Yaeh mawh myaat lak ihz lang prih kaang raaoz?
18
Meuz ceun diz teu paez keui truz cu Yesuhz rae maanyz, “Naeh yaeh mawh myaat lak ihz lang prih kaang raaoz a?”2 Hnhz raak leh kuanz ihz hawkz rae aez ceng teun khinz keuh. 3 Hnhz daz keuh nahz, “Ohz daz mawn pehz nahz, beuk pehz nam plut phawmz aez naeh ceun kuanz ihz kyehz kaw ngaz nam bawnz kut prih kaang raaoz. 4 Kawp ceun diz ihz peuk daelz phawmz ceun kuanz ihz an ni ne naeh an mawh lak ihz lang prih kaang raaoz. 5 Ihz saanyz rap ihz ceun kuanz ihz an ni kawp Ohz ne saanyz rap Ohz.
Cih aez kuanz ihz pleung
6 Keuiz daz beuk maang ihz teuk pleung kuanz ihz an yum Ohz ne kaai ihz an teuk pleung an diz leh reu aangz teur leui mawh hawiz kokz hnhz rae teuk kitz tuhz omz paang laai truh tui baaiz rak. 7 Prih keu tehz ne naeh an nam rak kawp maang an teuk pleung ihz. An teuk pleung keui ngaz naeh. Keuiz daz kaai ihz cih teuk pleung ne bawnz an nam rak.
8 Beuk tihz cawng mih cih aez daehz pleung kaw tatz wiurz thengz. An tihz cawng nam keunyz rae bawnz kut ti phawmz imz cen cen ne rak lak maang tihz cawng keunyz rae klaez tuhz ngal raai cen cen. 9 Beuk ngaai mih cih aez daehz pleung kaw klawkz thengz. An ngaai nam keunyz rae bawnz kut ti phawmz imz cen cen ne rak lak maang ngaai keunyz rae klaez tuhz ngal raai cen cen.”
Pung taek soz an bilz
10 “Seu tih yak cih an nam saangz suamz kaai kuanz ihz keu ni. Kawp daz teu maan kaang raaoz keuh bawnz awlz se se ngaai Paz Ohz lang kaang raaoz. 11 Kawp daz Kuanz Kingz Ihz truz khyawt ihz an bilz.
12 Beuk ihz hawkz maang soz seu peur ya, samz bilz hawkz, hnhz ngaz cih seu naez? Hnhz ngaz nam mok thengz timz kawlz timz kaai rang rae ngaz nam lan khahz an bilz haz? 13 Ohz daz mawn pehz nahz, meuz hnhz a wa awlz ne seuz phawmz kaai toz an bilz leuz lak kaai timz kawlz timz an nam bilz. 14 Naeh ceun diz laai, Paz pehz an naeh lang kaang raaoz nam sunz aez kuanz ihz kyehz luh hawkz hawkz.”
Cih aez tawz reung dengz kaai ihz cih pleung
15 “Beuk kuanz mai mih cih khatz pleung mih kaw lan lao an hnhz pleung, aez naeh mih boh hnhz pan. Beuk hnhz teuk ngarz mih kaw mih a wa bawnz mial kuanz mai daehz. 16 Beuk nam teuk ngarz mih kaw aez maang saak se ne nap lan ihz keu aarz, keu waiz tawiz mih raez. 17 Beuk hnhz nam leh mony reu ma keuh kaw lao cumz caoh raez. Beuk hnhz nam teuk ngarz cumz caoh kaw mok ceun ihz nam yum phraz nam anz kaw mok ceun ihz seutz khawn.”
An mat boh an plawiz
18 “Ohz daz mawn pehz nahz, an pehz mat tuhz prih keu tehz ne mat boh lang kaang raaoz, an pehz plawiz tuhz prih keu tehz ne plawiz boh lang kaang raaoz.
19 Samz, Ohz daz mawn pehz nahz, beuk ihz keu aarz tuhz prih keu tehz prawm rae suz tawngz naehz kaw Paz Ohz an naeh lang kaang raaoz kaw ngaz aez. 20 Kawp daz ihz keu aarz nam anz kaw ihz keu waiz teur cuhz kaai mus Ohz ne Ohz naeh kawmz keuh a diz.”
Pung taek kuanz leng nam plawiz lawt
21 Petros truz cu Yesuhz rae maanyz, “Tahz, beuk kuanz mai daehz cih kawi daehz ne bawnz plawiz lawt aez hnhz seu naeh laehz? Pulz laehz haz?”
22 Yesuhz mial daz, “Ohz lao mih, nam anz pulz laehz, pulz ta pulz kawlz laehz. 23 Kawp ceun diz prih kaang raaoz daz ne naeh ceun khunz nap craangz ni, kaai kuanz leng daehz. 24 Meuz seun teungz hnhz cao raak kuanz leng khamz ni daehz kingz laanz. 25 Keuiz daz hnhz nam maang seum phrawz rae tahz paz leng cao hnhz saz toz daehz, saz tang kuanz yah daehz boh saz phrihz phrahz daehz hacz aamz keui rae phrawz. 26 Kuanz leng an diz seuk deumz kingz sangz rae daz, ‘Nyeun aez ohz lah tahz, ni ka maang ohz phrawz aez boh.’ 27 Tahz paz leng hnhz teur yawng hnhz rae nam aez phrawz leui teungz mah hacz aamz.
28 Keuiz daz meuz kuanz leng an diz lae lan ne awlz bohz daehz kuanz leng teur deuiz an khamz daehz paekz seu cawi ne piatz kokz hnhz rae daz hnhz nahz, ‘Phrawz ni ohz raez.’ 29 Bohz hnhz kaw seuk deumz kingz sangz rae tawngz paan hnhz nahz, ‘Nyeun aez ohz lah, ohz phrawz boh.’ 30 Keuiz daz kuanz leng an diz nam teuk ngarz, leh bohz daehz sapz tuhz khawk thonz taw phrawz ni daehz. 31 Meuz kuanz leng aarz diz ngarz ne phawmz nam rak rae lan lao plaez tahz paz leng daehz nahz lawng an diz hacz aamz. 32 Tahz paz leng an diz kaw cao ihz raak kuanz leng raai an diz rae daz, ‘Mih meukz, meuz mih maanyz ohz ne ohz a wa teungz mah ni mih hacz aamz. 33 Ceun ohz teur yawng mih ne mih lo teur yawng kuanz leng teur deuiz nam anz haz?’ 34 Tahz paz leng sunz ca baaiz rae cao sapz tuhz khawk aez taam thonz taw phrawz ni daehz hacz aamz.
35 Beuk pehz kuanz mai teur deuiz nam leh phawmz hacz aamz plawiz lawt ne Paz Ohz kaang raaoz kaw ngaz nam plawiz lawt pehz.”