Yohn tahz teuk sruz ne yam
14
Meuz ceun diz khunz Herot an upz peung prih Kalile ngarz lawng Yesuhz, 2 hnhz daz peur cao daehz nahz, “An ni naeh Yohn tahz teuk sruz, a wa meu rae imz thaz reung dengz yam, kawp ceun diz rae caang plaez taanz khoz an laak laaiz thanz teur ni.”3 Khunz Herot cawpz Yohn rae mok tuhz thang kawp Cao Naang Herodias, meuz aacz naeh yah seum bohz daehz Philip. 4 Kawp Yohn lao hnhz, “An tahz ehz leh keun nyah an diz ne nam tawiz sinz traz.” 5 Khunz Herot sunz piamz Yohn keuiz daz hnhz doz ihz kawp daz ihz keui mok hnhz naeh ihz taangz phraz hawkz.
6 Kaai seu ngihz keut khunz Herot ne kuanz keun nyah Herodias kut kaz tuhz pawiz, samz trohz phawmz khunz Herot. 7 Hnhz aez keu tih teung kaao daz ngaz aez seu hnhz maanyz.
8 Mah keuh lao hnhz rae hnhz daz, “Leh kingz Yohn tahz teuk sruz ne sapz tuhz pheunz an ni.”
9 Khunz ne sangz daz phawmz nam rak kaw kawp keu tih an hnhz mok aacz ngaai khaekz daehz rae hnhz lao ihz leh aez ceun keun nyah kyehz maanyz mok. 10 Hnhz cao ihz tatz kingz Yohn tuhz thang. 11 Ihz leh kingz Yohn sapz tuhz sroz paanz rae aez keun nyah nahz, keun nyah kyehz kaw lan aez mah daehz nahz. 12 Teu paez Yohn keui truz leh saangz keo toz hnhz. Waaiz an diz keuh lan lao Yesuhz.
Yesuhz damz ihz hanz rengz
(Markus 6:30-44, Lukas 9:10-17, Yohn 6:1-14)
13 Meuz Yesuhz ngarz reu oiz Yohn ne tumz ceun luang lo omz nawngz Kalile lan ti yaan ihz taw Daehz. Meuz wungz ihz keui ngarz reu oiz Hnhz lan ne keuh lae truz thaz pruh thaz weng rae lan tawiz Hnhz lang pukz. 14 Meuz Yesuhz cur thaz ceun luang ne awlz wungz ihz keui heungz baaiz Hnhz teur yawng keuh rae cih aez ihz nam moh rak keui moh rak truz.
15 Meuz teuk borz ne teu paez Hnhz keui truz cu Hnhz daz, “A niz naeh ti yaan ihz, samz a wa borz. Cao wungz ihz keui lan khahz yal seum suamz daehz nahz tawiz pruh raez.”
16 Yesuhz mial daz, “Keuh nam lo lan ti yaan ihz. Pehz aez keuh nahz seum suamz raez.”
17 Keuh kaw daz, “Ehz maang kaaiz mun khanz boh kahz keu aarz pan.”
18 Hnhz kaw daz. “Leh truz a Ohz ne raez.” 19 Hnhz cao ihz keu dez kaai taak ngiar. Leh kaaiz mun khanz boh kahz keu aarz ne ngaw yawt lang kaang raaoz, taang kez cuz Phraz rae pekz aez teu paez Daehz, teu paez keui kaw teur phraez aez ihz nahz. 20 Keuh suamz saakz klawhz ihz. Teu paez Yesuhz keui seutz leh an leuz ne bawnz seu kawlz aarz piat neuk neuk. 21 Ihz suamz kaaiz mun nam nap keun nyah boh kuanz ihz naeh ihz hanz rengz.
Yesuhz nuar lang kol omz
(Markus 6:45-56, Yohn 6:15-21)
22 Meuz diz luat Yesuhz cao teu paez Daehz kut tuhz ceun luang aez lo omz nawngz Kalile lan aacz, teun peu tang plawiz weng ihz. 23 Waaiz plawiz weng ihz ne Hnhz raw suz tawngz taw Daehz lang rang. Meuz teuk bimz ne Yesuhz naeh taw Daehz. 24 Keuiz daz ceun luang samz naeh yaan waar, kawp daz kurz nam maen plaakz rae seuk mar omz keui lukz laakz sapz ceun luang.
25 Kraao teuk ngup cao ne Yesuhz nuar kaai omz lan cu keuh. 26 Meuz teu paez keui awlz Hnhz nuar lang kol omz ne keuh doz baaiz, keuh daz naeh phet. Keuh raak keurz.
27 Keuiz daz Yesuhz daz luat keuh nah, “Yak doz, naeh Ohz eu, mok phawmz yaak yaak.”
28 Petros mial daz, “Beuk naeh Tahz kaw lao ohz aez daehz nuar lang kol omz lan cu Mih.”
29 Yesuhz kaw daz, “Truz raez.” Petros kaw lae thaz ceun luang, nuar lang kol omz lan cu Yesuhz. 30 Keuiz daz meuz hnhz awlz kurz krang ne doz, seun teungz kitz rae raak daz, “Tahz, khyawt ohz lah!”
31 Yesuhz kaw teuk pawrz tihz Daehz takz leh luat hnhz rae daz, “Euz, ihz reung dengz yum lany aez, cih naehz thaang pleung a?”
32 Meuz kaar kut tuhz ceun luang ne kurz kaw deukz. 33 Ihz an naeh kaai ceun luang keui waiz Hnhz, keuh daz, “Mih naeh mawn Kuanz Phraz Pen Caoh.” 34 Meuz keuh lo lan thaz tui omz nawngz ne phraeoz eungz Kennesaret. 35 Ihz moh a diz keui tang ngaai Yesuhz rae khahz lao ihz an naeh rim daehz. Ihz keui leh ihz penz truz cu Hnhz, 36 ihz penz keui maanyz teu caam caai kreung Hnhz. Ihz an teu keui kaw moh rak klawhz ihz.