Bawnz an rak
5
Meuz Yesuhz awlz wungz ihz ne, Hnhz raw lang rang keu dez a diz. Teu paez Hnhz kaw truz cu Hnhz. 2 Hnhz seun teungz sawnz aez ihz daz, 3 “Ihz peuk daelz phawmz daehz keui bawnz an rak, kawp daz prih kaang raaoz naeh prih keuh. 4 Ihz phawmz kyehz keui bawnz an rak, kawp daz keuh ngaz sa phawmz. 5 Ihz phawmz keu ceum keui bawnz an rak, kawp daz keuh ngaz bawnz caam prih keu tehz. 6 Ihz coh nguat reung dengz keu sangz keui bawnz an rak, kawp daz keuh ngaz phre phawmz. 7 Ihz mawz teur yawng keui bawnz an rak, kawp daz keuh ngaz bawnz khaam reung dengz teur yawng. 8 Ihz phawmz keun ra keui bawnz an rak kawp daz keuh ngaz awlz Phraz Pen Caoh. 9 Ihz cih aez ihz teur maen daehz keui bawnz an rak, kawp daz ihz ngaz raak keuh naeh kuanz Phraz Pen Caoh. 10 Ihz talz ihz pae suamz daehz kawp reung dengz keu sangz keui bawnz an rak, kawp daz prih kaang raaoz naeh prih keuh.11 Meuz ihz plawng pehz, pae suamz pehz, boh daz khatz pehz an nam anz thanz paw keunyz kawp Ohz ne bawnz an rak. 12 Seuz phawmz lah. Kawp daz a keoz pehz mawh baaiz lang kaang raaoz, ihz taangz phraz an truz aacz pehz kaw a wa talz ceun diz.”
Suakz boh an thaangz
13 “Pehz naeh suakz prih keu tehz. Keuiz daz beuk nam taap leui kaw ngaz cih seu naez aez hnhz taap mial? An ni nam kut naehz leui, wiurz thengz thaz nawk rae aez ihz paenz thengz pan.
14 Pehz naeh an thaangz prih keu tehz. Weng an naeh lang rang ne nam caang seun tapz. 15 Beuk a wa kleoz ngal ngawiz kaw yaeh nam leh piat dupz. Mok kaai khrengz ngal rae cih aez ihz kaang keui awlz. 16 Naeh ceun khuz an diz aez a kyaangz rak pehz thaangz aacz ngaai ihz aez ihz keui awlz rae lupz phrawz Paz pehz an naeh lang kaang raaoz.”
Sawnz aez lawng sinz traz
17 “Yak thaang Ohz truz ya thengz kyaamz sinz Moses boh kyaamz ihz taangz phraz keui hacz aamz. Ohz nam truz ya, Ohz truz cih aez kyaamz keu diz keunyz. 18 Ohz daz mawn pehz nahz, thonz taw kaang raaoz boh keu tehz bilz lan ne mah lik seu toz seu cakz an kyehz lak ihz tuhz sinz traz maat keunyz ne nam bilz keuiz. 19 Ihz nam cih tawiz sinz an kyehz rae sawnz aez ihz nam aez cih tawiz sinz ne ngaz naeh ihz kyehz lang prih kaang raaoz, keuiz daz ihz cih tawiz sinz an diz rae sawnz aez ihz nahz ne penz an mawh lang prih kaang raaoz. 20 Ohz lao pehz nahz, beuk pehz nam kyaangz leuz ihz mawz kyaamz boh Pharise kaw ngaz nam bawnz kut tuhz prih kaang raaoz.”
Lawng piamz ihz
21 “Pehz a wa ngarz sinz ihz meuz neungz daz, ‘Yak piamz ihz. Beuk piamz kaw ngaz talz taam.’ 22 Keuiz daz Ohz lao pehz nahz, ihz ca kuanz mai daehz nahz keuiz kaw bawnz talz taam. Ihz an daz kuanz mai daehz nahz, ‘Mih naeh ihz thengz maat,’ ne ihz an diz taan bawnz raw rumz, ihz an daz kuanz mai daehz nahz, ‘Mih naeh ihz kleuhz klahz,’ kaw ihz an diz taan talz taam ngal tuhz ngal raai. 23 Kawp ceun diz meuz daehz ngaz taangz kreung lu tawz khrengz pukz caw ne beuk mih tang an mih cih pleung mok kaai kuanz mai daehz kaw, 24 mok thengz kreung lu daehz aacz ngaai khrengz pukz caw rae cih aacz aez daehz teur maen. Beuk a wa caang kai truz pukz caw raez.
25 Meuz mih yeung naeh kawmz ihz cih a muz sapz mih tawiz reung dengz lan rumz ne cih raamz rip aez maen hnhz. Beuk nam cih ceun diz hnhz ngaz leh mih aapz a ihz mawh tatz traz, ihz mawh tatz traz samz aapz tuhz tihz siukz pao khawk rae mih ngaz talz klaez khawk. 26 Ohz daz mawn pehz nahz, ka ni maat phre hacz ne pehz nam caang lae thaz khawk.”
Kamesuhz
27 “Pehz a wa ngarz sinz ihz meuz neungz daz, ‘Yak kawi kamesuhz.’ 28 Keuiz daz Ohz daz pehz nahz, ihz yawt keun nyah tawiz lomz teu na ne tuhz phawmz hnhz a wa pleung kamesuhz tawiz keun nyah an diz. 29 Beuk ngaai takz kaaiz mih cih aez mih pleung kaw klawkz thengz. Nam maang ngaai seu plaakz ne rak lak luh sumz tang toz tuhz ngal raai. 30 Beuk tihz takz kaaiz mih cih aez mih pleung kaw tatz thengz. Nam maang tihz seu plaakz ne rak lak luh sumz tang toz tuhz ngal raai.”
Lawng tahz yah teur thengz
31 “Kyaamz sinz daz thaengz, ‘Ihz sunz thengz yah ne taemz aez hnhz nahz lik thengz.’ 32 Keuiz daz Ohz lao pehz nahz, neuz lak keun nyah yaetz keulz ihz rae ihz an thengz yah daehz ne cih pleung kamesuhz kaai yah daehz. Ihz leh yah raat kaw cih pleung kamesuhz.”
Teung kaao
33 “Samz thaengz, pehz a wa ngarz sinz an lao mok ihz meuz neungz keui daz, ‘Yak cih teuk luh an daehz teung kaao, lo pao mony reu ma an daehz teung tawz Phraz Cen Cen.’ 34 Keuiz daz Ohz lao pehz nahz, yak teung laz laz. Yak teung kaang raaoz, kawp daz kaang raaoz naeh plaang Phraz Pen Caoh. 35 Yak teung keu tehz, kawp daz keu tehz naeh ti tam cawng Phraz Pen Caoh. Yak teung weng Yerusalem, kawp daz weng an diz naeh weng Khunz an bunz mawh. 36 Yak teung kingz daehz, kawp daz hukz kingz pehz seu senz keuiz kaw pehz nam caang cih aez traz aez lang. 37 Pehz lo lao anz kaw anz, nam kaw nam. Neuz lak mony reu ma keu diz naeh an truz thaz khunz an nam rak.”
Yak tawpz tihz ihz
38 “Pehz a wa ngarz sinz daz, ‘Ngaai taw ngaai, raangz taw raangz.’ 39 Keuiz daz Ohz lao pehz nahz, yak tawpz mial ihz cih pleung daehz. Beuk maang ihz paapz mawk pehz plaakz takz kaaiz kaw aez hnhz paapz thaengz plaakz takz dahz raez. 40 Beuk ihz mawr leh seu kaeng mah pehz kaw aez thaengz tang cung cui daehz raez. 41 Beuk ihz peun pae pehz lan reung dengz seu lakz kaw lan tawiz hnhz aarz lakz lah. 42 Aez tawz ihz maanyz pehz raez, aez ihz rawm an maanyz rawm tawz pehz raez.”
Rak raan su
43 “Pehz a wa ngarz sinz traz daz, ‘Rak bohz daehz, ceuh raan su daehz.’ 44 Keuiz daz Ohz lao pehz, rak raan su daehz raez, suz tawngz aez ihz an pae suamz daehz raez, 45 beuk cih ceun diz pehz ngaz penz kuanz Paz pehz an naeh lang kaang raaoz. Kawp daz Hnhz cih aez seu ngihz ne thang kaai ihz raai boh ihz rak, cih aez cung klaez kaai ihz cih an rak boh ihz cih an raai. 46 Beuk pehz rak ihz an rak daehz pan kaw bawnz a keoz naehz tawz Phraz Pen Caoh? Ihz seutz khawn keuiz kaw yeung cih boh teur diz nam anz haz? 47 Beuk pehz tak kuanz mai daehz pan kaw pehz maat cih rak leuz ihz. Ihz nam yum Phraz Pen Caoh keuiz kaw yeung cih boh teur diz nam anz haz? 48 Kawp ceun diz pehz lo keunyz rak ceun Paz pehz lang kaang raaoz keunyz rak.”