Lawng tahz yah teur thengz
19
Meuz Yesuhz a wa lao keu diz ne moh prih Kalile lan thaz tui omz Yordan tuhz prih Yio. 2 Wungz ihz heungz keui lan tawiz Hnhz rae a diz Hnhz cih aez keuh moh rak.3 Pharise teur ka sunz caam yawt Hnhz rae truz maanyz Hnhz, “Kawp naehz se nam daz ihz ehz thengz yah daehz ne anz tawiz traz?” 4 Hnhz mial daz, “Meuz seun teungz Phraz Pen Caoh phaan cih keur meh boh keun nyah ne pehz nam ti rawz haz? 5 Phraz Pen Caoh daz, ‘kawp ceun diz keur meh praasz mah paz, moh kawmz yah, kaar keu ni naeh hawkz kawmz.’ 6 Kaar nam anz keu aarz leui, naeh hawkz pan. An Phraz Pen Caoh kopz ku ne yak aez ihz teuk praasz.”
7 Pharise keui maanyz Hnhz, “Kawp naehz Moses seumz mok daz aez lik thengz rae thengz yah daehz hoh?”
8 Yesuhz mial daz, “Kawp pehz tiu rae Moses khwaangz mok pehz caang thengz yah daehz. Keuiz daz meuz seun teungz ne nam naeh ceun diz. 9 Ohz lao pehz nahz, neuz lak yah daehz cih pleung kamesuhz rae thengz yah daehz, leh thaengz hawkz ne cih pleung kamesuhz.”
10 Teu paez keui daz Hnhz nahz, “Beuk naeh ceun diz lawng tahz lawng yah ne nam teur leh baaiz rak long.” 11 Yesuhz mial daz, “Mony reu ma an ni nam tawiz bawnz klawhz ihz, ihz an Phraz Pen Caoh khriungz aez keui pan tawiz bawnz. 12 Kawp daz teur ka keut pa nam krang tae na kaang. Teur ka kawp ihz tawngz keuh rae nam krang tae na kaang. Teur ka kawp prih kaang raaoz rae nam tae na kaang. Ihz caang tawiz mony reu ma an ni keui aez keuh tawiz.”
Yesuhz aez reung dengz rak kuanz ihz
13 Ihz teur ka leh kuanz ihz truz cu Yesuhz, aez tihz Hnhz taangz kaai keuh rae aez suz tawngz aez. Keuiz daz teu paez keui nae keuh. 14 Yesuhz daz, “Aez kuanz ihz keui truz cu Ohz raez, yak kan keuh kawp daz prih kaang raaoz ne naeh prih ceun keuh.”
15 Yesuhz leh tihz taangz kaai kuanz ihz rae aez reung dengz rak, beuk a wa kaw Hnhz praasz lan thaz a diz.
Ihz plung maang
16 Naeh seu laehz maang ihz hawkz truz cu Yesuhz daz, “Tahz sra, aez ohz bawnz phawmz cen cen ne ohz bawnz cih rak naehz?”
17 Yesuhz mial daz, “Cih naehz maanyz Ohz lawng an rak a? Tahz an rak ne naeh taw hawkz pan. Beuk mih sunz kut ti phawmz imz cen cen kaw cih tawiz sinz raez.”
18 Ihz an diz mial maanyz, “Sinz keu nae hoh?”
Yesuhz kaw mial daz, “Yak piamz ihz, yak kawi kamesuhz, yak rah, yak khaam saak se an nam anz. 19 Ro se mah paz daehz, rak ihz rim daehz ceun mih rak toz daehz.”
20 Ihz plung an diz daz, “Ohz a wa cih tawiz sinz keu ni hacz aamz, lo thaengz naehz boh?”
21 Yesuhz mial daz, “Beuk mih sunz keunyz rak kaw lan saz phrihz phrahz daehz aez ihz phaanz keui nahz, mih ngaz bawnz phan ta lang kaang raaoz tui. Beuk a wa kaw truz tawiz puatz Ohz.”
22 Meuz ihz plung an diz ngarz ceun diz ne phawmz kyehz lan kawp daz hnhz naeh ihz maang mawn.
23 Yesuhz lao teu paez daehz keui nahz, “Ohz daz mawn pehz nahz, ihz maang keui kut kreuk baaiz tuhz prih kaang raaoz. 24 Ohz lao thaengz pehz nahz, meu rang maang soz plocz kut tuhz bawngz peun lac ne yoh lak ihz maang kut tuhz prih Phraz Pen Caoh.”
25 Meuz teu paez keui ngarz an diz ne sangz mawn rae maanyz, “Yaeh ngaz bawnz reung dengz khyawt hoh?”
26 Yesuhz yawt keuh rae daz, “An ni ihz cih nam penz bawnz kaw Phraz Pen Caoh cih penz bawnz klawhz meoz.”
27 Petros lao Hnhz daz, “Ehz cunz hacz aamz rae lan tawiz Mih, ehz samz ngaz bawnz naehz?”
28 Yesuhz lao keuh, “Ohz daz mawn pehz nahz, kraao meu rae teun mehz hacz aamz tui Kuanz Kingz Ihz keu dez kaai plaang bunz Daehz ne pehz an tawiz Ohz seu kawlz aarz keui bawnz keu dez kaai plaang daehz seu kawlz aarz rae ngaz bawnz tatz traz kaai kheuz Israel seu kawlz aarz. 29 Ihz thengz kaang, kuanz mai, mah paz, kuanz ihz boh sraakz maar kawp mus Ohz ne bawnz a keoz seu peur ya pun boh phawmz cen cen. 30 Keuiz daz ihz tan aacz keui ngaz klaez thaz puatz, ihz klaez thaz puatz keui ngaz tan aacz.”