8
Moh ceu nawhz taan taan Yesuhz lan tawiz weng tawiz pruh, rawz reu oiz rak lawng prih Phraz. Teu paez seu kawlz aarz kaw naeh kawmz Hnhz,
2 tang keun nyah teur ka an lawt thaz tihz phiz boh thaz an penz keui, keuh naeh Mari Makdalen an phiz teu pulz lae,
3 Yoanna an naeh yah Khusa, an naeh ihz mawh rumz khunz Herot, Susanna boh keun nyah aarz diz an heungz baaiz keui leh phrihz phrahz daehz kawr Yesuhz boh teu paez Hnhz keui.
Pung taek ihz pakz seu maalz
4 Meuz ihz heungz baaiz seu weng taw seu weng keui truz wungz tawz Yesuhz ne, Hnhz lao keuh nahz pung taek,
5 “Maang ihz hawkz lan pakz seu maalz. Cakz ceu teur ka klaez tawiz reung dengz, ihz paenz rae simz ploiz keui seutz suamz thengz.
6 Cakz ceu teur ka samz klaez peur lah ruk reu aangz, meuz lae truz penz teungz ne wiatz hawngz lan kawp daz keu tehz nam nyaakz.
7 Cakz ceu teur ka samz klaez peur lah ruk seur keutz, mawh teun peu ne teungz seur keutz keui riat keuh.
8 Cakz ceu teur ka samz klaez kaai keu tehz rak, teungz ne mawh plaehz truz peur ya pun.”
Meuz Hnhz daz ceun diz ne, Hnhz raak daz, “Ihz maang keu tiakz keui aez hnhz ngarz.”
Kawp naehz Yesuhz bawnz lao pung taek an ni?
9 Teu paez Yesuhz keui maanyz Hnhz ti loz mony pung taek.
10 Hnhz tawpz daz, “pehz bawnz mas an truh an trawng prih Phraz Pen Caoh. Keuiz daz ihz keu diz nahz samz Ohz bawnz lao mony pung taek, keuh yawt boh kaw nam awlz, teuk ngarz boh kaw nam loz.”
Ti loz mony pung taek
11 “Ti loz mony pung taek samz, cakz ceu ne naeh mony reu ma Phraz.
12 Cakz ceu an klaez tawiz reung dengz ne naeh ceun ihz ngarz mony reu ma Phraz, Manaat truz leh thengz traz an naeh tuhz kingz keu nuasz keuh, yak aez keuh yum, yak aez keuh bawnz khyawt.
13 Cakz ceu an klaez peur lah ruk reu aangz samz naeh ceun ihz ngarz mony reu ma Phraz, keuh seuz phawmz saanyz rap traz boh. Keuiz daz rias nam kut truh tuhz kingz keu nuasz keuh. Keuh yum taw seu co pan, meuz talz reung dengz kyaam ya ne keuh keun titz.
14 Cakz ceu an klaez ruk seur keutz ne ihz ngarz mony reu ma Phraz, keuiz daz keuh cih tawiz lomz daehz, reung dengz kawcz phawmz, takz phawmz ron khamz ciz cim lawz kahz keui riat keuh rae plaehz nam kuhz.
15 Cakz ceu an klaez kaai keu tehz rak samz naeh ceun ihz ngarz mony reu ma Phraz, leh phawmz an rak boh an keun ra ne saanyz rap rae nyeun thonz taw plaehz.
Leh sroz dupz ngal dupz
16 Yaeh nam leh sroz dupz ngal ngawiz peun kleoz, nam anz kaw nam mok tuhz keutz kuz. Aez thaangz sapz ihz ne mok kaai lakz ngal ngawiz leun.
17 Nam maang phrihz phrahz naehz an seun tapz bawnz, ngaz bawnz awlz hacz aamz. Phrihz phrahz an unz keui kaw ihz ngaz mas, ihz ngaz awlz.
18 Kawp ceun diz pehz bawnz teuk ngarz ceun nae ne seu tih daehz eunz lah. Kawp daz tawz ihz maang ne ngaz bawnz thaengz, tawz ihz nam maang ne leh thengz thaengz tang an hnhz thaang daehz maang.”
Mah Yesuhz boh seum bohz Yesuhz
19 Mah Yesuhz boh seum bohz Yesuhz keui truz cu Hnhz, keuiz daz kawp wungz ihz keui heungz baaiz rae nam caang lan thatz Hnhz.
20 Ihz teur ka lao Yesuhz, “Mah Mih boh seum bohz Mih keui ceng boh thaz nawk tui, keuh sunz awlz mih da.”
21 Yesuhz daz keuh nahz, “Ihz teuk ngarz cih tawiz mony reu ma Phraz ne naeh mah Ohz boh seum bohz Ohz.”
Yesuhz teuk deukz cung coh
22 Naeh seu seu ngihz Yesuhz boh teu paez Hnhz keui kut tuhz ceun luang, Hnhz daz keuh nahz, “Han! Ehz lo lan thaz tui omz nawngz lah.” Keuh kaw teur aacz daehz lan.
23 Meuz keuh lan ne Yesuhz yaetz reuk ngeut tuhz ceun luang. Meuz ceun diz cung longz kurz longz pat tuhz nawngz, omz ngaz neuk tuhz ceun luang keuh. Keuh talz phez mawh longz.
24 Teu paez keui lan peun rawi Hnhz daz, “Tahz, Tahz, ehz ngaz leucz omz.”
Yesuhz kaw ceng lao kurz boh seuk mar omz an seuk rawi keui kaw deukz lan.
25 Hnhz daz teu paez keui nahz, “Pehz daz daehz yum ne naeh a naez?”
Keuh teur aacz daehz doz baaiz paw sangz, teur daz daehz nahz, “Hnhz an ni naeh yaeh ez? Hnhz lao kurz boh seuk mar omz kaw teuk ngarz Hnhz!”
Yesuhz wah thengz phiz raai
26 Yesuhz boh teu paez Hnhz keui tumz ceun luang phraeoz eungz Kerasin, an naeh thaz tui omz nawngz Kalile.
27 Meuz Yesuhz raw lan lang pukz ne ihz weng an diz hawkz an phiz kut ne truz saanyz Hnhz. Hnhz nam kap kreung ceu nawhz baaiz. Hnhz nam moh kaang daehz, moh tuhz ruk peun lu pan.
28 Meuz hnhz awlz Yesuhz ne kupz aacz ngaai Yesuhz, raak keurz daz, “Yesuhz, Kuanz Phraz Pen Caoh an trawng dutz aez! Mih lo ohz cih naehz? Ohz maanyz mih, yak pae suamz ohz!”
29 An hnhz daz ceun diz ne kawp daz Yesuhz wah thengz teuk aacz phiz raai a daehz. Phiz a wa kut tuhz hnhz heungz laehz baaiz, ihz leh nuarz hirz boh khoi cawng mat mok rae pao yawt boh hnhz kaw hnhz teuk teutz an mat mok daehz rae phiz keui wah hnhz kut tuhz ruk.
30 Yesuhz maanyz hnhz, “Mus mih daz naehz?”
Hnhz daz, “Mus ohz daz Phiz Wungz.” Kawp daz phiz keui kut heungz baaiz tuhz ihz an diz.
31 Phiz keui maanyz yak aez Yesuhz wah daehz lan tuhz ngal raai an truh lak ihz.
32 A diz maang wungz lek mawh suamz boh kaai rang ne phiz keui maanyz Yesuhz aez daehz bawnz kut tuhz wungz lek, Hnhz kaw aez keuh kut.
33 Phiz keui kaw lae thaz ihz an diz, kut tuhz wungz lek, lek keui teuk basz cur tawiz phraakz rae leucz yam tuhz omz nawngz.
34 Meuz ihz khaenz lek keui awlz lawng an taamz naeh peun ne keuh wang lan lao tuhz weng boh tawiz pruh.
35 Ihz keui kaw lae yawt an daehz ngarz. Meuz keuh phraeoz tawz Yesuhz ne keuh awlz ihz phiz tomz kut ne keu dez boh rim cawng Yesuhz, kap boh kreung, phawmz hnhz kaw a wa rak mial rae keuh kaw doz.
36 Ihz awlz tawiz keui lao plaez ihz nahz lawng an ihz phiz kut ne cih seu naez moh rak truz.
37 Ihz eungz Kerasin keui doz baaiz rae keuh maanyz Yesuhz lae lan thaz eungz daehz. Yesuhz kaw kut tuhz ceun luang, weng mial.
38 Ihz phiz lae an diz kaw maanyz lan tawiz Yesuhz,
39 Yesuhz daz hnhz nahz, “Mih weng cu kaang daehz, krai lawng Phraz Pen Caoh cih kez cuz kaai mih thanz teur nae ne.”
Ihz an diz weng krai plaez ihz tang weng nahz an Phraz Pen Caoh cih kez cuz kaai daehz thanz teur nae ne.
Kuanz keun nyah Yairus boh keun nyah naamz thawkz
40 Meuz Yesuhz phraeoz mial plaakz thaz niz nawngz ne ihz heungz baaiz pao Hnhz rae saanyz seuz rap Hnhz.
41 Meuz ceun diz maang ihz mawh crawp hawkz mus hnhz daz Yairus ne truz kupz rim cawng Yesuhz, hnhz maanyz Yesuhz aez weng kaang daehz.
42 Kawp daz hnhz maang kuanz keun nyah taw daehz, a saak a wa naeh seu kawlz aarz khopz ne penz paw raenz yam.
Meuz Yesuhz lan ne ihz keui teur aacz daehz prawk cu rim Hnhz klawhz plaakz.
43 Maang keun nyah hawkz naamz thawkz a wa bawnz seu kawlz aarz wit, seuk neum a naez kaw nam bilz, ron khamz hnhz pan hacz.
44 Hnhz prawk truz thaz puatz Yesuhz rae teu caam caai kreung Hnhz, meuz ceun diz luat, naamz hnhz kaw a wa eutz.
45 Yesuhz kaw maanyz, “Yaeh teu Ohz?”
Ihz keui kaw daz daehz nam bawnz teu. Petros daz, “Tahz, wungz ihz keui prawk wit wit boh Mih.”
46 Keuiz daz Yesuhz daz, “Maang boh ihz hawkz teu Ohz, Ohz mas taanz khoz lae thaz Ohz.”
47 Keun nyah an diz mas daehz nam unz bawnz, paw teur ceus rae truz kupz aacz ngaai Yesuhz, hnhz lao aacz ngaai ihz kawp naehz rae daehz teu boh, a wa teu kaw moh rak luat ne.
48 Yesuhz daz keun nyah an diz nahz, “Kawp mih yum rae a wa bilz, lan nimz nimz naz.”
49 Meuz Yesuhz daz boh ceun diz ne maang ihz hawkz truz thaz kaang Yairus truz lao daz, “Kuanz keun nyah mih a wa yam, nam lo krio Tahz Sra leui.”
50 Meuz Yesuhz ngarz ne lao Yairus nahz, “Yak khiz, lo yum pan, kuanz keun nyah mih ne ngaz rak boh.”
51 Meuz Yesuhz phraeoz kaang Yairus ne neuz lak Petros, Yakop, Yohn boh mah paz keun nyah pan nam aez yaeh kut tuhz kaang.
52 Ihz keui yaam lengz lengz boh tuhz kaang kawp kuanz keun nyah yam. Yesuhz daz keuh nahz, “Yak yaam, kuanz keun nyah ne nam yam keuiz, yaetz reuk ngeut pan.”
53 Ihz keu diz mas kuanz ihz ne a wa yam rae ngot keulz Yesuhz.
54 Yesuhz cao keuh lae klawhz ihz rae tawnz tihz kuanz ihz ne raak daz, “Kuanz, rawi raez!”
55 Khuanz hnhz kut truz mial rae rawi truz luat. Yesuhz cao keuh leh aez seum suamz aez hnhz suamz.
56 Mah paz hnhz keui sangz baaiz, keuiz daz Yesuhz seumz keuh yak aez keuh lao ihz nahz lawng an ni.