Pung taek ihz suamz caangz
20
“Prih kaang raaoz ne naeh ceun ni. Maang tahz sraakz seu pit hawkz lan khahz ihz suamz caangz teuk ngup cao cao aez cih sraakz daehz. 2 Hnhz prawm aez ihz suamz caangz keui nahz teur seu ngihz paekz ron teur pyaz rae cao keuh lan cih sraakz seu pit daehz. 3 Meuz kraao timz na ri ne hnhz awlz ihz laap nam cih kaanz naehz ceng boh tuhz teur laas. 4 Hnhz lao keuh, ‘Pehz lan cih sraakz ohz raez, ohz ngaz aez langz seu taan ne.’ 5 Keuh kaw lan. Meuz seu ngihz keun cang boh teuk borz waiz na ri kaw hnhz lae lan khahz raak thaengz ceun diz. 6 Meuz kraao hanz na ri ne hnhz lae lan awlz thaengz ihz ceng boh aarz diz rae hnhz maanyz keuh, ‘Cih naehz nam cih kaanz rae ceng boh a niz keutz seu ngihz a?’ 7 Keuh kaw daz, ‘Nam maang ihz caangz ehz.’ Hnhz daz keuh nahz, ‘Lan cih kaanz tuhz sraakz seu pit ohz raez.’8 Meuz teuk borz ne tahz sraakz lao ihz tawnz craangz daehz nahz, ‘Raak ihz suamz caangz, aez keuh nahz langz, tae leh ihz truz thaz puatz taw ihz truz aacz.’ 9 Ihz an truz thaz puatz keui bawnz cih taw seu na ri pan kaw bawnz langz paekz ron ihz teur pyaz. 10 Ihz an truz aacz keui samz thaang daehz ngaz bawnz leuz. Keuiz daz keuh kaw bawnz paekz ron ihz teur pyaz leun. 11 Meuz keuh a wa bawnz langz ne nae tahz sraakz nahz, 12 ‘Keuh keu ni truz cih taw seu na ri pan, ehz samz bawnz cih naarz kawcz keutz seu ngihz langz samz bawnz teuk rengz.’ 13 Keuiz daz tahz sraakz daz hawkz an naeh tuhz keuh ne nahz, ‘Raen, ohz cih nam phrengz nam anz long, nam anz mih prawm ohz paekz ron seu pyaz rae? 14 Leh langz daehz lan raez. Ohz sunz aez ihz truz thaz puatz nahz teuk rengz mih. 15 Anz ohz nam caang cih paekz daehz ceun daehz sunz? Kawp ohz phawmz rak rae mih nam traz ohz nahz haz?’”
16 Yesuhz kaw daz keuh nahz, “Naeh ceun diz ihz klaez thaz puatz keui ngaz tan aacz, ihz tan aacz keui ngaz klaez thaz puatz.”
Yesuhz lao lawng Daehz yam kaai waiz laehz
17 Meuz Yesuhz lan weng Yerusalem tawiz reung dengz ne Hnhz raak leh teu paez Daehz taw seu kawlz aarz rae daz, 18 “Teuk ngarz raez, ehz lan weng Yerusalem, Kuanz Kingz Ihz ne talz ihz aapz Daehz kaai tihz beunz caangz boh ihz mawz kyaamz. Keuh ngaz taap taam yam. 19 Keuh ngaz aapz Hnhz tuhz tihz ihz nam anz kheuz Yio, keuh ngaz saehz Hnhz, rotz Hnhz, tawkz piamz Hnhz kaai lakz klawngz klaengz. Keuiz daz moh waiz seu ngihz meu rae imz boh.”
Mony maanyz mah keuh Yakop boh Yohn
20 Meuz diz yah Sebede tang kuanz keur meh keu aarz ne truz cu Yesuhz rae seuk deumz maanyz aez daehz bawnz seu meoz meoz.
21 Yesuhz daz, “Pehz sunz maanyz naehz?” Keun nyah an diz kaw daz, “Aez kuanz ohz kaar ni bawnz keu dez takz kaaiz Mih hawkz, takz dahz Mih hawkz, tuhz prih Mih.”
22 Yesuhz daz keuh nahz, “Pehz nam mas tang daehz maanyz naehz lawh, anz paarz tiangz bawnz an Ohz ngaz tiangz?” Kaar kaw daz, “Bawnz.”
23 Yesuhz daz kaar nahz, “Paarz ngaz bawnz tiangz klakz an Ohz ngaz tiangz. Keuiz daz a khwaangz an ngaz keu dez takz dahz takz kaaiz Ohz ne Ohz nam aez bawnz. Ti an keu diz naeh ta ihz an Paz Ohz ras mok.”
24 Meuz teu paez seu kawlz keui ngarz lawng an diz ne keuh sunz ca kaar kuanz mai nahz. 25 Keuiz daz Yesuhz raak leh keuh, daz keuh nahz, “Pehz mas boh ihz mawh an nam anz kheuz Yio keui upz peung ihz prih daehz, khunz keuh keui kaw ngaai aamz taw ihz daehz. 26 Keuiz daz pehz yak cih ceun diz. Ihz sunz penz an mawh ne lo cih peur cao pehz. 27 Tuhz pehz ne sunz penz peur aacz ihz kaw lo cih peur cao pehz. 28 Kuanz Kingz Ihz keuiz kaw truz ta cao suamz ihz nam anz, truz cih peur cao ihz, cunz phawmz Daehz, thutz leh ihz tang heungz.”
Yesuhz cih aez ihz ngaai bimz keu aarz awlz mial
29 Meuz Yesuhz boh teu paez Hnhz keui lae truz thaz weng Yerikho ne wungz ihz heungz keui tawiz puatz Hnhz. 30 Maang ihz ngaai bimz keu aarz keu dez boh waar reung dengz, meuz kaar ngarz Yesuhz datz lan ne, kaar raak daz, “Tahz, Kuanz khunz Dawit, teur yawng aaiz raez!”
31 Wungz ihz keui hiutz aez kaar moh pras pras, keuiz daz kaar baaiz raak usz usz daz, “Tahz, kuanz khunz Dawit, teur yawng aaiz raez!”
32 Yesuhz kaw deukz rae raak kaar. Hnhz maanyz, “Sunz aez Ohz cih paarz nahz naehz?”
33 Kaar mial daz, “Tahz, aez ngaai aaiz awlz.”
34 Yesuhz kaw teur yawng kaar rae teu ngaai kaar. Meuz diz luat ngaai kaar a wa awlz rae kaar lan tawiz Yesuhz.