, “Prih naehz kaw keu yaoz, beuk keuh teur kawi daehz kaw ngaz luh, weng an nae, kaang an nae kaw, beuk keuh teur kawi daehz kaw nam penz weng, nam penz kaang. 26 Beuk Satan wah Satan kaw hnhz kawi mial daehz ne hnhz ngaz teuk praasz daehz rae prih keuh ngaz luh. 27 Beuk Ohz ceuk naeng Beelsebul wah thengz phiz daz kaw teu paez pehz samz ceuk naeng yaeh rae wah thengz? Kawp ceun diz keuh ngaz naeh ihz tatz traz pehz. 28 Keuiz daz beuk Ohz ceuk naeng Khuanz Phraz Pen Caoh wah thengz phiz ne prih Phraz Pen Caoh a wa phraeoz a pehz keuiz.
29 Samz thaengz, beuk nam mat teuk aacz ihz keum rang mawh ne ngaz cih seu naez rimz leh bawnz kreung kaang hnhz? Mat teuk aacz caang kai rimz leh bawnz rak rak. 30 Ihz nam moh plaakz Ohz naeh ihz thiangz Ohz. Ihz nam woc nam rawmz kawmz Ohz ne naeh ihz teuk beuz. 31 Ohz lao pehz nahz, reung dengz kawi klawhz meoz boh ihz saehz Phraz keui caang plawiz lawt bawnz, keuiz daz ihz saehz Khuanz Seu Ngamz samz nam lawt bawnz. 32 Ihz upz thiangz Kuanz Kingz Ihz kaw caang plawiz lawt bawnz boh keuiz daz ihz upz thiangz Khuanz Seu Ngamz samz nam plawiz lawt caat ni boh caat truz.
Teungz boh plaehz
33 Teungz rak kaw plaehz rak, teungz nam rak kaw plaehz nam rak. Yawt leh plaehz keuh kaw mas teungz. 34 Pehz naeh kheuz heunyz raai, pehz naeh ihz raai, ngaz cih seu naez caang upz an rak? Kawp daz tuhz kingz keu nuasz maang ceun nae kaw upz plaez ceun diz. 35 Ihz rak kaw leh plaez an rak thaz teuk phan ta kingz keu nuasz daehz, ihz nam rak kaw leh plaez an nam rak thaz teuk phan ta kingz keu nuasz daehz.
36 Ohz lao pehz nahz, ihz an daz boh mony reu ma nam laai lawng naehz ne ngaz talz taam klawhz khaw kaai seu ngihz tatz traz. 37 Kawp daz talz taam kawp mony reu ma daehz, samz lawt taam kawp mony reu ma daehz.”
An laak laaiz Yonah
38 Ihz mawz kyaamz teur ka boh Pharise keui maanyz Yesuhz daz, “Tahz sra, ehz sunz awlz an laak laaiz a Mih.”
39 Hnhz kaw daz, “Ihz meukz raai keu ni caang daz maanyz an laak laaiz ez. Neuz lak an laak laaiz ihz taangz phraz Yonah ne nam plaez an laak laaiz naehz. 40 Ceun Yonah bawnz moh tuhz klungz kahz waiz seu ngihz waiz borz ne Kuanz Kingz Ihz kaw ngaz bawnz moh tuhz klungz keu tehz waiz seu ngihz waiz borz. 41 Kaai seu ngihz tatz traz tui ihz weng Nineweh rawi ceng ngaz nae pehz. Kawp daz keuh caanz reung dengz kawi daehz kawp Yonah rawz. Yawt raez, a niz samz maang an mawh lak Yonah. 42 Kaai seu ngihz tatz traz ne naang khunz prih Seun Daalz rawi ceng rae ngaz nae pehz kaai seu ngihz tatz traz. Kawp daz hnhz truz thaz prih yaan rae truz teuk ngarz mony reu ma pinya khunz Solomon. Yawt raez, a niz maang an mawh lak khunz Solomon.”
Phiz raai mial kut
43 “Meuz phiz raai lae lan thaz a ihz ne phraeoz lan ti hawngz rae khahz dawmz ti preumz. Meuz nam awlz ne, 44 hnhz daz, ‘Ohz weng cu mial kaang daehz an ohz lae truz.’ Meuz hnhz a wa phraeoz ne awlz kaang an diz lawnz, pisz phreoz mok laep. 45 Hnhz lan raak truz bohz an raai lak daehz teu pulz rae kut moh tuhz ihz an diz. Reung naeh ihz an diz na lak meuz aacz boh. Kaai ihz meukz kaap seu ni kaw ngaz naeh ceun diz.”
Mah Yesuhz boh seum bohz Yesuhz
46 Meuz Yesuhz yeung rawz aez boh wungz ihz ne mah Hnhz boh seum bohz Hnhz keui truz ceng boh thaz nawk, sunz upz taw Yesuhz. 47 Teur ka daz Hnhz nahz, “Mah Mih boh seum bohz Mih yeung ceng boh thaz nawk, ngaz upz Mih da.”