Yesuhz raak leh teu paez Daehz
5
Naeh seu seu ngihz Yesuhz ceng boh waar nawngz Kennesaret, wungz ihz keui teur aacz daehz prawk cu Hnhz aez daehz bawnz ngarz mony reu ma Phraz Pen Caoh.
2 Hnhz awlz ceun luang aarz lamz deukz boh a waar, tahz kahz keui cur thaz ceun luang, haaoz boh rup daehz.
3 Yesuhz kut tuhz ceun luang seu lamz an naeh ceun luang Simon, maanyz aez ceun luang hnhz mok yaan waar teur nyaenz. Yesuhz kaw keu dez kaai ceun luang sawnz aez wungz ihz.
4 Meuz Hnhz a wa sawnz aez ne Hnhz lao Simon, “Lan ti omz truh, rup teuk klaez rup pehz keui rae aez trupz bawnz kahz.”
5 Simon mial daz, “Tahz, ehz khatz phawmz rup kahz sawmz raang kaw nam bawnz hawkz hawkz. Keuiz daz beuk Mih daz ceun diz kaw ngaz rup boh.”
6 Meuz keuh cih tawiz ne, keuh rup talz kahz heungz baaiz rup keuh paw ngaz teutz.
7 Keuh keul waacz tihz aez ihz an naeh kaai ceun luang taang lamz truz kawr daehz. Ihz keu diz kaw truz leh kawr, kahz neuk ceun luang tang aarz lamz paw ngaz beukz.
8 Meuz Simon Petros awlz lawng an diz ne, seuk deumz kingz sangz aacz ngaai Yesuhz daz, “Oz Tahz, praasz yaan yaan ohz raez, kawp reung dengz kawi ohz heungz baaiz.”
9 Petros boh ihz an naeh kawmz hnhz hacz aamz keui sangz baaiz kaai an bawnz kahz heungz.
10 Kuanz bohz hnhz Yakop kaar Yohn an naeh kuanz Sebede kaw sangz. Yesuhz daz Simon nahz, “Yak doz, seu ni lan mih ngaz naeh tahz kahz khahz ihz.”
11 Keuh mok ceun luang a waar, thengz hacz aamz kaw lan tawiz Yesuhz.
Yesuhz seuk neum ihz tut
12 Meuz Yesuhz naeh tuhz weng seu ti ne maang ihz hawkz tut tang toz, meuz hnhz awlz Yesuhz ne kupz maanyz daz, “Tahz, beuk Mih sunz kaw cih aez ohz rak.”
13 Yesuhz kaw teuk yawr tihz Daehz rae teu hnhz daz, “Ohz sunz boh, aez mih rak.” Meuz diz luat tut hnhz kaw a wa rak.
14 Yesuhz lao hnhz, “Yak lao yaeh nahz lawng an ni. Keuiz daz lan cu saangz longz plaez toz mih. Pukz caw kreung lu ceun Moses seumz mok, aez naeh saak se aacz ngaai ihz, ta mih a wa seu ngamz.”
15 Keuiz daz reu oiz Yesuhz baaiz yeung lae, wungz ihz keui truz cu Hnhz, aez daehz bawnz teuk ngarz traz boh an penz keui aez moh rak.
16 Keuiz daz Hnhz lae lan tuhz ruk rae suz tawngz ceun Hnhz kai cih.
Yesuhz seuk neum ihz yam seu plaakz
17 Naeh seu seu ngihz, Yesuhz yeung sawnz boh ne Pharise boh ihz mawz kyaamz teur ka, an truz thaz tawiz weng prih Kalile tang prih Yio boh weng Yerusalem keui keu dez boh a diz. Taanz khoz Phraz Cen Cen caang cih aez ihz moh rak ne naeh kaai Hnhz.
18 Ihz teur ka leh truz ihz yam seu plaakz yaetz boh kaai saatz. Keuh kyaam kut tuhz kaang, leh hnhz lan tam aacz ngaai Yesuhz.
19 Keuiz daz wungz ihz heungz baaiz rae nam caang. Kawp ceun diz keuh raw lang kusz kaang, klawkz seum teuk eupz teur ka, plawiz cur ihz penz tang saatz peur lah wungz ihz, aacz ngaai Yesuhz.
20 Meuz Yesuhz awlz reung dengz yum keuh ne daz ihz penz nahz, “Raen aez, Ohz a wa plawiz lawt reung dengz kawi mih.”
21 Pharise boh sra mawz kyaamz keui daz tuhz phawmz daehz, “Hnhz an ni upz pleung Phraz Pen Caoh, naeh Phraz Pen Caoh pan plawiz lawt bawnz reung dengz kawi.”
22 Yesuhz mas keuh thaang ceun diz rae maanyz keuh nahz, “Cih naehz tuhz phawmz pehz thaang ceun diz a?
23 An nae lao yoh? ‘A wa plawiz lawt reung dengz kawi mih,’ ne yoh haz? ‘Ceng nuar lan raez’, ne yoh haz?
24 Aez pehz mas Kuanz Kingz Ihz maang a na tuhz prih keu tehz plawiz lawt bawnz reung dengz kawi,” rae Hnhz lao ihz yam seu plaakz nahz, “Rawi raez, leh ti yaetz mih, weng kaang daehz.”
25 Meuz diz luat ihz an diz kaw rawi aacz ngaai ihz, leh ti yaetz daehz weng, lupz phrawz Phraz Pen Caoh.
26 Ihz keui sangz klawhz ihz rae lupz phrawz Phraz Pen Caoh daz, “Meu ni ehz a wa awlz an rak seum sangz.”
Yesuhz raak Lewi
27 Waaiz an diz Yesuhz lae truz, Hnhz kaw awlz ihz seutz khawn hawkz, mus hnhz daz Lewi, keu dez boh siungz seutz khawn rae Yesuhz daz hnhz nahz, “Lan tawiz Ohz raez.”
28 Lewi thengz hacz aamz rae ceng lan tawiz Hnhz.
29 Lewi kaw raenz pawiz an keur a kaang daehz, a diz maang tang wungz ihz seutz khawn boh ihz aarz diz keui keu dez kawmz keuh a pheunz.
30 Pharise teur ka boh sra mawz kyaamz keui nae teu paez Yesuhz, “Cih naehz pehz suamz kawmz ihz seutz khawn boh ihz raai keui a?”
31 Yesuhz daz mial keuh nahz, “Ihz moh rak keui nam lo tahz seu neumz, ihz penz keui pan lo a.
32 Ohz truz ta raak leh ihz keu sangz nam anz, keuiz daz naeh ta ihz maang reung dengz kawi keui aez caanz daehz eunz.”
Kaerz seum suamz
33 Ihz teur ka maanyz Yesuhz daz, “Teu paez Yohn tahz teuk sruz keui kaerz seum suamz boh suz tawngz, teu paez Pharise keui kaw cih ceun diz, cih naehz teu paez Mih keui yeung suamz yeung tiangz a?”
34 Yesuhz daz keuh nahz, “Meuz tahz seu naaoz yeung naeh kawmz boh khaekz daehz tuhz pawiz kopz ku ne anz keuh kaerz seum suamz?
35 Kraao leh tahz seu naaoz praasz lan keuh ne ngaz naeh truz boh, meuz diz keuh ngaz kaerz seum suamz.”
36 Yesuhz leh mony pung taek lao keuh nahz, “Yaeh nam siarz leh banz kaai kreung teun mehz teuk baangz kreung trimz, beuk cih ceun diz teuk luh kreung teun mehz, banz teun mehz kaw nam kiungz kreung trimz.
37 Yaeh nam leh omz seu pit teun mehz sapz tuhz seu kiz hurz trimz. Beuk cih ceun diz, omz seu pit ne ngaz teuk plakz seu kiz, omz kaw lae rae seu kiz hurz kaw ngaz luh.
38 Omz seu pit teun mehz kaw sapz tuhz seu kiz teun mehz leun.
39 Ihz tiangz omz seu pit trimz ne nam song omz seu pit teun mehz. Kawp keuh daz, ‘An trimz baaiz rak.’”