Yesuhz kut tuhz weng Yerusalem
(Markus 11:1-11, Lukas 19:28-40, Yohn 12:12-19)
21
Meuz keuh a wa thatz weng Yerusalem, phraeoz pruh Betphake, a rang Olip ne Yesuhz cao teu paez Daehz keu aarz, 2 daz kaar nahz, “Lan cu pruh an naeh aacz ngaai paarz, paarz ngaz awlz meu rang mahz liz an peun tukz boh kuanz hnhz. Khawz nuarz leh truz a Ohz raez. 3 Beuk ihz maanyz paarz kaw lao, ‘Tahz lo,’ beuk daz ceun diz kaw keuh ngaz aez luat paarz nahz.”4 An ni aez keunyz mony reu ma ihz taangz phraz daz, 5 “Lao ihz weng Sion, ‘Yawt, khunz pehz truz cu pehz, maang phawmz keu ceum rae tumz meu rang mahz liz boh kuanz hnhz.’”
6 Teu paez kaar diz kaw lan cih tawiz ceun Yesuhz seumz daehz. 7 Kaar leh truz meu rang mahz liz kuanz mah, keuh leh kreung daehz paelz kaai butz meu rang, Yesuhz raw tumz lang diz. 8 Ihz heungz baaiz leh kreung daehz paelz tawiz reung dengz, ihz teur ka kaw mak kaakz khaehz paelz tawiz reung dengz. 9 Ihz an lan aacz Hnhz boh lan thaz puatz Hnhz keui teur aacz daehz raak daz, “Hosanna kaai Kuanz khunz Dawit! Tahz an truz tawiz mus Phraz Cen Cen ne naeh an rak! Lupz phrawz Phraz Pen Caoh an trawng dutz!”
10 Meuz Yesuhz kut tuhz weng Yerusalem ne ihz tang weng keui haaiz haaiz rae maanyz daz, “Hnhz naeh yaeh?” 11 Wungz ihz kaw daz, “Hnhz naeh Yesuhz, ihz taangz phraz weng Nasaret prih Kalile.”
Yesuhz kut tuhz wat
(Markus 11:15-19, Lukas 19:45-48, Yohn 2:13-22)
12 Yesuhz kut tuhz teu laangz wat Phraz rae wah thengz ihz saz ihz yal a diz. Hnhz plaangz beungz thengz pheunz ihz teur yal paekz boh tangz ihz saz ploiz keui. 13 Hnhz daz keuh nahz, “Taemz mok tuhz kyaamz lik daz, kaang Ohz trohz naeh ti suz tawngz, keuiz daz pehz cih aez naeh tham conz.”
14 Ihz ngaai bimz boh ihz cawng nam rak keui truz cu Hnhz a wat, Hnhz cih aez keuh moh rak. 15 Keuiz daz beunz caangz boh ihz mawz kyaamz keui awlz lawng an rak seum sangz Hnhz cih boh an kuanz ihz keui raak keurz a wat daz, “Hosanna kaai Kuanz khunz Dawit!” ne keuh ca. 16 Keuh maanyz Yesuhz, “Anz Mih ngarz an kuanz ihz keui raak?”
Yesuhz mial daz, “Ngarz boh, pehz nam ti rawz haz? ‘Phraz Pen Caoh cih aez kuanz ihz boh kuanz ngaak keui lupz phrawz Hnhz.’”
17 Hnhz kaw mok thengz keuh rae lan nawk weng a pruh Bethani, Hnhz moh a diz seu borz.
Yesuhz kin teungz laangz wah
18 Teuk ngup cao cao meuz Yesuhz yeung mial kut tuhz weng ne Hnhz a wa coh. 19 Hnhz awlz teungz laangz wah naeh waar reung dengz. Hnhz lan dawmz yawt plaehz keuiz daz nam awlz plaehz, naeh taw lahz pan. Hnhz daz teungz laangz wah nahz, “Yak aez plaehz seu pawk leui.” Meuz diz luat teungz laangz wah kaw wiatz lan.
20 Meuz teu paez keui awlz ne sangz, keuh daz, “Teungz laangz wah ne cih seu naez wiatz lan ez?” 21 Yesuhz mial daz, “Ohz daz mawn pehz nahz, beuk pehz maang reung dengz yum, an nam thaang pleung kaw nam kaz taw cih kaai teungz laangz wah ceun ni, lao rang an ni nahz, ‘Kraai klaez sapz tuhz paang laai raez,’ daz kaw ngaz naeh mawn. 22 Meuz pehz suz tawngz ne beuk yum rae maanyz ne pehz ngaz bawnz.”
Ihz maanyz lawng a na Yesuhz
23 Meuz Yesuhz kut sawnz tuhz teu laangz wat ne beunz caangz boh ihz mawh keui truz maanyz Hnhz daz, “Mih leh a na naehz cih an keu diz hacz aamz? Yaeh aez Mih nahz a na an diz?”
24 Yesuhz mial daz, “Ohz kaw ngaz maanyz pehz nahz seu meoz. Beuk pehz tawpz kaw Ohz ngaz lao, Ohz leh a na naehz cih an keu ni. 25 Teuk sruz Yohn ne naeh thaz kaang raaoz haz, naeh thaz ihz haz?” Keuh teur deuiz teur daz daehz nahz, “Beuk ehz daz naeh thaz kaang raaoz daz kaw Hnhz ngaz maanyz thaengz daz, ‘Cih naehz pehz paw nam yum Yohn hoh?’ 26 Beuk ehz daz naeh thaz ihz daz kaw ehz bawnz doz ihz, kawp daz ihz hacz aamz keui mok Yohn naeh ihz taangz phraz.” 27 Kawp ceun diz rae keuh tawpz daz Yesuhz nahz, “Ehz nam mas.” Yesuhz kaw mial daz, “Ohz kaw nam lao leh a na naehz cih an keu ni.”
Pung taek kuanz keur meh keu aarz
28 “Pehz thaang ceun nae? Ihz hawkz maang kuanz keur meh keu aarz. Hnhz lan cu an mawh ne daz, ‘Kuanz, lan cih aez sraakz seu pit ohz meu ni luz.’ 29 Kuanz mawh ne daz, ‘Ohz nam lan.’ Keuiz daz hnhz mial seuk weur phawmz rae lan nahz waaiz awh. 30 Waaiz an diz paz keuh lan cu kuanz kyehz daz ceun wawh. Kuanz kyehz daz, ‘Ohz lan boh.’ Keuiz daz hnhz nam lan. 31 Kaar keu ni an nae cih tawiz paz daehz a?” Keuh tawpz daz, “Naeh kuanz mawh eu.” Yesuhz daz keuh nahz, “Ohz daz mawn pehz nahz, ihz seutz khawn boh yah mak damz keui bawnz kut aacz pehz tuhz prih Phraz Pen Caoh. 32 Kawp daz Yohn truz plaez pehz nahz reung dengz keu sangz kaw pehz nam yum. Ihz seutz khawn boh yah mak damz keui samz yum. Sangz daz pehz awlz ihz yum truz kaw pehz nam caanz reung dengz kawi daehz rae yum hnhz.”
Pung taek ihz khaatz sraakz seu pit
33 “Teuk ngarz thaengz pung taek seu meoz raez. Maang tahz sraakz hawkz peuk seumz seu pit. Hnhz lawm tang khaehz sraakz, kawngz lu ti teur niat plaehz, cih tang khrengz pao yawt. Hnhz khaatz aez ihz cih sraakz keui nahz kaw lae reung dengz. 34 Meuz kraao a wa plaehz ne hnhz cao peur cao daehz truz maanyz plaehz seu pit an naeh langz khaatz sraakz. 35 Keuiz daz ihz khaatz sraakz keui cawpz peur cao keu diz rae hawkz keuh tiz, hawkz keuh piamz, thaengz hawkz samz keuh leh kawnz reu aangz wiurz piamz. 36 Hnhz kaw plawiz lan thaengz peur cao daehz heungz lak laehz aacz. Ihz khaatz sraakz keui kaw cih kaai keuh ceun diz leun. 37 Thaz puatz ne hnhz cao kuanz keur meh daehz lan, hnhz daz, ‘Keuh ngaz nap suamz boh kuanz ohz keuiz.’ 38 Keuiz daz meuz ihz khaatz sraakz keui awlz kuanz tahz sraakz ne teur daz daehz nahz, ‘Hnhz an ni naeh ihz caam a moi, truz raez, piamz thengz hnhz, aez ehz bawnz a moi hnhz.’ 39 Keuh cawpz leh hnhz laak plaez thaz nawk sraakz rae piamz thengz hnhz. 40 Meuz tahz sraakz weng truz ne ngaz cih seu naez kaai ihz khaatz sraakz keui nahz?”
41 Keuh tawpz daz, “Hnhz ngaz piamz raang ca thengz ihz khaatz sraakz an meukz keui rae ngaz khaatz aez ihz an aez daehz nahz plaehz seu pit meuz phangz leh plaehz.”
42 Yesuhz daz keuh nahz, “Pehz nam ti rawz tuhz kyaamz lik haz? ‘Reu aangz an ihz cih kaang keui mok thengz ne naeh mial reu aangz seu dukz thaz cawkz boh. An ni naeh Phraz Cen Cen cih, naeh an rak seum sangz tuhz keutz ngaai ehz.’
43 Kawp ceun diz Ohz lao pehz nahz, prih Phraz Pen Caoh ne leh thengz thaz pehz rae ngaz aez kheuz ihz an caang plaehz plaehz prih Phraz Pen Caoh keui nahz. 44 Ihz an klaez sapz kaai reu aangz ne ihz an diz ngaz peukz penz patz, kaai ihz an reu aangz klaez sapz samz ihz an diz ngaz nyawi.”