Sawnz aez suz tawngz
11
Naeh seu seu ngihz Yesuhz suz tawngz boh seu ti. Meuz a wa ne teu paez Hnhz hawkz maanyz Hnhz daz, “Tahz, sawnz aez ehz nahz suz tawngz ceun Yohn sawnz aez teu paez daehz nahz luz.”
2 Yesuhz daz keuh nahz, “Meuz suz tawngz ne daz,
‘Paz ehz an naeh lang kaang raaoz,
aez mus Mih naeh ti ro se se kamz.
Aez prih Mih tae se kamz.
3 Aez ehz nahz seum suamz kumz klawhz seu ngihz,
4 ceun ehz plawiz lawt reung dengz kawi ihz cih pleung ehz ne
plawiz lawt aez ehz se kamz.
Yak aez ehz lan tawiz reung dengz kyaam ya.’”
5 Yesuhz lao thaengz keuh nahz, “Daz yawt ihz hawkz an naeh tuhz pehz ne lan cu kuanz bohz daehz meuz khinz sawmz, maanyz daz, ‘Aez ohz rawm kaaiz mun keu waiz luz,
6 kuanz bohz ohz lae reung dengz rae taamz phraeoz kaang ehz, ohz samz nam maang seum suamz naehz damz hnhz.’
7 Kuanz bohz hnhz kaw moh tuhz kaang daehz ne daz hnhz nahz, ‘Yak krio ohz! Keur wah a wa peun khatz, kuanz ihz ehz kaw yaetz kawmz ohz tuhz pahz ne. Ohz nam caang rawi leh aez naehz.’
8 Ohz lao pehz nahz, kawp daz naeh kuanz bohz daehz rae tahz kaang an diz rawi leh aez an hnhz maanyz nam anz. Kawp yaak maanyz tikz tikz rae tahz kaang an diz rawi leh aez an hnhz lo hacz aamz.
9 Kawp ceun diz Ohz lao pehz nahz, Maanyz raez, ngaz bawnz. Khahz raez, ngaz awlz. Khrakz keur wah raez, ngaz lawk aez boh pehz nahz.
10 Ihz maanyz keui bawnz, ihz khahz keui awlz, ihz khrakz keur wah kaw ngaz lawk aez boh.
11 Beuk kuanz pehz maanyz kahz ne anz maang paz an leh aez heunyz?
12 Beuk maanyz tamz yaerz samz leh aez maengz keur ngawz anz maang?
13 Pehz naeh ihz nam rak kaw mas boh leh aez kuanz daehz nahz an rak, Paz pehz an naeh lang kaang raaoz tui baaiz aez ihz maanyz Hnhz keui nahz Khuanz Seu Ngamz.”
Yesuhz boh khunz phiz
14 Naeh seu seu ngihz Yesuhz wah thengz phiz ahz. Waaiz phiz a wa lae ne ihz an diz kaw mawz upz truz. Ihz keui kaw sangz.
15 Keuiz daz ihz teur ka daz, “Hnhz ceuk naeng khunz phiz Beelsebul rae wah thengz phiz.”
16 Ihz teur ka samz cao Hnhz plaez an laak laaiz thaz kaang raaoz.
17 Yesuhz mas keuh wonz, Hnhz daz keuh nahz, “Ihz prih teur deuiz teur kawi daehz kaw prih an diz te luh. Ihz kaang kawmz teur kawi daehz kaw ngaz luh.
18 Beuk Satan ne tiukz mial daehz kaw prih hnhz nam khreumz. Pehz daz Ohz leh taanz khoz khunz phiz wah thengz phiz raai.
19 Beuk naeh ceun diz, kuanz pehz samz ceuk naeng yaeh rae wah thengz phiz? Kawp ceun diz keuh ngaz naeh lawng tatz traz kaai pehz.
20 Keuiz daz beuk Ohz leh reum haz tihz Phraz Pen Caoh wah thengz ne prih Phraz Pen Caoh a wa truz naeh peur la pehz.
21 Ihz keum rang mawh leh tang kreung tawnz pao kaang daehz ne yaeh nam leh bawnz phrihz phrahz hnhz.
22 Keuiz daz maang ihz keum rang baaiz mawh lak hnhz ne pae hnhz, leh thengz kreung tawnz an hnhz phawmz mawh rae rimz leh phrihz phrahz an hnhz rawmz mok.
23 Ihz nam naeh plaakz Ohz ne naeh ihz thiangz Ohz, ihz nam rawmz tawiz Ohz ne naeh ihz sraz sraz.
Lawng phiz raai mial kut
24 Meuz phiz raai lae thaz ihz ne lan tawiz ti hawngz, khahz dawmz ti moh. Meuz hnhz nam awlz ti moh ne daz mial daehz eunz ngaz weng cu mial ti moh trimz.
25 Meuz phraeoz weng mial ne awlz pisz mok phreoz mok laep laep.
26 Phiz an diz raak leh phiz an raai lak daehz teu pulz, kut truz moh tuhz an diz. Reung naeh thaz puatz ihz an diz na lak meuz aacz boh.”
Reung dengz rak an mawn
27 Meuz phangz Yesuhz daz boh ceun diz ne, maang keun nyah hawkz naeh tuhz wungz ihz ne raak daz, “Mah an keun meur Tahz ehz boh damz omz buhz Tahz ehz ne maang reung dengz rak.”
28 Yesuhz mial daz, “Keuiz daz ihz teuk ngarz mony Phraz boh cih tawiz ne baaiz bawnz an rak.”
An laak laaiz Yonah
29 Meuz wungz ihz keui keur rim Yesuhz ne Hnhz daz, “Ihz seu ni naeh kaap ihz raai, keuh khahz an laak laaiz rak seum sangz. Keuiz daz neuz lak an laak laaiz Yonah, Ohz nam plaez keuh nahz naehz.
30 Ceun Yonah penz an laak laaiz a ihz weng Nineweh ne, Kuanz Kingz Ihz kaw ngaz penz ta ihz kaap seu ni nahz.
31 Meuz tatz traz ne naang haw khamz prih Seun Daalz ngaz aez taam a keuh, kawp daz hnhz moh prih yaan tui truz teuk ngarz mony reu ma pinya khunz Solomon. Ohz daz pehz nahz, a niz maang ihz mawh lak khunz Solomon.
32 Meuz tatz traz ne ihz weng Nineweh keui ngaz rawi ceng aez taam keuh, kawp daz keuh caanz reung dengz kawi daehz meuz keuh ngarz Yonah krai, a niz maang ihz mawh lak Yonah.
Ngaai naeh ceun ngal ngawiz toz
33 Ihz kleoz ngal ngawiz ne yaeh nam leh sroz dupz, nam seun tapz mok hnhz. Mok kaai khrengz ngal rae aez ihz kut tuhz kaang keui caang awlz thaangz.
34 Ngaai pehz naeh ngal ngawiz toz pehz. Beuk ngaai pehz rak kaw thaangz tang toz. Keuiz daz meuz ngaai nam rak leui kaw bimz lang tang toz.
35 Seu tih yak cih aez an thaangz tuhz daehz penz an bimz.
36 Beuk thaangz tang toz kaw nam maang ti bimz rae ceun ngal ngawiz thaangz kaai toz pehz ne aasz tang toz.”
Yesuhz nae Pharise boh ihz mawz kyaamz
37 Meuz Yesuhz a wa lao ceun diz ne, maang Pharise hawkz truz raak Hnhz suamz seum suamz, Hnhz kaw kut keu dez suamz.
38 Meuz Pharise an naeh tahz kaang awlz Yesuhz suamz seum suamz nam khez tihz ne sangz.
39 Kawp ceun diz Yesuhz daz hnhz nahz, “Pharise pehz keui teuk aamz thaz nawk klakz boh sroz, keuiz daz tuhz nao samz neuk taw lawphahz boh an raai keui pan.
40 Ihz ngeu keui aez! Phraz Pen Caoh phaan cih thaz nawk tang tuhz nao nam anz haz?
41 Beuk pehz aez ihz phaanz keui nahz an naeh tuhz nao kaw a wa aamz hacz aamz ta pehz.
42 Pharise keui aez, pehz bawnz an nam rak! Pehz leh imz krim boh keul disz, teungz an kut seu neumz klawhz meoz keui lu seu kawlz pun seu pun Phraz Pen Caoh nahz kaw pehz nam cih phrengz, nam cih tawiz reung dengz rak Phraz Pen Caoh. An lo lu kaw pehz bawnz lu, an lo cih ihz nahz kaw pehz bawnz cih phrengz phrengz.
43 Pharise keui aez, pehz bawnz an nam rak! Pehz dawhz ti keu dez trawng dutz tuhz crawp, sunz aez ihz tak nap suamz daehz tawiz teur laas.
44 Keuiz daz pehz bawnz an nam rak! Pehz naeh ceun peun lu ihz keui nuar boh lang kol hnhz kaw nam mas tuhz keutz naeh peun lu.”
45 Ihz mawz kyaamz hawkz daz Yesuhz nahz, “Tahz, beuk naeh ceun diz, Mih daz tang ehz eu.”
46 Yesuhz kaw daz, “Ihz mawz kyaamz keui aez, pehz bawnz an nam rak! Kawp daz pehz cao ihz baekz an kreuk keui, pehz nam leh tang kuanz tihz daehz teu lam lawh.
47 Ihz an nam rak keui, pehz cih peun lu ihz taangz phraz, an ihz keu daehz keu daepz pehz piamz.
48 Pehz penz phawmz ihz keu daehz keu daepz daehz, keuh tahz piamz, pehz tahz cih peun lu.
49 Kawp ceun diz pinya Phraz Pen Caoh lao mok, ‘Ohz phuhz ihz taangz Ohz boh teu maan a keuh, keuiz daz teur ka keuh piamz, teur ka keuh pae suamz.’
50 Kawp ceun diz keuh te talz taam daehz piamz ihz taangz phraz thaz meuz seun teungz tae prih keu tehz,
51 kaanz ihz piamz Abel taw ihz piamz Sekhariah teun khinz khrengz tucz boh ti seu ngamz.
52 Ihz mawz kyaamz keui aez, pehz bawnz an nam rak! Pehz tawnz mok sawz keur wah pinya rae pehz kaw nam kut, ihz ngaz kut kaw pehz kan.”