Yesuhz talz an kyaam ya
4
Waaiz an diz Khuanz Phraz aacz lan Yesuhz tuhz ruk aez Manaat kyaam ya Hnhz. 2 Waaiz Hnhz kaerz seum suamz ponz kawlz seu ngihz ponz kawlz borz ne Hnhz coh. 3 Tahz an kyaam ya ne truz lao Hnhz daz, “Beuk Mih naeh Kuanz Phraz Pen Caoh kaw, lao kawnz reu aangz keu ni aez penz kaaiz mun raez.”4 Yesuhz kaw tawpz daz, “Taemz mok tuhz kyaamz lik daz, ‘Ihz ehz leh taw seum suamz damz phawmz nam anz, leh mony reu ma an truz thaz mony Phraz ne damz.’”
5 Manaat kaw leh Hnhz lan a weng seu ngamz rae mok Hnhz kaai cawkz cacz wat ne 6 daz Hnhz nahz, “Beuk Mih naeh Kuanz Phraz Pen Caoh kaw plawiz teuk klaez toz Mih raez. Taemz mok tuhz kyaamz lik daz, ‘Phraz Pen Caoh ngaz cao teu maan kaang raaoz Daehz keui yawt Mih, keuh ngaz pumz leh Mih, yak aez cawng Mih teu reu aangz.’”
7 Yesuhz kaw tawpz daz, “Tuhz kyaamz lik daz thaengz, ‘Yak kyaam ya Phraz Cen Cen Phraz Pen Caoh daehz.’” 8 Manaat kaw leh Hnhz raw thaengz rang trawng baaiz, plaez Hnhz nahz prih keu tehz hacz aamz boh bunz ciz cim an mawh an naeh tuhz an diz keui. 9 Manaat daz, “Beuk Mih seuk deumz waiz ohz kaw ohz ngaz aez Mih nahz an keu ni hacz aamz.”
10 Yesuhz lao hnhz, “Tiunz yaan yaan raez Satan! Taemz mok tuhz kyaamz lik daz, ‘Seuk deumz waiz Phraz Cen Cen Phraz Pen Caoh daehz, waiz Hnhz pan.’” 11 Manaat kaw praasz Hnhz, teu maan kaang raaoz keui truz lum la Hnhz.
Yesuhz seun teungz rawz
12 Meuz Yesuhz ngarz Yohn klaez khawk ne Hnhz truz cu mial prih Kalile, 13 praasz weng Nasaret, lan moh tuhz weng Kapernaum, weng an diz naeh waar nawngz Kalile, naeh tuhz eungz Sebulun boh eungz Naptali, 14 aez keunyz mony reu ma ihz taangz phraz Isaiah daz, 15 “Tawiz eungz Sebulun boh eungz Naptali, tawiz waar nawngz, thaz tui omz Yordan, tuhz prih Kalile tawz ti ihz an nam anz kheuz Yio keui moh, 16 ihz moh tuhz an bimz keui a wa awlz an thaangz aasz baaiz rae an thaangz ne a wa thaangz kaai ihz moh tuhz eupz reung dengz yam keui.”
17 Tae leh kaanz diz Yesuhz seun teungz rawz daz, “Teur aacz daehz caanz reung dengz kawi raez, kraao prih kaang raaoz a wa thatz tae.”
Seun teungz penz teu paez Yesuhz
18 Meuz Yesuhz nuar boh waar nawngz Kalile ne awlz Simon, an ihz raak Petros boh seum bohz hnhz Andre. Kaar yeung rup boh kahz tuhz nawngz kawp daz kaar naeh tahz kahz. 19 Yesuhz lao kaar, “Lan tawiz Ohz raez, Ohz ngaz cih paarz naeh tahz kahz khahz ihz.” 20 Kaar kaw mok thengz luat rup daehz kaw lan tawiz Hnhz.
21 Moh a diz lan thaengz samz awlz kuanz mai keu aarz Yakop kaar Yohn an naeh kuanz Sebede. Kaar naeh teur kawmz tang paz daehz yeung meu rae boh rup daehz tuhz ceun luang. Yesuhz raak kaar, 22 kaar kaw mok thengz luat paz daehz boh ceun luang daehz rae lan tawiz Hnhz.
Yesuhz seuk neum ihz penz
23 Yesuhz lan tawiz prih Kalile, sawnz aez ihz nahz tawiz crawp, rawz reu oiz rak lawng prih Phraz boh cih aez ihz penz klawhz meoz keui moh rak. 24 Reu oiz Hnhz kaw sirz lan tuhz prih Siria rae ihz keui leh truz ihz penz klawhz meoz, ihz suhz ihz rit, ihz phiz kut, ihz penz ngaanz, ihz yam seu plaakz keui cu Hnhz rae Hnhz cih aez keuh moh rak. 25 Wungz ihz tuhz prih Kalile, ihz prih Dekapolis, ihz weng Yerusalem, ihz prih Yio boh ihz thaz tui omz Yordan keui lan tawiz Hnhz.