Pung taek ihz pakz seu maalz
13
Kaai seu ngihz an diz Yesuhz lae thaz kaang an diz, keu dez boh waar nawngz. 2 Wungz ihz keui truz cuhz a Hnhz rae Hnhz raw keu dez kaai ceun luang. Ihz samz naeh lang pukz. 3 Yesuhz leh mony pung taek keui sawnz lawng klawhz meoz ihz keui nahz, Hnhz daz, “Maang ihz hawkz lan pakz seu maalz. 4 Meuz hnhz pakz cakz ceu ne teur ka klaez tawiz reung dengz rae simz keui truz seutz suamz. 5 Teur ka klaez ti reu aangz heungz, keu tehz lany. Cakz ceu an diz liang lae truz luat kawp daz keu tehz lany. 6 Keuiz daz meuz seu ngihz raw ne a wa wiatz hawngz kawp daz rias nam truh. 7 Cakz ceu teur ka samz klaez peur lah ruk seur keutz, seur keutz keui riat teungz an diz. 8 Cakz ceu teur ka samz klaez tuhz keu tehz rak, keuh plaehz truz seu peur ya pun, tualz kawlz pun, waiz kawlz pun kaai hnhz pakz.9 Ihz maang keu tiakz keui aez hnhz ngarz.”
Reung aanz mony pung taek
10 Teu paez keui truz cu Hnhz maanyz daz, “Cih naehz lao ihz nahz mony pung taek keui a?”
11 Hnhz mial daz, “Pinya an unz mok lawng prih kaang raaoz keui Ohz aez boh pehz mas, keuiz daz kaai keuh samz nam aez mas. 12 Kaai ihz maang ne ngaz aez thaengz rae hnhz ngaz leung, kaai ihz nam maang samz bawnz leh thengz tang seu hnhz maang. 13 Kawp ceun diz rae Ohz bawnz krai plaez keuh nahz mony pung taek, ‘Keuh yawt boh kaw nam awlz, teuk ngarz boh kaw nam loz phawmz.’ 14 Ihz taangz phraz Isaiah tak mok aacz ne keunyz mawn kaai keuh daz, ‘Pehz yawt boh kaw nam awlz, teuk ngarz boh kaw nam loz phawmz. 15 Kawp daz kingz keu nuasz keuh tanz, keu tiakz keuh kaw niukz, ngaai keuh kaw itz. Beuk nam naeh ceun diz ngaai keuh kaw awlz, keu tiakz keuh kaw ngarz rae phawmz keuh plaak plaai truz ne Ohz cih aez keuh moh rak.’
16 Keuiz daz kawp ngaai pehz awlz, keu tiakz pehz ngarz rae pehz bawnz an rak. 17 Ohz daz mawn pehz nahz, ihz taangz phraz boh ihz keu sangz keui sunz awlz ceu nawhz baaiz an pehz awlz kaw nam awlz. Sunz ngarz an pehz ngarz kaw nam ngarz.
Ti loz mony pung taek
18 Teuk ngarz ti loz mony pung taek an diz raez. 19 Cakz ceu klaez tawiz reung dengz samz, ihz an bawnz ngarz reu oiz prih Phraz samz nam loz phawmz ne phiz truz truatz leh an pakz mok tuhz phawmz hnhz. 20 Cakz ceu an klaez kaai keu tehz reu aangz heungz samz, meuz hnhz ngarz reu oiz rak ne seuz phawmz saanyz rap. 21 Keuiz daz nam maang rias, moh taw seu co pan. Meuz hnhz talz reung dengz peur teuk boh ihz pae suamz kawp reu oiz rak ne phawmz luh lan luat. 22 Cakz ceu an klaez kaai ruk seur keutz samz, ihz ngarz mony reu ma Phraz keuiz daz kawcz phawmz ta daehz, phawmz takz ron khamz ciz cim riat mony reu ma Phraz rae nam plaehz. 23 Cakz ceu an klaez tuhz keu tehz rak samz, Keuiz daz ihz saanyz rap reu oiz rak naeh ceun cakz ceu klaez tuhz keu tehz rak ne naeh ihz loz phawmz reu oiz rak. Hnhz plaehz mawn seu peur ya pun, tualz kawlz pun, waiz kawlz pun kaai hnhz pakz seu maalz.”
Pung taek cakz wangz
24 Yesuhz lao mony pung taek tang meoz daz, “Prih kaang raaoz ne naeh ceun ihz pakz cakz ceu an rak tuhz maar daehz. 25 Meuz ihz keui yaetz reuk ngeut ne raan su truz pakz sapz cakz wangz peur lah kaaiz kyung kaw lan thengz. 26 Meuz teungz kaaiz kyung keui mawh, maang seum kawr ne teungz plaehz wangz keui awlz thaangz truz. 27 Peur cao tahz maar keui truz lao tahz maar daz, ‘Tahz sra, sapz mok cakz ceu an rak nam anz haz? Plaehz wangz keu diz samz truz thaz naez?’ 28 Hnhz mial daz, ‘Raan su cih eu.’ Peur cao keui kaw maanyz hnhz, ‘Anz mih sunz aez ehz bawkz thengz?’ 29 Hnhz kaw daz, ‘Nam, meuz pehz bawkz ne doz pa tang teungz kaaiz kyung. 30 Aez keuh mawh teur kawmz raez. Beuk woc tui ras leh teungz plaehz wangz, mat rae tucz thengz, kaaiz kyung samz sapz tuhz taen ohz.’”
Pung taek cakz mustart boh ceu
31 Hnhz lao thaengz mony pung taek tang meoz daz, “Prih kaang raaoz naeh ceun cakz mustart, ihz leh cakz mustart pakz sapz tuhz sraakz daehz. 32 Sangz daz cakz an diz naeh cakz an kyehz lak ihz kaw meuz a wa mawh ne mawh lak teungz seu tuhz keui hacz aamz rae simz ploiz keui truz cih sapz haanz a kaakz.” 33 Hnhz daz mony pung taek tang meoz thaengz, “Prih kaang raaoz naeh ceun ceu, keun nyah hawkz leh ceu sapz tuhz phangz kaaiz kyung waiz piat rae prae hacz aamz.” 34 Yesuhz lao wungz ihz keui nahz leh mony pung taek, beuk nam pa mony pung taek kaw Hnhz nam lao. 35 An ni aez keunyz mony reu ma ihz taangz phraz keui daz, “Ohz ngaz aangz mony ohz tang mony pung taek rae lao plaez an unz mok thaz meuz phaan cih prih keu tehz.”
Ti loz kaaiz kyung boh cakz wangz
36 Waaiz an diz Yesuhz mok thengz wungz ihz rae kut tuhz kaang. Teu paez keui truz maanyz Hnhz daz, “Lao plaez ehz nahz ti loz pung taek cakz wangz tuhz maar luz.”
37 Hnhz daz, “Ihz pakz cakz ceu an rak ne naeh Kuanz Kingz Ihz. 38 Maar samz naeh prih keu tehz, cakz ceu an rak ne naeh kuanz prih Phraz, Cakz wangz samz naeh kuanz Manaat. 39 Raan su an pakz ne naeh Manaat, kraao woc samz naeh kam pha lawng, ihz woc samz naeh teu maan kaang raaoz. 40 Ras plaez teungz plaehz wangz rae mat sapz tuhz ngal ne meuz kam pha lawng ne naeh ceun diz. 41 Kuanz Kingz Ihz ngaz cao teu maan kaang raaoz Daehz ras plaez ihz pleung boh ihz meukz keui thaz prih Daehz. 42 Teu maan kaang raaoz leh keuh wiurz sapz tuhz ngal an rok keur, ti bawnz yaam boh teur kak raangz. 43 Meuz ceun diz ihz keu sangz keui samz thaangz tuhz prih Paz daehz ceun seu ngihz. Ihz maang keu tiakz keui aez hnhz ngarz.
Pung taek phan ta an unz mok
44 Prih kaang raaoz naeh ceun phan ta an ihz pluz mok tuhz maar. Maang ihz hawkz awlz an diz ne buiz mok meu rae. Seuz phawmz saz phrihz phrahz daehz hacz aamz rae yal maar an diz. 45 Samz, prih kaang raaoz ne naeh ceun ihz ka khahz yal saengz plaez. 46 Meuz hnhz awlz saengz plaez langz mawh ne lan saz phrihz phrahz daehz hacz aamz kaw yal saengz plaez an diz.
Pung taek rup
47 Samz thaengz, prih kaang raaoz ne naeh ceun rup teuk klaez tuhz omz rae bawnz kahz paw keunyz. 48 Meuz kahz neuk boh tuhz rup ne tahz kahz keui laak plaez a waar. Keuh keu dez ras leh kahz an rak sapz tuhz yol, kahz an nam rak keui samz wiurz thengz. 49 Meuz kam pha lawng kaw naeh ceun diz. Teu maan kaang raaoz keui ngaz cur truz teur phraez ihz meukz tuhz ihz rak rae, 50 wiurz sapz tuhz ngal an rok keur, ti bawnz yaam boh teur kak raangz.”
Traz an anz an teun mehz boh an trimz
51 “Anz pehz loz phawmz an keu diz hacz aamz?” Keuh kaw daz, “Loz.” 52 Hnhz lao keuh, “Sra an a wa sawnz leh lawng prih kaang raaoz ne naeh ceun tahz kaang leh plaez kreung teun mehz, kreung trimz tuhz kaang daehz.”
Ihz nam saanyz Yesuhz tuhz weng Nasaret
53 Yesuhz lao mony pung taek keu diz kaw lae lan thaz a diz. 54 Yesuhz weng mial weng Daehz rae sawnz aez ihz nahz tuhz crawp keuh. Ihz keui sangz rae daz, “Ihz an ni bawnz pinya thaz naez ez? Taanz khoz an plaez bawnz an laak laaiz ne truz thaz naez ez?” 55 Hnhz nam anz kuanz lak seu maz haz? Mus mah keuh naeh Mari nam anz haz? Yakop, Yosep, Simon boh Yudas keui nam anz seum bohz Hnhz haz? 56 Seum bohz keun nyah Hnhz kaw naeh kawmz ehz nam anz haz? Hnhz bawnz truz taanz khoz an keu ni thaz naez ez? 57 Keuh nam paw song Hnhz.